[ექსკლუზივი] ქართველ ფეხბურთელებზე მოთხოვნა არის და თან ძალიან დიდიც! ჩვენებურების აკადემია ყაზახეთის დედაქალაქში

"ლელომ" უკვე გაცნობათ იმის თაობაზე, რომ ყაზახეთის ქალაქ ჟეზკაზგანის საფეხბურთო აკადემიას ქართველი სპეციალისტი გელა კაკულია ხელმძღვანელობს. ჩვენ თავის დროზე შევეხმიანეთ მას და ინტერვიუც შემოგთავაზეთ. მაშინ კაკულიამ გვითხრა, რომ მალე აკადემიის გახსნა ყაზახეთის დედაქალაქ ასტანაშიც (ახლა უკვე ნურთსულთანში) იგეგმებოდა...

სიტყვა და საქმე ერთიაო, ზუსტად ამაზეა ნათქვამი. დღეს ყაზახეთის დედაქალაქში უკვე ფუნქციონირებს საფეხბურთო აკადემია, რომელსაც სათავეში სწორედ კაკულია უდგას. სანამ მასთან ვრცელ ექსკლუზიურ ინტერვიუს შემოგთავაზებდეთ, გადავხედოთ მის მიერ განვლილ საფეხბურთო გზას.

კაკულია მეკარე იყო და "შევარდენი 1906-ის" ღირსებას იცავდა. ტრავმის გამო საფეხბურთო კარიერა ნაადრევად დაასრულა. 19 წლის იყო, როდესაც მწვრთნელობა დაიწყო და მივიდა საფეხბურთო სკოლა "ირაოში".

სხვადასხვა დროს არაერთ ცნობილ მწვრთნელთან (კობა ჟორჟიკაშვილი, ნოდარ აკობია, გოჩა ავსაჯანიშვილი, თამაზ კოსტავა, გოჩა ტყებუჩავა...) უმუშავია, იყო "გაგრაში", სადაც ანატოლი პისკოვეცთან, დენის ხომუტოვსა და გაგა კირკიტაძესთან ერთადწევდა ჭაპანს, იყო კირკიტაძის ასისტენტიც. მუშაობდა 35- სკოლაში...

მოკლედ, გელა კაკულია ფეხბურთში შემთხვევითი კაცი არ არის. ახლა კი შეპირებული ინტერვიუ...

- ცოტა ხნის წინ ჩვენთან საუბრისას დააანონსეთ ყაზახეთის დედაქალაქში საფეხბურთო აკადემიის შექმნა. ეს აკადემია უკვე ფუნქციონირებს...

- მინდა, ძალიან დიდი მადლობა გადაგიხადოთ თემით დაინტერესებისთვის. საფეხბურთო აკადემიამ უკვე დაიწყო ფუნქციონირება. ძალიან დიდი მოტივაციით შევუდექით საქმეს. ამ დროისთვის გვყავს სამი ასაკის ბავშვთა ჯგუფი. ყველაზე დიდი ასაკის არიან 2004-05 წლებში დაბადებული ბავშვები...

- კიდევ ერთხელ შევახსენოთ მკითხველს, ვინ დგას "სპორტინგის" საფეხბურთო აკადემიის სათავეებთან, რომელიც ყაზახეთის დედაქალაქ ნურსულთანში ფუნქციონირებს...

- ეს ადამიანი რაულ ჭეჟიაა. რომ არა ის, ეს წამოწყება ხორცს ნამდვილად ვერ შეისხამდა. ძალიან კარგი ადამიანია, საქართველოს ნამდვილი პარტიოტი... მე და ის ნურსულთანში "სპორტინგის" აკადემიის თანადამფუძნებლები ვართ.

- იქაც "სპორტინგი" ჰქვია აკადემიას?

- კი, როგორც ჟეზკაზგანში, აქაც "სპორტინგი" დავარქვით.

- ინფრასტრუქტურაზეც გვითხარით...

- ჯერ არის საშუალება და ორი ასაკის გუნდი გარეთ ვარჯიშობს, ერთი კი - დარბაზში, სადაც ხელოვნური საფარია, უმაღლესი დონის. დარბაზს აქვს თანამედროვე გადახურვა. მალე აქ კიდევ უფრო აცივდება და ყველა ასაკი დარბაზში ივარჯიშებს. ახლო მომავალში აკადემია კიდევ გეგმავს გაფართოებას.

- ინფრასტრუქტურა არენდით გაქვთ აღებული?

- კი, არენდითაა აღებული...

- აკადემია ცენტრთან ახლოსაა?

- ძალიან ახლოს ვართ, მათ შორის - "ასტანა არენასთან". ზოგადად, ქალაქი ისეა გაშენებული, რომ გაყოფილია მარჯვენა და მარცხენა სანაპიროდ.

- უახლოესი ტურნირები როდის იქნება?

