[ექსკლუზივი ჰოლანდიიდან] როტერდამში ძველი დინამო ისევ ახსოვთ!

38 წელი არაფერია - როტერდამში ძველი "დინამო" ახსოვთ და რევანში წყურიათ!
თბილისის "დინამო" 38 წლის წინანდელი ისტორიის ხელახლა დაწერას ეცდება. მაშინ საქართველოს ყველაზე ტიტულიანმა კლუბმა თასების მფლობელთა თასის ნახევარფინალში სწორედ როტერდამის "ფეიენოორდი" დაამარცხა. თბილისში 3:0 მოვიგეთ. საპასუხო, გასვლით შეხვედრაში კი მსაჯის განსაკუთრებულ უნამუსობას გადავაწყდით, მაგრამ მაინც მოვიპოვეთ ფინალის საგზური, რომელშიც იენის "კარლ ცაისს" მოვუგეთ.

თანამედროვე "დინამოს" ჯერ არ აქვს ევროპული ტიტულის მოგების ამბიცია, თუმცა ევროპალიგის ჯგუფში მოხვედრას ცდილობს და ამ გზაზე მთავარ დაბრკოლებად სწორედ როტერდამული კლუბი მოჩანს.

რა თქმა უნდა, "ფეიენოორდი" წყვილის ფავორიტია, მაგრამ ქართული დელეგაცია როტერდამში დიდი იმედით გაემგზავრა. ამის საფუძველს თბილისური კლუბის ბოლოდროინდელი სათამაშო ფორმა იძლევა. საკმარისია აღინიშნოს, რომ ევროთასებზე ჩატარებულ ოთხ შეხვედრაში "დინამოს" ერთი გოლიც კი არ გაუშვია. გარდა ამისა, ფელის ვისენტეს გაწვრთნილი გუნდი შესანიშნავია საშინაო არენაზეც და თამაშებს ერთი ამოსუნთქვით იგებს. აგერ, ბოლო ტურში 6:0 აჯობა ძალიან კარგ ფორმაში მყოფ თბილისის "ლოკომოტივს".

ოპტიმიზმის საფუძველი გაგვიმყარა იმანაც, რომ აეროპორტში მისულებმა ძალიან სასიამოვნო ინფორმაცია შევიტყვეთ - ყველა დინამოელი ჯანმრთელად არის და საკადრო პრობლემები ჩვენს გუნდს არ აწუხებს, განსხვავებით მოწინააღმდეგისაგან... თუმცა ამაზე ქვემოთ. მხოლოდ აბდელ მეჯუბს აქვს მცირე ტრავმა, მაგრამ საგანგაშო არაფერია.
მოკლედ, თვითმფრინავში ძალიან კარგი, ოპტიმისტური განწყობა იგრძნობოდა. ჩავფრინდით ჰოლანდიაში, გავიარეთ საპასპორტო კონტროლი. ჟურნალისტთა ნაწილი სასტუმრო "ატლანტა როტერდამ ჰოტელში" დავბინავდით.

მოვწესრიგდით და ქალაქის დასათვალიერებლადაც მოვიცალეთ. "დინამო" კი სასტუმრო "დე როტერდამში" დაბინავდა. გუნდმა პირველ დღეს მსუბუქად ივარჯიშა, უფრო ზუსტად მხოლოდ დახარჯული ძალები აღიდგინა.

სწორედ სასტუმროში მოხდა ყველაზე დასამახსოვრებელი ეპიზოდი - "ფეიენოორდის" სტაჟიანი ქომაგი შეგვხვდა და 38 წლის წინანდელი შეხვედრა გაიხსენა. მან რამდენიმე ახალგაზრდა "გაანეიტრალა", ჩვენთვის "ფეიენოორდის" დიდი უპირატესობის დამტკიცებას რომ ცდილობდა. სხვათა შორის, სწორედ "ფეიენოორდის" სახელობის აეროპორტში დაფრინდა ჩვენი თვითმფრინავი და დავდგით თუ არა ფეხი როტერდამის მიწაზე, იმწამსვე რობინ ვან პერსის გამოსახულებიანი პლაკატი შემოგერფეთა...

ევროპის კულტურული დედაქალაქი
დინამოს" თან ახლავს 15 ჟურნალისტი, საქართველოს ფეხბურთის ფედერაციის წარმომადგენლები გენერალური მდივნის, დავით მუჯირის მეთაურობით, ასევე "დინამოს" გულშემატკივართა ნაწილი.

