[ექსკლუზივი] ნიკა მალი: ამერიკა? საიდან გაიგეთ?! ყველაზე კონკრეტული შემოთავაზება მართლაც ამერიკული ლიგიდანაა

გასულ სეზონში "გამორჩეული" თუ ვინმეს ეთქმის, ერთ-ერთი უდავოდ ნიკა მალია - "საბურთალოს" 20 წლის განაპირა მცველი, რომელმაც ეროვნულ ლიგაშიც ბევრი კარგი თამაში ჩაატარა, ევროპალიგაზეც კარგი იყო და საქართველოს ახალგაზრდულ ნაკრებშიც. გამოჩნდა, რომ ამ ბიჭს ეროვნულ ნაკრებში თამაშის პოტენციალიც აქვს.

შემთხვევითი არ არის, რომ ცხოვრებაში მოკრძალებული, მოედანზე კი თამამი და სწრაფი მარჯვენა მცველით ხორვატული და პოლონური კლუბები დაინტერესდნენ. "საბურთალოსა" და საქართველოს ახალგაზრდული ნაკრების მცველი ჩემპიონთა ლიგის ჯგუფური ეტაპის მონაწილე ზაგრების "დინამოს" მოეწონა.

შემდეგ "ლელომ" შემოგთავაზათ პოლონელი კოლეგის წერილი, რომელიც ამტკიცებდა, რომ მალის მიწვევა პოზნანის "ლეხს" სურდა, ისევე, როგორც საქართველოს ახალგაზრდული ნაკრებისა და "საბურთალოს" შემტევის - გიორგი კოხრეიძის.

დღეს კიდევ ერთი ექსკლუზივით გაგანებივრებთ. საქმე ისაა, რომ ნიკას რეალური და კონკრეტული წინადადებით სხვა კლუბმა მიმართა...

დიდი გამოცდილება

- ეროვნულ ლიგაში 2018 წელსაც ითამაშეთ, მაგრამ უფრო გასულ სეზონში გამოჩნდით. რამ გამოიწვია პროგრესი?

- იმან, რომ ძირითად შემადგენლობაში ტირასპოლის "შერიფთან" გასვლით შეხვედრაში ვითამაშე. ჭიაბრიშვილისგან ასეთ ნდობას არ ველოდი.

- რატომ?

- ტრავმის გამო სეზონის დასაწყისი გამიცდა და მოლოდოველებთან შეხვედრამდე 5-6 მატჩი ეროვნულ ლიგაში შეცვლაზე ვითამაშე. ამიტომაც არ ველოდი, ტირასპოლში მწვრთნელი სასტარტო შემადგენლობაში რომ დამაყენებდა. ჭიაბრიშვილმა თეორიაზე ძირითადის 11 ფეხბურთელი რომ დაასახელა, დიდი ნდობა ვიგრძენი და ამისთვის მადლობის გადახდა კარგი თამაშით მსურდა. საბედნიეროდ, ყველაფერი კარგად აეწყო.

- ევროთასებზე გამოსვლამ რა შეგძინათ?

- დიდი გამოცდილება, თან ვნახე, რა დონეცაა და ეს ფეხბურთელისთვის ბევრს ნიშნავს. მთავარი პრაქტიკაა. საერთოდ, "საბურთალოში" თამაშმა ბევრი შემძინა და მიხარია, რომ ამ გუნდის მოთამაშე ვარ.

- ევროთასებამდე იყო ერთწლიანი პაუზა...

- ეს ჩემთვის რთული პერიოდი იყო... მცირე წვივის ძვალი გამიტყდა და სამი ოპერაცია დამჭირდა, ფეხიდან ფირფიტა შარშან, 23 დეკემბერს ამომიღეს. ვიწყებდი თამაშს და ისევ ტკივილები მაწუხებდა...

- ჭიაბრიშვილმა წასვლაზე რას ფიქრობთ?

- ის ჩემთვის მხოლოდ მწვრთნელი არ არის, უფროსი მეგობარიცაა და ჩემს წინსვლაში დიდი როლიც მიუძღვის. ეს მე არ დამავიწყდება! დარწმუნებული ვარ, სადაც იქნება, იქაც ქართული ფეხბურთის საქმეს გააკეთებს. გიამ დამაწინაურა და ახლა წასვლის შემდეგ უფრო თამამად ვეტყვი მადლობას.

ეს ძალიან საწყენია...

- საქართველოს ახალგაზრდულ ნაკრებზეც ვთქვათ. დარჩა 5 მატჩი და ევროპის ჩემპიონატზე გასვლის თეორიული შანსი. მაგრამ უეფამ, ფაქტობრივად, ნაკრებს მთავარი მწვრთნელი გია ცეცაძე ჩამოაშორა და რა იქნება, არავინ იცის...

- ეს ძალიან საწყენია. გია ცეცაძის ხელში ნაკრები გაძლიერდა და შესაძლებლობები გამოავლინა. მაგრამ მიმაჩნია, რომ გუნდს კიდევ უფრო მეტი შესაძლებლობები აქვს. ეს გასვლაზე შვეიცარიასთან, საფრანგეთსა და სლოვაკეთთან ჩატარებულ შეხვედრებში გამოჩნდა. როცა ევროპის ცნობილი კლუბების მოთამაშეებისგან შედგენილ საფრანგეთს მსაჯი ეხმარება, გამოდის, კარგი ნაკრები გვყოლია. ჩვენს კარში მსაჯმა ისეთი პენალტი დანიშნა... სლოვაკეთთან კი მოთამაშე გაგვიგდეს და ესეც საკამათო იყო. სხვაგვარად ვერ მოგვიგებდნენ და ახლა ევროპის ჩემპიონატზე გასვლის გაცილებით მეტი შანსი გვექნებოდა.

