[ექსკლუზივი] ..."რუსა მას, როდის მოვა ოთო"?.. ოთარ კიტეიშვილმა ავსტრიაში ქართული სკოლის ბავშვებს დიდი სიხარული აჩუქა. ოთხი კარგი ამბავი შტურმის ქართველ ნახევარმცველზე

ოთარ კიტეიშვილი და ავსტრიაში მცხოვრები ქართველი ბავშვები


ოთარ კიტეიშვილი ავსტრიის ბუნდესლიგაში ერთ-ერთი გამორჩეული მოთამაშე ხდება. საქართველოს ნაკრებისა და გრაცის "შტურმის" ნახევარმცველის შესახებ 4 პატარა და კარგი ამბავი გვაქვს...

ავსტრიაში თამაში დაუფასდა...

22 წლის ქართველმა ავსტრიის ბუნდესლიგის საშემოდგომო ეტაპზე 18 მატჩი ჩაატარა, 4 გოლი გაიტანა და 5 საგოლე პასი გააკეთა.

საერთაშორისო საფეხბურთო ვებგვერდი "სოფასკორი" ოთარ კიტეიშვილის თამაშს ავსტრიის ბუნდესლიგის მიმდინარე გათამაშებაში 10-ბალიანი სისტემით საშუალოდ 7,3 ქულად აფასებს. ამ მაჩვენებლით ქართველი "შტურმში" მხოლოდ ბულგარელ კირილ დესპოდოვს (7,5 ქულა) ჩამორჩება.

მისი მარგი ქმედების კოეფიციენტის გაზრდა გერმანული სამენეჯერო ინტერნეტსააგენტო "ტრანსფერმარკტს" არ გამორჩენია - თუკი სეზონის დასაწყისში კიტეიშვილის ტრანსფერის სავარაუდო ღირებულებად 1,5 მილიონი ევრო ეწერა, ახლა შეფასება საგრძნობლად გაიზარდა და ოთარის გრაფაში 2,0 მილიონი ევრო ფიქსირდება.

ამ მაჩვენებლით, კიტეიშვილი საქართველოს ყველაზე ძვირადღირებულ მოთამაშეთა ათეულში კიდევ უფრო დაწინაურდა და მე-5 ადგილზე აღმოჩნდა. წინ საბა კვირკველია (10,0 მლნ), შემდეგ მოდიან: გიორგი ჩაკვეტაძე (9,0 მლნ), დავით ხოჭოლავა (5,0 მლნ) და გიორგი ქვილითაია (2,5 მლნ).

ბუნდესლიგის საუკეთესოებში

პოპულარულმა ინტერნეტგვერდმა laola1-მა ავსტრიის ბუნდესლიგაში საშემოდგომო ეტაპის შემდეგ 2019 წლის საუკეთესო მოთამაშეების გამოვლენა გულშემატკივრების გამოკითხით გადაწყვიტა.

გამოცემა მოთამაშეებს თითოეული სათამაშო რგოლის მიხედვით შეარჩევს. საქართველოს ნაკრებისა და გრაცის "შტურმის" ფეხბურთელი საუკეთესო ნახევარმცველებში მოხვდა. ოთარ კიტეიშვილი საუკეთესო შემტევი ნახევარმცველების ნომინაციაში დაასახელეს.

laola1-მა ყველა ამპლუაში 6 ფეხბურთელი შეარჩია. გუშინ გვიანობამდე კიტეიშვილი 9,36 პროცენტით მე-5 ადგილზე იყო. გამოკითხვა გრძელდება და თუ ვიაქტიურებთ, ვითარების შეცვლა რეალური იქნება.

ასე შორს გაფრინდებაო...

ოთარ კიტეიშვილს კარგი სეზონი რომ აქვს, ამაზე laola1-ის შეფასებაც მეტყველებს. პოპულარულმა ავსტრიულმა საფეხბურთო ინტერნეტგვერდმა ბუნდესლიგის გუნდების 3 გამორჩეული მოთამაშე დაასახელა. გრაცის "შტურმის" საუკეთესოებში, კირილ დესპოდოვსა და ემანუელ საკიჩთან ერთად, ქართველი ნახევარმცველიც დაასახელეს. წერილი ასეა დასათაურებული: "2019 წლის შემოდგომის სეზონის საუკეთესოები".

ქართველი ამ სიაში "ზალცბურგის" ნორვეგიელ ვუნდერკინდ ერლინგ ჰაალანდთან ერთად მოხვდა, რომელსაც ავსტრიული კლუბი... 90 მილიონ ევროდ აფასებს.

"2019 წლის შემოდგომის სეზონი დასრულდა და ავსტრიულ ბუნდესლიგაში ზამთრის შესვენება დაიწყო. laola1-ის თითოეული კლუბიდან 3 საუკეთესო შეარჩია. შესაძლოა, ისინი თავიანთი გუნდების საუკეთესო ფეხბურთელები არც იყვნენ. თქვენი არჩევანი შეიძლება იმას ნიშნავს, რომ მათ წინასასეზონო მოლოდინს გადააჭარბეს და სერიოზული ნახტომი გააკეთეს. ბევრმა მოულოდნელად კონკურენტებს აჯობა. ზოგიერთ წარმატებულ გუნდში ბევრად მეტი კარგი მოთამაშის გამორჩევა შეიძლებოდა, აუტსაიდერებში კი სამის შერჩევაც გაგვიჭირდა", - წერს laola1.

