[ექსკლუზივი] ჯაბა ჯიღაურმა გადაწყვიტა: ბათუმის დინამო საქართველოს ნაკრების ნახევარმცველს იმატებს

2016 წლის ივნისი. რამდენიმე წამში ჯაბა ჯიღაური საგოლე პასს მისცემს თორნიკე ოქრიაშვილს და ეს იქნება საქართველოს ნაკრების გამარჯვების გოლი ესპანეთთან საგარეო ამხანაგურ მატჩში


ჯაბა ჯიღაური, რომელმაც მცირე ხნის წინ ფრანგული კლუბი, ლიგა 2-ის ბინადარი "გრენობლი" დატოვა, კარიერას ბათუმის "დინამოში" გააგრძელებს. საქართველოს ნაკრების ნახევარმცველის შესახებ ინფორმაცია ბათუმელთა გენერალურმა სპონსორმა, არჩილ ბერიძემ დაგვიდასტურა.

ჯიღაური საქართველოს ჩემპიონატში თამაშს არ აპირებდა. მისი თქმით, 27 წლის ასაკში ეროვნული ნაკრების წევრისთვის ევროპაში თამაში აჯობებდა და რამდენიმე კლუბთან მოლაპარაკებაც ჰქონდა... მაგრამ, საბოლოოდ, ბათუმელებმა მას კარგი პირობები შესთავაზეს - ბერიძის თქმით, "დინამომ" ჯიღაურთან კონტრაქტი 2,5-წლით გააფორმა.

თავის დროზე, ჯიღაურს საფრანგეთში დამკვიდრების იმედი ჰქონდა, მაგრამ მწვრთნელი ძალიან მცირე დროს უთმობდა: ლიგა 2-ის 38 ტურში მან მხოლოდ 13 მატჩი ითამაშა, საიდანაც 12-ჯერ მოედანზე შესვლა სათადარიგოთა სკამიდან მოუხდა და მხოლოდ 278 წუთი ითამაშა.

"ქართველი ნახევარმცველი ჯიღაური "გრენობლში" აღარ ითამაშებს. გასული წლიდან მან თავი დაგვამახსოვრა როგორც ნიჭიერმა მოთამაშემ, მაგრამ ლიგა 2-თან ადაპტაცია ვერ მოახერხა და "გრენობლი" დატოვა", - წერდა ცოტა ხნის წინ ფრანგული გამოცემა grenoblefoot.info.

საქართველოს ეროვნულ ნაკრებში ჯიღაურს 2015 წლიდან იწვევენ და მისი მაისურით 10 მატჩიც ჩაატარა, მათ შორის, ესპანეთთან გასვლაზე მოგებულ ისტორიული თამაშიც, რომელშიც თორნიკე ოქრიაშვილს საგოლე პასი გაუკეთა.

გერმანული სამენეჯერო სააგენტო "ტრანსფერმარკტი" გამოცდილი ნახევარმცველის ტრანსფერის პირობით ღირებულებად 300 ათას ევროს ასახელებს.

საქართველოს ეროვნული ნაკრების ნახევარმცველმა კარიერა თბილისის "დინამოში" დაიწყო, უთამაშია საჩხერის "ჩიხურასა" და მაკედონიურ "ვარდარში", რომლის ფორმითაც ევროპალიგის ჯგუფურ ეტაპზეც მოსინჯა ძალები.

გიორგი ნავალოვსკის, ლევან გეგეჭკორის, ლადო დვალიშვილისა და მამუკა კობახიძის შემდეგ ჯიღაური ეროვნულ ნაკრებში ნათამაშები მეხუთე ფეხბურთელია, რომელიც კარიერას ბათუმის "დინამოში" გააგრძელებს.

2009
მკითხველის კომენტარები / 0 /
მსგავსი ამბები
რუბრიკის სხვა სიახლეები
;