[ექსკლუზივი] ფეხბურთის და ესპანეთის ხსენებაზე ყველაფერი გვერდით გადავდე და დავთანხმდი!.. ესპანიოლში მართვის გაუმჯობესებაზე ქართველი იმუშავებს...

ქუთაისის ტორპედოს გადარჩენა შესაძლებელი იყო...

"ესპანიოლში" ქართველი სპეციალისტი იმუშავებს - ეს გახლავთ ქუთაისის "ტორპედოს" ყოფილი დირექტორი ზურაბ ჩაკვეტაძე, რომელიც კლუბში ზაალ ჩაჩავას მოსვლის პერიოდში მუშაობდა, მაგრამ 2017 წლის შემოდგომაზე, როცა გუნდი დაკომპლექტდა და აეწყო, "ტორპედოს" დატოვება მოუხდა.

ქუთაისელთა ყოფილი დირექტორი კატალონიურ კლუბში მართვის გაუმჯობესებაზეიმუშავებს. ზურაბ ჩაკვეტაძემ ამის შესახებ "ლელოსთან" ინტერვიუში ლაპარაკა:

ქუთაისი-ამერიკა-კატალონია

- "ესპანიოლის" გეგმით, 5 სექტემბერს იწყება ახალი პროექტი, რომელიც გუნდში მართვის სისტემატიზაციასა და  სტრუქტურულ  სრულყოფას ითვალისწინებს. გუნდის მუშაობას დავაკვირდები და დირექტორთა საბჭოს წინადადებებს დასკვნის სახით წარვუდგენ. ეს ორთვიანი პროექტია.

- "ესპანიოლში" როგორ მოხვდით?
- 2006-11 წლებში ესპანეთში ვცხოვრობდი და ურთიერთობა მქონდა ბევრ საინტერესო ადამიანთან. სპორტული მენეჯმენტის გამოცდილება მქონდა და "ტორპედოში" რომ ვმუშაობდი,  ამ კუთხით კავშირები აღვადგინე. ქუთაისური კლუბიდან წასვლის შემდეგ კი ამერიკაში ვცხოვრობდი, საქმიანობა დავიწყე და ყველაფერი მშვიდად იყო, სანამ ბარსელონიდან ძველი ნაცნობი დამიკავშირდებოდა - "ესპანიოლს" მართვის სისტემის გაუმჯობესება სურს და შიდა კონკურსს ატარებენო. დაინტერესდნენ ყველა იმ მენეჯერის მოსაზრებებით, რომელთაც კლუბთან კავშირი ჰქონდათ. მე ერთ-ერთი მათგანი ვიყავი. ფეხბურთის და ესპანეთის ხსენებაზე ყველაფერი გვერდით გადავდე და დავთანხმდი. 20 პროექტი განიხილეს - წინადადება მეც წარვადგინე და რადგან მოიწონეს, ამერიკიდან  ბარსელონაში დაბრუნება გადავწყვიტე...

ესპანიოლის მოთამაშეების ინტერესი

- საინტერესოა, მაგალითად, ქუთაისის "ტორედოსთან" კავშირითა და თანამშრომლობით "ესპანიოლი" დაინტერესდება? კატალონიელებთან რადგან თანამშრომლობთ და ამაზე ზუსტი პასუხი გექნებათ...
- კავშირს გააჩნია. ბოლოს რა მდგომარეობაშიც "ტორპედო" იყო, ძნელი წარმოსადგენია, პარტნიორობით ვინმე დაინტერესეს. კიდევ კარგი, ახლა გუნდი ქუთაისის მერიას გადაეცა და გადარჩენის შანსი გაჩნდა. არ დავმალავ, თავის დროზე ესპანელებთან ამ კავშირების ამოქმედებაზე ვფიქრობდი. საამისოდ, აუცილებელი იყო სტაბილური ბიუჯეტი, რომელიც დაეყრდნობოდა ეროვნულ ლიგაში, საქართველოს თასსა და სუპერთასზე წარმატებული გამოსვლით მიღებულ სოლიდურ ბონუსებსა და ევროშემოსავლებს.

- ანუ?
- სტაბილური ბიუჯეტით შემადგენლობაც სტაბილური გახდებოდა და ამას რომ შევძლებდით, მერე პრობლემა აღარ იქნებოდა. ახლაც იმავეს ვფიქრობ, მაგრამ საამისოდ, კლუბში ფინანსური მდგომარეობა უნდა გამოსწორდეს. დარწმუნებული ვარ, ამის შემდეგ "ესპანიოლიდან" მოთამაშეების დამატება არ გაჭირდება.