გამოცემის აზრით, გრაცის "შტურმს" მაღალი ტემპით მზარდი ქართველის გუნდში გაჩერება გაუჭირდება:

"ოთარ კიტეიშვილი ნომინაციაში იმ პირობითაა, რომ გუნდს უფრო მეტ ქულას მოუტანს. 23 წლის ფეხბურთელს თავიდან რთული პერიოდებიც ჰქონდა, მაგრამ ახლა ის მყარად არის გრაცელთა ძირითადი შემადგენლობის მოთამაშე. თუ ის გაზაფხულზე წინსვლას ასეთივე ნაბიჯებით გააგრძელებს, ავსტრიულ ბუნდესლიგაში დიდხანს არ გააჩერებენ".

კიტეიშვილისთვის ხმის მიცემა ამ ბმულზე შეგიძლიათ

https://www.laola1.at/de/red/fussball/bundesliga/analyse/waehle-das-team-der-bundesliga-herbstsaison-2019-/

ავსტრიელ ქართველებთან შეხვედრა და გახარებული ბავშვები

კიტეიშვილი საკვირაო სკოლას ესტუმრა და მას მადლობა გადაუხადეს იმისთვის, რომ ბავშვებს სიხარული აჩუქა. საქმე ისაა, რომ "შტურმის ქართველი "შტურმანი" ავსტრიაში მოქმედ ქართულ სკოლაში მიიწვიეს.

2019 წლის 1 ივნისს, ქალაქ გრაცში, საგანგებოდ ქართველი ბავშვებისთვის, ექვთიმე თაყაიშვილის სახელობის საკვირაო სკოლა-სტუდია "იმედი" გაიხსნა, სადაც პატარებს 4 წლის ასაკიდან იღებენ. სკოლის წარმოამდგენელმა რუსუდან ზაზაშვილმა ქართველ ფეხბურთელს მადლობა სოციალურ ქსელში გამოქვეყნებული პოსტით გადაუხადა. 

 "ჩვენს საკვირაო სკოლას ქართველი ფეხბურთელი ოთო კიტეიშვილი სტუმრობდა. მადლობა მას, რომ გამონახა დრო და ამ არაჩვეულებრივ ბავშვებს სიხარული აჩუქა. სკოლა "იმედი" წელს, 1 ივნისს გაიხსნა. იდეის ავტორი და ხელმძღვანელი მე გახლავართ. უპირველესად, ოთო ძალიან კარგი ადამიანია და შემდეგ ჩვენთვის, ავსტრიაში მცხოვრები ქართველებისთვის - საამაყო სპორტსმენია. ჩვენ არ გვყავს დასაკარგი შვილები. ალბათ, აცნობიერებთ ქართული ენა საზღვარგარეთ დაბადებულ მოზარდებში როგორ იკარგება. ამ არაჩვეულებრივ საქმეს აბსოლუტურად უსასყიდლოდ ამიტომაც ვემსახურები",  - ამბობს "ლელოსთან" სკოლის დამფუძნებელი რუსუდან ზაზაშვილი

მისი თქმით, ემიგრანტ ბავშვებს წახალისება სჭირდებათ: "თითოეული სტუმარი თუსაინტერესო პროექტი ჩვენთვის სასიცოცხლოდ მნიშვნელოვანია, რადგან ჩვენი სკოლა სულ რაღაც 6 თვეს ითვლის. იმისთვის, რომ გავძლიერდეთ და ბავშვებში გაიზარდოს მოტივაცია, ყოველდღიურად ახლის ძიებაში ვართ. ჯერ იყო დიდი მოლოდინი. სულ მეკითხებოდნენ - "რუსა მას, როდის მოვა ოთო"? ამის ძახილით იწყებოდა და მთავრდებოდა გაკვეთილი. შეხვედრამ შესანიშნავად ჩაიარა - ითამაშეს ფეხბურთი, ყველა ბავშვს ავტოგრაფები დაურიგა, სკოლას კი გრაცის "შტურმის" ყველა ფეხბურთელის ავტოგრაფით დამშვენებული ბურთი გვისახსოვრა. დღემ ასე მხიარულად და სასიამოვნოდ ჩაიარა".

ქალბატონი რუსუდანის თქმით, ავსტრიაში მცხოვრები რამდენიმე ნიჭიერი ბავშვი იზრდება: "ოთო იმიტომაც მოვიწვიე სკოლაში, რომ ჯგუფში რამდენიმე ბავშვი ფეხბურთს თამაშობს, თან - ძალიან კარგად. მაგალითად, საბა მოსულიშვილი გრაცის "შტურმის" აკადემიაში ერთ-ერთი გამორჩეული ბავშვია, ხოლო რატი ლორია "ესკოში" ვარჯიშობს და მასაც ძალიან აქებენ. კიდევ რამდენიმე გამორჩეული ბავშვია. ვფიქრობ, ისინი მომავალშიქვეყანას და ჩვენს ნაკრებს აუცილებლად წაადგებიან".

2623
მკითხველის კომენტარები / 0 /
მსგავსი ამბები
რუბრიკის სხვა სიახლეები
;