- დეკემბერში იწყება ძალიან მნიშვნელოვანი და წარმომადგენლობითი ტურნირი, რომელიც "ასტანა არენაზე" გაიმართება. ამ ტურნირში მონაწილეობას მიიღებენ როგორც ნურსულთანის, ისე ყაზახეთის სხვა ქალაქების საფეხბურთო კლუბები. ძალიან დიდი სურვილი გვაქვს, "სპორტინგის" აკადემიამ ამ ტურნირზე წარმატებით ითამაშოს. მეც მინდა, როგორც მწვრთნელი, მოვხვდე... ვთქვათ, "ასტანას" აკადემიაში და ამის რეალური შანსიც არის. გარდა ამისა, ალმათიშიც ვგეგმავთ გაზაფხულზე ტურნირში მონაწილეობას...

- ასე მცირე ხანში როგორ შეძელით ხალხის მიზიდვა?

- რეკლამა გავაკეთეთ მხოლოდ იმ დონეზე, რომ გავაკარით განცხადებები და სარეკლამო პლაკატები სტადიონთან ახლოს. აქ ყველა გვეხმარება, ფეხბურთის ფედერაციაც გვერდში გვიდგას... ზოგადად რომ შევხედოთ, აქაურ ბავშვთა ფეხბურთში არ არის ისეთი დონე, როგორიც საქართველოში. "ასტანაში" მუშაობს ერთი ყაზახი სპეციალისტი, ახალგაზრდა და ძალიან მონდომებული ბიჭია. დაინტერესდა ჩვენი ვარჯიშებით...

- ამჟამად რამდენ ბავშვს ავარჯიშებთ?

- სამოცი ბავშვია ამჟამად. კიდევ ვაპირებთ გაფართოებას. დროის ამბავია.

- ისე გამოვიდა, რომ ჟეზკაზგანის აკადემიას მოწყდით. იქ ვინ საქმიანობს?

- იქ ამჟამად რაულ ჭეჟიაა. რა თქმა უნდა, ყოველდღიური კომუნიკაციის რეჟიმში ვართ. ჟეზკაზგანის აკადემიაში გაცილებით მეტი ბავშვი ვარჯიშობს.

- ხომ არ ფიქრობთ რომელიმე ყაზახურ კლუბთან თანამშრომლობის მემორანდუმის გაფორმებას?

- კარგი კითხვაა. რა თქმა უნდა, ვფიქრობთ. მაგალითად, იყოს მწვრთნელების გაცვლა-გამოცვლა და ასე შემდეგ. მეც უკვე კარგა ხანია ფეხბურთში ვარ, 19 წელია... ექსკლუზიურად გეტყვით, რომ ჩვენ მზად გვაქვს ასეთი მემორანდუმი "ასტანასთან". მოგეხსენებათ, "ასტანა" ევროპალიგის მატჩს მართავს ჰოლანდიაში" და კლუბის ხელმძღვანელობა ჰოლანდიაშია. ჩამოვლენ და ჩვენს წინადადებას გავაცნობთ... ჩვენი აკადემიის მიზანია, რაც შეიძლება კარგ კლუბებში გავუშვათ ჩვენი ფეხბურთელები. არ მიყვარს საკუთარ თავზე ლაპარაკი, უბრალოდ, ვიტყვი - ჩემი აღზრდილი მოთამაშეები ასპარეზობენ საქართველოს ჩემპიონატის უმაღლესი ლიგის კლუბებსა და ეროვნულ ნაკრებში...

- ქართველი შეგირდი ყაზახეთშიც ხომ არ გყავთ?

- ყაზახეთში საქართველოს ელჩის, ზურაბ აბაშიძის ვაჟი - გიორგი ჩვენს სკოლაში დადის. 7 წლისაა...

- კიდევ ხომ არ არიან ქართველები?

- ჯერ არა, მაგრამ მოხარული ვიქნები, თუ იქნებიან...

- საერთოდ, ქართველ ფეხბურთელებზე თუ არის მოთხოვნა?

- რა თქმა უნდა, არის და თან ძალიან დიდიც! ქართველი ფეხბურთელი აქ დიდი ავტორიტეტია. ხშირად იხსენებენ აქ საქართველოს ნაკრების თამაშს, გიორგი ჩაკვეტაძეს... ძალიან მოსწონთ ის ტექნიკური ფეხბურთი, რომელიც სისხლში გვაქვს ქართველებს...

- ყაზახური საკლუბო ფეხბურთი ვითარდება. ესწრებით ხოლმე მან ჩემპიონატის თამაშებს?

- სულ რამდენიმე დღის წინ "ასტანასა" და "ქაირათის" მატჩს დავესწარი. დონე მართლაც მაღალია. სიმართლე გითხრათ, მე უფრო "ქაირათის" თამაში მომეწონა. შედარებით ტექნიკურ ფეხბურთს თამაშობენ. "ასტანას" უკრაინელი მწვრთნელი ჰყავს და უფრო ძალისმიერ ფეხბურთზე აქვთ აქცენტი.

1451
მკითხველის კომენტარები / 0 /
მსგავსი ამბები
რუბრიკის სხვა სიახლეები
;