[ექსკლუზივი] მანუჩარ მარკოიშვილი: ტრავმას არასოდეს დანებებულვარ

საქართველოს ნაკრებს 23 და 25 თებერვალს ორი მნიშვნელოვანი მატჩი ელის, ავსტრიასთან და გერმანიასთან. ამ შეხვედრებში ითამაშებს თუ არა მანუჩარ მარკოიშვილი? შეკითხვაზე პასუხს მისი საუბრიდან შეიტყობთ.

მანუს იტალიაში დავუკავშირდით და ვრცელი ინტერვიუ ჩავწერეთ. იტალიის ჩემპიონატის ბოლო ტურში, "ორლანდოსთან" სტუმრად გამართულ მატჩში "რეჯო ემილიამ" მანუჩარის გარეშე ითამაშა. მას მუხლი აწუხებს. ინტერვიუც სწორედ ტრავმით დავიწყეთ.

- ევროთასზე, "ლიმოჟთან" მატჩში ტრავმა მივიღე, თუმცა ნამდვილად არ მახსოვს, რომელ ეპიზოდში ვიტკინე მუხლი. იტალიის ჩემპიონატში "პესაროსთან" შეხვედრაში მუხლი ძალიან ამტკივდა და ექიმებმა გადაწყვიტეს, რომ მდგომარეობა დასვენებით გამოსწორდებოდა. ამის შემდეგ კიდევ ვითამაშე, მაგრამ საბოლოოდ, სამედიცინო შემოწმების შედეგად ახალი დაზიანება აღმოჩნდა, რომლის მკურნალობისთვისაც გარკვეული დრო არის საჭირო.

"რეჯო ემილია" იტალიის თასზე ვერ გავიდა, ევროთასის პლეი ოფიც მარტში იწყება და გუნდში მითხრეს - გაგიმართლა, დასვენებისა და ტრავმის მოშუშებისთვის დრო გექნებაო. მე კი ვთვლი, რომ ეს არ არის გამართლება, 23 და 25 თებერვალს საქართველოს ნაკრებს მნიშვნელოვანი მატჩები ელის...

- 23-მდე ტრავმის მოშუშება ვერ მოესწრება?

- სურათი ნაკრების ექიმს, თემურ ხვედელიძესაც გავუგზავნე. მუხლი საოპერაციო არ არის, მაგრამ მკურნალობა სჭირდება. გული ძალიან მწყდება, რომ ავსტრია-გერმანიასთან ნაკრებს ვერ დავეხმარები. დიდ პასუხისმგებლობას ვგრძნობ, როგორც ქვეყნის, ასევე მწვრთნელების და თანაგუნდელების წინაშე, რომლებიც მართლაც ბოლომდე იბრძოდნენ ნოემბრის მატჩებში.

არ ვარ ის პიროვნება, შუა გზაში გავჩერდე, ყოველთვის ვცდილობ, საქმე ბოლომდე მივიყვანო. ტრავმიანსაც მითამაშია. ასეთ დროს ყოფილა შემთხვევა, რომ ტრავმა გამმიზეზებია, თუმცა იყო შემთხვევები - ბოლომდე გამიტანია და ყველაფერი კარგად დასრულებულა. მთავარია, საკუთარ თავთან მართალი ვიყო. დამიჯერეთ, სადღეისოდ საქართველოს ნაკრების თითოეული მოთამაშე იმაზე მნიშვნელოვანია, ვიდრე ჩვენ წარმოგვიდგენია. თითოეული დიდ პატივისცემას იმსახურებს.

- ნოემბერში გერმანიასთან და სერბეთთან საინტერესო მატჩები გამოგვივიდა, თუმცა, დავმარცხდით...

- ამ მატჩების შეფასებისას მთავარი, რაზეც ყურადღება უნდა გავამახვილოთ, შედეგია - წავაგეთ, შედეგი ცუდი იყო. თავის მართლებას აზრი არა აქვს. წაგებულ მატჩებში გაცილებით უკეთესად ჩანს შეცდომები. მარცხის შემდეგ ხვდები, რომ მეტი შეგეძლო, უკეთესი შედეგის ჩვენებაც შეიძლებოდა, მაგრამ წარსულის გაკვეთილი უკვე მომავლისთვის უნდა გამოიყენო.

რაც შეეხება კალათბურთელებს, შეიძლება ბევრი ასე არ ფიქრობდა, მაგრამ დარწმუნებული ვიყავი, რომ ბრძოლისუნარიანი გუნდი გვეყოლებოდა. შემადგენლობა მნიშვნელოვნად გადახალისდა, დასაკარგავი არაფერი გვქონდა, გვაკლდნენ გუნდის ლიდერები, პასუხისმგებლობა თითოეულმა კალათბურთელმა სათანადოდ გაიაზრა და ამიტომაც ვიბრძოლეთ ბოლომდე.

- გერმანიასთან და სერბეთთან ბევრი უიმედოდ იყო განწყობილი. გამოვიდა ყველაფერი, ისე როგორც ელოდი?

- თამაშებამდე რთული იყო იმის განსაზღვრა, როგორი გუნდი გვეყოლებოდა და როგორ ვითამაშებდით. ევრობასკეტის შემდეგ ხომ შემადგენლობა მნიშვნელოვნად შეიცვალა. საინტერესო იყო, ვის რა ფუნქცია ექნებოდა, როგორ შევთამაშდებოდით, როგორ შევასრულებდით მწვრთნელის დავალებებს, როგორ მოვახერხებდით ადაპტაციას. საბოლოოდ საინტერესო სურათი მივიღეთ - გუნდი მაქსიმალურად მოძრაობდა, ბურთს კარგად ვატრიალებდით, ვეძებდით თავისუფალ პარტნიორს...