- ნაკრების მთავარი მოტივატორი ცეცაძე იყო. ახლა რა შანსები გვაქვს?

- დარჩენილი ყველა შეხვედრა უნდა მოვიგოთ, ხუთიდან ოთხი მატჩი სახლში გვაქვს და უნდა მოვიგოთ. ურთიერთშეხვედრებსაც მნიშვნელობა აქვს. ამიტომ კონკურენტებზეც დამოკიდებულები ვართ.

- საქართველოს ნაკრებში მოხვედრა რეალური გგონიათ?

- ეს ჩემზეა დამოკიდებული და იმედიც მაქვს, მაგრამ უნდა მოვუმატო. ამისთვის უკეთეს ჩემპიონატში წასვლა დამჭირდება. დიდი იმედი მაქვს, ჩვენი ნაკრები ევროპის ჩემპიონატზე გავა.

პოლონელები, ესპანელები და დაკარგული ხორვატები

- ცნობილი გახდა, რომ თქვენით რამდენიმე კლუბი დაინტერესდა. ზაგრების "დინამოს" შესახებ უკვე ვიცით, მაგრამ ზაფხულის შემდეგ "საბურთალოს" არავინ დაკავშირებია. თქვენ თუ შეგეხმიანნენ?

- ზაგრებში თამაშის შემდეგ გავიგე მეც მათი ინტერესის შესახებ, მაგრამ ახლა კონკრეტული არაფერია.

- ბოლო დროს გაირკვა, რომ პოლონური "ლეხი" გააქტიურდა...

- ესეც არის, ინტერესი არსებობს... მე ვიცი, თუ საინტერესო ვარიანტი გამოჩნდება, კლუბი ხელს შემიწყობს. საქართველოს თასის ფინალზე პოლონელებიც ჩამოვიდნენ და, როგორც მითხრეს, ესპანური კლუბების წარმომადგენლებიც ყოფილან. ოღონდ, ვინ, ეს ზუსტად არ ვიცი.

- ...მაგრამ გავიგეთ, რომ სულ სხვა ქვეყანაში შეიძლება წახვიდეთ...

- ყველაფერი შეიძლება. მთავარია, კლუბის პოზიცია, ახალი მთავარი მწვრთნელი რას იტყვის და ბოლოს და ბოლოს, "საბურთალოსთან" კონტრაქტი მაკავშირებს. ფინანსური მხარეც მნიშვნელოვანია.

გენტზე არ ვიცი, რეალურია?

- სხვა ქვეყნებიდან მიწვევები არ გაქვთ?

- ვიცი, რომ დაინტერესებულები არიან ბელგიური, დანიური და ჩეხური კლუბები. მაგრამ რამდენად კონკრეტულია ეს ინტერესი, ამაზე ზუსტად ვერაფერს გეტყვით.

- ...მაგრამ მათ შორის ხომ სერიოზული გუნდის შემოთავაზებაც არის?

- რომელს გულისხმობთ?

- ბელგიურ "გენტს"...

- დიახ, გავიგე მეც, მაგრამ არ ვიცი, რამდენად რეალურია...

ამერიკა? საიდან გაიგეთ?!

- კონკრეტული წინადადება ხომ ამერიკულიკლუბიდანაც მიიღეთ?

- ამერიკიდან? ეს საიდან გაიგეთ?! დიახ, ამერიკელები სერიოზულად დაინტერესდნენ...

- რაც ვიცით, მეიჯორ ლიგის აღმოსავლეთ კონფერენციის მეორეადგილოსანი და მეოთხედფინალში გასული "ფილადელფია" გიწვევთ და ეს ყველაზე კონკრეტული ვარიანტია...

- დიახ, ამაზეა ლაპარაკი. მითხრეს, რომ ახლა ვიზებს მიკეთებენ.

- არადა, ბევრი ამერიკულ ლიგას "პენსიონერების ლიგას" უწოდებს...

- და ვინმე იტყვის, რომ იბრაჰიმოვიჩი, შვაინშტაიგერი და რუნი დაბალი დონის ჩემპიონატში თამაშობდნენ? მე მგონია, ამერიკულ ლიგაზე ეს შეხედულება ძალიან მოძველებულია. სხვათა შორის, "ფილადელფიას" წარმომადგენელმა მითხრა, რომ ძალიან საინტერესო პროექტის განხორციელება სურთ - არ მეგონა, საფეხბურთის ლიგის გაძლიერება ასე თუ სურდათ.

- ანუ?

- ძლიერი გუნდები უფრო ამერიკის დასავლეთშია, ახლა აღმოსავლეთშიც სურთ გაძლიერება და ახალი ფეხბურთელებს 3-5-წლიან კონტრაქტებს უფორმებენ. მიზანი კი ისაა, რომ ამერიკული ლიგა ევროპის ტოპ-ხუთელის დონეზე განვითარდეს და ამაში იმხელა სახსრებს აბანდებენ, არ გამიკვირდება, ეს რომ შეძლონ.

2612
მკითხველის კომენტარები / 0 /
მსგავსი ამბები
რუბრიკის სხვა სიახლეები
;