- რანაირად?! "ესპანიოლიდან" საქართველოში ვინ ჩამოვა?
- გარწმუნებთ, არ არის ასე. ფეხბურთელებს ვკითხე - ევროტურნირზე, ჩემპიონთა ან ევროპის ლიგაზე ქართულ გუნდში თამაშს თუ დათანხმდებით-მეთქი და სიამოვნებითო. ეს მათთვის პროფესიულ დონეზე დიდი გამოცდილება იქნება, ჩვენთვის კი - გუნდის გაძლიერების შანსი. ასე რომ, თუკი ვინმე ფიქრობს, რომ ესპანური კლუბის დუბლები უარს იტყოდნენ საქართველოში ჩამოსვლაზე, ძალიან ცდება.

- დუბლების?
- რა თქმა უნდა! მათ დუბლებში ისეთი მოთამაშეები არიან!.. დამიჯერეთ, ევროპის ლიგის ჯგუფში "ტორპედოს" შეყვანა არ გაუჭირდებათ. დუბლებიდან 4-5 მოთამაშე მაინც ჩამოვიდოდა. თანაც, ბევრად სჯობია გუნდში მიიწვიო არა ვეტერანი, არამედ, მოტივირებული ახალგაზრდა, რომელსაც თავის გამოჩენა სურს და ყველა შეხვედრაში თავს მოიკლავს. ჩემპიონთა ან ევროპის ლიგაზე კარგი სტატისტიკა მათ თავიანთ კლუბშიც დაეხმარება, სხვა თვალით შეხედავენ.

- ანუ, მაქსიმუმ 6 თვით მოთამაშეების ჩამოყვანას გულისხმობთ?
- თუნდაც, ეს ჩვენ ამოცანის გადაჭრაში თუ დაგვეხმარება და ჯგუფში შეგვიყვანს, იყოს 6-თვიანი იჯარები. შემდეგ წელს სხვას ჩამოვიყვანთ და არანაკლებებს. რა პრობლემაა?!

ტორპედოში ამას ვეწინააღმდეგებოდი...

- საინტერესოა, "ტორპედო" რატომ დატოვეთ?
- ეს ჩემი სურვილი არ ყოფილა, მაგრამ ასე მოხდა. რა იყო მიზეზი, ჩემთვის გაუგებარია. ფაქტია, რომ გუნდი სწორედ ჩემს დროს აეწყო, ფინანსური კუთხითაც ყველაფერი დალაგდა და ოპტიმალურად მიდიოდა. ჩაჩავა ამბობს, თითქოს, ჩემამდე "ტორპედოში" არაფერი იყო და ცარიელ ნიადაგზე გუნდი ააყვავა. ეს არ არის სიმართლე - მოთამაშეთა 98 პროცენტი ჩემს დროს მოვიდა. რაც მთავარია, გუნდში სტაბილურ ფინანსურ მდგომარეობას მივაღწიეთ და ვითარება რომ დალაგდა, წინსვლისა და განვითარებისთვის სპონსორი აუცილებელი იყო. ჩაჩავა ამ ფონზე მოვიდა. მცირე ფინანსების მიუხედავად, კლუბი სწორად მუშაობდა. რამდენიმე თვეში კი "ტორპედო" ჩემპიონი გახდა. მაგრამ ამ დროს კლუბში აღარ ვიყავი - ორი თვით ადრე მომიხდა წასვლა. გულნატკენი წავედი. 2,2-მილიონლარიანი ბიუჯეტით გუნდი ჩემპიონი გახდა. ეს წარმატება მაშინდელი მენეჯმენტის, მწვრთნელებისა და ფეხბურთელების კარგი მუშაობის, ასევე გულშემატკივართა თანადგომის შედეგი იყო.