ყველანაირად ვეცადეთ მოედანზე გადაგვეტანა მწვრთნელის, ილიას ზუროსის, ჩანაფიქრი, ხასიათი და ტაქტიკა. ყველა ლაპარაკობს ევროლიგელების დანაკლისზე. თორნიკე შენგელია და გიორგი შერმადინი რა ძალას წარმოადგენენ, თავად მოგეხსენებათ. დუდა სანაძე, გიორგი ცინცაძე და ბექა ბურჯანაძე დიდი დანაკლისი იყო ჩვენი გუნდისთვის. არ ვამბობ, რომ ისინი ვინმეს ჩაანაცვლებდნენ, ვინმეს მაგივრად ითამაშებდნენ, ან ვინც გუნდში იყვნენ, რამე დააკლეს, უბრალოდ, ეს სამი კალათბურთელი რომ გვყოლოდა, შედარებით მეტი დასვენების საშუალება გვექნებოდა, თუნდაც მე და მაიკლ დიქსონს.

- ნაკრებში თაობათა ცვლის პროცესია...

- ყველას თავისი მოსაზრება აქვს. მე კი მიმაჩნია, რომ საქართველოს ნაკრებში თაობათა ცვლის პროცესი შეიძლება ნაკლებად მტკივნეულად გადავიტანოთ. ლიდერების ჩანაცვლება იოლი არ იქნება, მაგრამ ახალგაზრდებში ბევრ ისეთ კალათბურთელს ვხედავ, რომლებსაც ღირსეულად შეუძლიათ შეცვალონ წამყვანი მოთამაშეები. ვიდრე ძალიან არ გაგვიჭირდება, მანამ არ ვენდობით ახალგაზრდებს. არადა, ნამდვილად კარგი კალათბურთელები გვყავს. მთავარია, სწორი მიმართულებით განვითარება, მონდომება და ერთგულება.

- ნაკრებიდან "რეჯო ემილიაზე" გადავიდეთ. სეზონი ცუდად დაიწყეთ. მდგომარეობას ახლა ასწორებთ. რა იყო წარუმატებლობის მთავარი მიზეზი?

- ისე არ გაიგოთ, თითქოს, ვინმეს შრომას ვაკნინებდე, მაგრამ არ გვყავდა მაღალი დონის გამოცდილი კალათბურთელები. ახალგაზრდა კი, შედარებით მეტ შეცდომას უშვებს. ამავე დროს გასათვალისწინებელია ისიც, რომ როდესაც გუნდის შეთამაშება გსურს, გაცილებით იოლია გამოცდილ კალათბურთელებთან ურთიერთობა, ვიდრე ახალბედებთან.

"რეჯო ემილიას" სწორედ შეკვრა-შეთამაშება სჭირდებოდა. წარუმატებელი სტარტის შემდეგ საჭირო იყო რადიკალური ცვლილებები. გუნდში მოვიდნენ გამოცდილი ჯეიმს უაითი და პედრო ლომპარტი. პედრო აქამდე ესპანეთში თამაშობდა, გიორგი შერმადინსა და ვიქტორ სანიკიძესთან ერთად "სარაგოსას" ღირსებას იცავდა.

გამოცდილი კალათბურთელია, იცის, როდის რა უნდა გააკეთოს. ერთი-ორი მოგების შემდეგ გუნდის ფსიქოლოგიაც შეიცვალა და სატურნირო მდგომარეობა გამოვასწორეთ იტალიის ჩემპიონატში, ევროთასზე კი, პლეი ოფში გავედით.

- "რეჯო ემილიას" მატჩების მიხედვით თუ ვიმსჯელებთ, მეტოქეები დიდ ყურადღებას გაქცევენ, უმეთვალყურეოდ იშვიათად რჩები...

- ჩვენს გუნდში პირველი, ვის მეურვეობაზეც დიდი ყურადღება მახვილდება ამადეო დელა ვალეა. ნიჭიერი კალათბურთელია და ქულებსაც უხვად აგროვებს. მე ჩემი ფუნქცია მაქვს, ვცდილობ, პერიმეტრიდან შევუტიო. ეს მოწინააღმდეგეებმაც კარგად იციან და ცდილობენ, სროლის საშუალება არ მომცენ. ამის მიუხედავად თამაშში 10-12 ტყორცნას მაინც ვასრულებ, რაც ცოტა ნამდვილად არ არის. "რეჯო ემილიაში" და მის ტაქტიკურ სქემებში თავს კომფორტულად ვგრძნობ.

- ევროთასის პლეი ოფში რუსულ "ზენიტს" ხვდებით...

- პეტერბურგელებს ევროთასზე ერთ-ერთი გამორჩეული გუნდი ჰყავთ. ამ ბარიერის დაძლევა იოლი არ იქნება, მაგრამ რაც მთავარია, მოედნის უპირატესობა ჩვენს მხარესაა. ამას კი, გამოყენება უნდა. რაოდენ ძლიერი მეტოქეც უნდა გვყავდეს, მთავარია, ჩვენ როგორ შევხვდებით პლეი ოფს, როგორი ხასიათით გავალთ მოედანზე, რამდენად კარგად შევუზღუდავთ მეტოქეს სივრცეს...

2162
მკითხველის კომენტარები / 0 /
მსგავსი ამბები
რუბრიკის სხვა სიახლეები