[ექსკლუზივი] ლაშა ტალახაძე: მხოლოდ ჩემპიონობისთვის!

24 წლის ქართველმა ოლიმპიურმა ჩემპიონმა ლაშა ტალახაძემ, რომელმაც შარშან მსოფლიოს და ევროპის ჩემპიონობა მსოფლიო რეკორდებით მოიპოვა, ძალოსნობის საერთაშორისო ფედერაციის მიერ ჩატარებულ გამოკითხვაში გაიმარჯვა - დააგროვა 9804 ხმა და 2017 წლის პლანეტის საუკეთესო ძალოსანი გახდა.

უძლიერეს ათლეტს გუშინ დუშეთში შევეხმიანეთ.

- ლაშა, ახალ წარმატებას გილოცავ!

- დიდი მადლობა. ეს მარტო ჩემი გამარჯვება როდია. ირანიცა და ეგვიპტეც დიდი ქვეყნებია და მათს წარმომადგენლებთან ეულად ჭიდილი ძალიან ძნელი იქნებოდა, რომ არა ქომაგების მონდომება და მხარდაჭერა.

თითოეული ხმა, შესაძლოა, გადამწყვეტიც ყოფილიყო. ამიტომაც ეს წარმატება გულშემატკივრების გამარჯვებაცაა. ყველა იმ ადამიანის წინაშე ვალში ვარ, ვინც მხარი დამიჭირა და ხმა მომცა. კიდევ ერთხელ ყველას უღრმესი მადლობა. არაფერს დავიშურებ საიმისოდ, რომ წლევანდელ მნიშვნელოვან შეჯიბრებებში მათი იმედები გავამართლო.

- პირველი გამოცდა მარტის მიწურულს გელის...

- რუმინეთი 23 მარტიდან ევროპის ჩემპიონატს უმასპინძლებს. მოსამზადებლად დრო ცოტაა, ამიტომაც იყო, რომ ნაახალწლევს წვრთნა განვაახლეთ, 15 იანვრიდან კი საქართველოს სხვადასხვა ასაკის წევრებთან ერთად დუშეთში ვარ შეკრებაზე. მთელი დატვირთით ვვარჯიშობ, რაც შეიძლება, მალე აღვიდგინო ჩვეული სპორტული ფორმა...

- და ევროპაზე ახალი მიღწევებით გაგვახარო.

- რეკორდებისა რა გითხრათ, მაგრამ ჩემპიონის ტიტულის შენარჩუნებას აუცილებლად ვეცდები. აი, შემოდგომით მსოფლიოს ჩემპიონატი კი მინდა დავასრულო რეკორდით.

- რუმინეთში დისკვალიფიკაციის გამო სომეხი, რუსი და თურქი მეტოქეები არ გეყოლება.

- სამაგიეროდ სხვები არიან, თუნდაც ესტონელი მარტ სეიმი, არ არის გამორიცხული, სხვამაც გამოიჩინოს თავი. თუმცა ამჟამინდელი შედეგებით თუ ვიმსჯელებთ, მედლების კანდიდატები ჩემთან ერთად სეიმი და ირაკლი თურმანიძე არიან.

ირაკლიმ შარშან მსოფლიოზე ტრავმის გამო ვერ იასპარეზა, სამაგიეროდ, ამ პირველობისთვის ემზადება მონდომებით და კვარცხლბეკს მიღმა არ უნდა დარჩეს. სხვა წონებშიც გვყავს ისეთი სპორტსმენები, რომლებსაც საპრიზო ადგილებზე გასვლა შეუძლიათ.

- მსოფლიოს ჩემპიონატამდე ჯერ ძალიან შორია...

-იოლი ასპარეზობა არ არსებობს, მით უმეტეს - ძალოსნისთვის, რომელიც მეტოქეზე მეტად რკინასთანაა გაჯიბრებული. აშხაბადში მძიმე წონაში კონკურენტებად მაინც ირანელი, ეგვიპტელი, ესტონელი სპორტსმენები რჩებიან თურმანიძესთან ერთად.

სომეხი გორ მინასიანი ძლიერია ატაცში, მაგრამ აკვრაშია შედარებით სუსტი და ზემოთ დასახელებულ ძალოსნებთან ორჭიდში მეტოქეობა გაუჭირდება. ჩემი მიზანი მხოლოდ გამარჯვებაა და თურქმენეთის დედაქალაქშიც ჩემპიონობისთვის ვიბრძოლებ.

ყოველდღიური სპორტული გაზეთი "ლელო"
2507
მკითხველის კომენტარები / 0 /
მსგავსი ამბები
რუბრიკის სხვა სიახლეები