[ექსკლუზივი] რეალური და ახალი ამბავი კიტეიშვილზე, 3 მილიონსა და კიევის დინამოზე...

"კიტეიშვილის ტრანსფერშ 1,5 მილიონი ევრო არარეალურად ცოტაა. ჩვენი გუნდის მთავარი შემოქმედი მოთამაშის საფასური გაცილებით მეტია", - ასეთი კომენტარი გააკეთა სტამბოლის "ფენერბაჩეში" ოთარ კიტეიშვილის შესაძლო ტრანსფერზე გრაცის "შტურმის" სპორტულმა დირექტორმა ანდრეას შიკერმა...

მიუხედავად იმისა, რომ წელს "შტურმი" ძალიან შორსაა საუკეთესო კონდიციებისგან და გულშემატკივარს ვერ ახარებს (გუნდს სოციალურ ქსელებში "უნიათოს" და "უსუსურს" უწოდებენ), ოთარ კიტეიშვილი მაინც გამორჩეულია.

ბოლო ტურში მისმა გუნდმა ვენის "რაპიდთან" შინ მტკივნეული მარცხი იწვნია - იგებდა 2:0-ს და წააგო 2:3. "შტურმის" ფეხბურთელ ტასოს ავლონიტისის შემდეგ, საქართველოს ნაკრების ნახევარმცველს საერთაშორისო სტატისტიკისა და ანალიზის გვერდმა "სოფასქორმა" გრაცელთა შორის საუკეთესო შეფასება - 7,4 ქულა დაუწერა, რამაც კიტეიშვილის საშუალოსეზონური შეფასება კი 7,1-მდე გაზარდა, რაც ავსტრიული ლიგის კვალობაზე ძალიან კარგი მაჩვენებელია. ცხადია, ეს სელექციონერებს არ გამოჰპარვიათ და 24 წლის კიტეიშვილის მიმართ ინტერესი გაიზარდა.

"წელს "შტურმი" ისეთ სეზონს ვერ ატარებს. ამის მიუხედავად, უცხოური კლუბები არაერთი ჩვენი მოთამაშით დაინტერესდნენ, მათ შორის, რა თქმა უნდა, ოთარ კიტეიშვილიცა. მედიაში გავრცელებდა ინფორმაცია, რომ ქართველი "ფენერბაჩეს" ყურადღების ცენტრშია, მაგრამ ჩვენ ტრანსფერზე ჯერ კონკრეტული შემოთავაზება არ მიგვიღია და, მით უფრო, არავისთან შევთანხმებულვართ, როგორც ამას მედია წერს", - ეს გრაცელთა სპორტულმა დირექტორმა ანდრეას შიკმა "კრონენ ცაიტუნგთან" კომენტარში თქვა.

ახლა კი მთავარი - შიკერმა უარყო ინფორმაცია, თითქოს თურქულმა გრანდმა ქართველი ლეგიონერის შესაძენად ავსტრიულ კლუბს 1,5 მილიონი ევრო შესთავაზა.

"კიტეიშვილის მიმართ ინტერესი ნამდვილად არის, მაგრამ იმ კლუბებს, რომაც ქართველი ნახევარმცველის შესახებ მოლაპარაკების დაწყება სურთ, წინასწარ ვეტყვით, რომ დრო დაზოგონ - 1,5 მილიონი ევრო კიტეიშვილში არარეალურად ცოტაა. ის ჩვენი გუნდის მთავარი შემოქმედებითი მოთამაშეა, რომლის საფასურიც გაცილებით მეტია და ამ თანხაზე არც დავთანხმდებით", - განაცხადა სპორტულმა დირექტორმა.

კიტეიშვილი კონტრაქტი ძალაში 2022 წლამდეა. ჩვენი ექსკლუზიური ინფორმაციით, საქართველოს ნაკრების ნახევარმცველით არა მხოლოდ თურქული გუნდი, არამედ, უკრაინული ფეხბურთის გრანდის, კიევის "დინამოს" სელექციონერი დაინტერესდა. იყო კიტეიშვლის ტრანსფერზე ლაპარაკების მცდელობაც, მაგრამ აღმოჩნდა, რომ "შტურმი" 3 მილიონ ევროს ითხოვდა, რაც საშუალოევროპული დონის კლუბისთვის ძალიან დიდ თანხად ითვლება.

კიტეიშვილის გადაბირების სურვილს ბევრი ევროპული და რუსული კლუბიც გამოთქვამს. მაგრამ ვინ  გადაიხდის გაგანია პანდემიის პირობებში 3 მილიონ ევროს? საკითხავი ესაა, თორემ ამ შრომისმოყვარე და ფუტკარივით მუშა ნახევარმცველისადმი ინტერესი იყო, არის და მომავალშიც რომ იქნება, ამაში ეჭვი არ გვეპარება.

2303
მკითხველის კომენტარები / 0 /
მსგავსი ამბები
რუბრიკის სხვა სიახლეები
;