[ექსკლუზივი პიონჩანიდან] დაიხურა ყველაფერი: ვის სად შეეძლო, თავს აფარებდა

გუშინ უფრო საშინელი, ცივი ქარი ქროდა...

პრობლემების გამო, რამაც იჩინა თავი და საგონებელში ჩააგდო ორგანიზატორები, ზამთრის 23-ე ოლიმპიადა, სამწუხაროდ, ცოტა არ იყოს, უფერულდება. კი ბატონო, დაიხარჯება დიდი ფული დამატებით, მაგრან ეს ის შემთხვევაა, როცა ფული შეიძლება რაღაც ხარვეზებს გამოასწორებს, თომცა დანაჩრდილს აღარაფერი ეშველება, დანაკარგის ანაზღაურდება ვერ იქნება ადეკვატური.

სხვა საქმეა ამინდი, რომელიც აქეთ გკარნახობს პირობებს და ვერანარი მცდელობით ნირს ვერ შეუცვლი. მისი ჭირვეულობით იცვლება და იცვლება ოლიმპიური სტარტების კალენდარი. აგერ, რომ გვეგონა 12 თებერვალს 15-ისთვის გადადებული შეჯიბრების შუალედში, გუშინ მაინც ვიხილავდით პირველად ამ ოლიმპიადის სტარტზე ნინო წიკლაურს, ისევ არ გამართლდა მოლოდინი - გადაიდო სლალომში ქალთა ასპარეზობაც.

გუშინ მართლაც საშინელება იყო. ისეთი ქარი ამოვარდა, ზონაში, სადაც ჩვენ ვიყავით, ვნახეთ, როგორ გამალებით კეტავდნენ ობიექტებს. ხალხი, ვის სად შეეძლო, თავს აფარებდა. ოლიმპიურ პარკშიც შეწყდა ყოველგვარი კულტურულ-გასართობი ღონისძიებები, დაიხურა ყველაფერი. უნებურად გამახსენდა "ცისფერი ტრიოს" ნამღერი - თამაზ ჯორბენაძის "ზამთარი" და სტროქონი ამ სიმღერიდან, რომელის პერიფრაზიც სათაურში გამოვიტანე.

ამინდი, ამინდად, მაგრამ ვერავინ დაგვარწმუნებს, ტრანსპორტის პრობლემა, მოსალოდნელი სიტუაციების გათვლებით, შეიძლებოდა არ დამდგარიყო დღის წესრიგში. ოლიმპიური სატრანსპორტო სისტემა მოშლილი არ არის, მაგრამ სერიოზული ვითარებაა.

2,5 მილიონზე მეტი ლარი დამატაბით გამოვყავითო - გამოაცხადეს, თუმცა თავმოსაწონი არაფერია ამაში. ახლა მიხვდნენ, ახლა რატომ უნდა მიმხვარიყვნენ, რომ თურმე არა 1800, არამედ 2 000 ავტობუსი და ორჯერ მეტი მძღოლი ყოფილა საჭირო.

ამავე ქვეყანაში, ჯერ კიდევ 30 წლის წინათ, სეულის ზაფხულის ოლიმპიადაზე 1988 წელს, კარგად მახსოვს, ტრანსპორტის ნაკლებობა არ ყოფილა და გამართულად მუშაობდა სისტემაც.

როგორც ვიტყობინებოდით, 13 თებერვალს ჩვენთვის უშეჯიბრო დღე იყო და ქართული დელეგაცია სამხრეთ კორეაში საქართველოს საელჩომ ისტუმრა სეულში.

ჩვენი დელეგაცია გაოცებულია ელჩის, ოთარ ბერძენიშვილის და საელჩოს მთელი შემადგენლობის აქტიური თანადგომით და გამოჩენილი გულისხმიერებით.
სეოკის პრეზიდენტმა, ლერი ხაბელოვმა, არაერთხელ გამოხატა ამ ადამიანებისადმი მადლიერება.

აღსანიშნავია, რომ ოთარ ბერძენიშვილი ბრაზილიაში საქართველოს დიპლომატიურ მისიას ხელმძღვანელობდა და 2016 წელს რიოში გამართულ ზაფხულის ოლიმპიურ თამაშებზე დამყარდა ძალიან ახლო, საქმიანი ურთიორთობა სეოკთან.

სურათზე: ჯერჯერობით, ამ ოლიმპიადაზე, ეროვნულ სამოსში გამოწყობილ მასპიძლებთან სურათის გადაღება ჟურნალისტებისთვის უფასოა.

თენგიზ გაჩეჩილაძე პიონჩანიდან

1567
მკითხველის კომენტარები / 0 /
მსგავსი ამბები
რუბრიკის სხვა სიახლეები