- თქვენი აზრით, მერე რატომ აირია სიტუაცია?
- მერე მოხდა გაუგონარი რამ: ჩხეტიანმა კარგად იმუშავა და ევროგათამაშებაში გუნდმა 4 მილიონი ლარი მიიღო. ამის მიუხედავად, "ტორპედო" დიდ ვალებში ჩავარდა. ამის ახსნა წარმოუდგენელია. ეს რაღაც ფინანსური ავანტიურა იყო, რასაც ვეწინააღმდეგებოდი. როგორც ვხვდები, ამის გამო არ მოვწონდი... არადა, ყველაფერი მარტივად იქნებოდა, "ტორპედო" პასუხისმგებლობით სავსე ხალხის ხელში რომ ყოფილიყო, რომლებიც ბიუჯეტს სწორად გათვლიდნენ.

დახმარების ფონდია საჭირო

- როგორც ამბობენ, ახლა კლუბის დავალიანება 2,5 მილიონი ლარია. ასეთ ვითარებაში "ტორპედოთი" ვინ დაინტერესდება?
- ჩაჩავას მისვლამდე, კლუბის აყვანა სხვა ბიზნესჯგუფებსაც სურდათ, მაგრამ მათ ყველა ფინანსური რისკისა და დეტალის გათვლა სურდათ და დროში ჩატევა ვერ მოახერხეს. არ ვიცი,  ახლა ვინ დაინტერესდება, როცა კლუბი ასეთ ვალებშია. არ გამოვრიცხავ, ამის გამო გაკოტრდეს კიდეც და ახალი "ტორპედო" ჩამოყალიბდეს, რომელიც ძველის სამართალმემკვიდრე ვეღარ იქნება. ეს ნიშნავს, რომ არ იქნება იმ ტრადიციის, ისტორიისა და წარმატებების სამართალმემკვიდრე.

- ნათქვამია, გამოსავალი ყოველთვის არის, უბრალოდ, მას ყველა ვერ პოულობსო. ქუთაისის "ტორპედო" მართლაც დიდი ტრადიციების მქონე კლუბია და მისი გადარჩენა როგორ ვერ უნდა მოხერხდეს?
- მერიამ "ტორპედოს" დაბრუნების პროცედურა დაიწყო და, ჩემი აზრით, გამოსავალი დაბალბიუჯეტიანი კლუბის გაკეთება იქნება, რომელიც ფინანსებს მოიზიდავს.

- როგორ?
- "ტორპედოს" დახმარების ფონდი უნდა შეიქმნას და დარწმუნებული ვარ, თანხები გამოჩნდება. როცა კლუბი  ვალებს გაისტუმრებს, მერე სპონსორიც გამოჩნდება. თორემ სხვისი აკიდებული დიდი დავალიანების გასტუმრება არავის სიამოვნებს. ასეთი კლუბები ევროპაშიც პრობლემურია, სადაც ფეხბურთი აწყობილი სისტემაა და ვალის დაფარვა სხვადასხვა სახის სასპონსორო, სატელევიზიო და სხვა სახის შემოსავლებითაა შესაძლებელი. "ტორპედოს" საჭირო კონდიციებამდე თუ მიიყვანენ, მერე მისით აუცილებლად დაინტერესდებიან. ვიმეორებ, თავის დროზე "ტორპედოში" სწორედ ეს შევძელით და ჩაჩავა ამიტომაც მოვიდა. სხვათა შორის, ვიცი კიდეც ხალხი, რომლებიც "ტორპედოთი" დაინტერესებულები არიან და აკვირდებიან, რა ხდება.

- საერთოდ, ბოლო დროს, ცუდი გათვლების გამო, ფინანსური პრობლემები ბევრ ქართულ გუნდს შეექმნა...
- ჩემი აზრით, ყველაფერს ერთი მარტივი გადაწყვეტილება მოაგვარებს - კლუბში სპონსორი რომ მიდის, საბანკო გარანტიები უნდა მოსთხოვონ და ბიუჯეტიც ამის მიხედვით უნდა შედგეს.  კლუბს 9-მილიონიანი ბიუჯეტი რომ აქვს და 11 მილიონზე მეტ ვალდებულებას პერსპექტიული შემოსავლების იმედად უგეგმავენ, ეს არასწორია. საბანკო გარანტიებით ასეთი რამ გამოირიცხება.

ყოველდღიური სპორტული გაზეთი "ლელო"
4618
მკითხველის კომენტარები / 2 /
Harumafuji
2
SeiZleba egeTi raRaceebi.mondomebaa saWiro.
ქუთაისელი
0
ეს გასულია ორბიტიდან!
მსგავსი ამბები
რუბრიკის სხვა სიახლეები
;