ჟურნალისტი და მოგზაურობა რას გაუყვია. ძირითადად, პროფესიულ საქმეზე და ისედაც ევროპის არაერთ ქალაქში ვყოფილვარ, მაგრამ გავრისკავ და ვიტყვი, რომ ბევრგან ასეთი სილამაზე და ნატიფი არქიტექტურით ნაშენები ქალაქი არსად მინახავს. რა თქმა უნდა, როტერდამი ვერ გაეჯიბრება სიძველით, ვთქვათ, რომსა და მის მთავარ მშვენება კოლიზეუმს, მაგრამ აქ ყველაზე ძალუმად შეიგრძნობა ევროპის სუნთქვა, თანაც ქალაქში ბევრია ძველი შენობები, რომლებიც მნახველზე დაუვიწყარ შთაბეჭდილებას ახდენს.

მთელი როტერდამი დასერილია საწყლოსნო არხებით. ეს ქალაქი მდებარეობს ჩრდილოეთის ზღვისა და მდინარე მაასის შესართავში. საკმარისია აღინიშნოს, რომ როტერდამი ევროპის უდიდესი პორტია. ადვილი წარმოსადგენია, როგორ მასშტაბებს აღწევს აქ ტვირთების გადაზიდვა.

ქალაქში 633,471 ადამიანი ცხოვრობს. საფეხბურთო კუთხით თუ შევხედავთ, რა თქმა უნდა, აქ ხალხის უმრავლესობა "ფეიენოორდის" გულშემატკივარია, მაგრამ როტერდამს კიდევ ჰყავს ორი ცნობილი კლუბი - "სპარტა" და "ექსელსიორი".
ქალაქს არაერთი ღირსშესანიშნაობა აქვს. მათ შორის უნდა გამოვარჩიოთ ერაზმუსის უნივერსიტეტი, მისივე სახელობის ხიდი, ულამაზესი, შემინული შენობა როტერდამის ცენტრში, რომელსაც "მარკჰოლი" ჰქვია.

ქალაქში ძალიან ბევრი რამ უკავშირდება ერაზმუს (ერაზმ) როტედამელის სახელს. რა თქმა უნდა, შუა საუკუნეების დიდ მოაზროვნესა და ჰუმანისტს ქართველი გულშემატკივრების წინაშე წარდგენა ნამდვილად არ სჭირდება.
ჩვენი სასტუმრო ქალაქის ცენტრში მდებარეობს და თავისუფლად შეიძლება ითქვას, რომ მართლაც ზღაპრულ სილამაზეში ვცხოვრობთ. ულამაზესია თუნდაც კუბების კოშკი, რომელიც დაუვიწყარ სანახაობას ქმნის.

თვალშისაცემია ველოსიპედისტების სიმრავლე. შეიძლება ითქვას, რომ ისინი უფრო მეტნიც კი არიან, ვიდრე ავტომანქანის მძღოლები. იქმნება შთაბეჭდილება, რომ როტერდამში ეს ტრანსპორტი ყველას ჰყავს...



მისი უდიდებულესობა დე კუიპი
"ფეიენოორდის" მთავარი სპორტული არენა 51,177 მაყურებელს იტევს. თამამად შეიძლება ითქვას, რომ ეს სტადიონი მიეკუთვნება ქალაქის ღირსშესანიშნაობათა რიგს. თავადაც გვინახავს ტელეეკრანის მეშვეობით და ახლაც დავრწმუნდით, რომ იქ შესანიშნავად ქომაგობენ.

ქალაქში უკვე შეიგრძნობა საფეხბურთო აჟიოტაჟი. ადვილი წარმოსადგენია, რა იქნება უშუალოდ თამაშის დროს. ასე რომ, "დინამოს" "ფეიენოორდის" ფეხბურთელების გარდა გუნდის მეთორმეტე მოთამაშესთან, ქომაგებთანაც მოუწევს გამკლავება.

როგორც გვითხრეს, განსაკუთრებულად მხურვალედ ქომაგობენ კლუბს ის გულშემატკივრები, რომლებიც ფეხზე მდგარნი ადევნებენ თვალს შეხვედრებს. სათქმელია, რომ "ფეიენოორდის" ქომაგები უკმაყოფილოები არიან გუნდში ბოლო დროს მიმდინარე პროცესებით. უკვე რამდენიმე სეზონია, "ფეიენოორდი" "აიაქსისა" და პსვ-ს ჩრდილშია და ეს ქომაგების აშკარა უკმაყოფილებას იწვევს.

პირველ დღეს მხოლოდ თვალი შევავლეთ ამ არენას, მეორე დღეს კი უშუალოდ "დავაჭაშნიკებთ" მაშინ, როცა საღამოს რვა საათზე (ჰოლანდიური დროით) "დინამო" ამ არენაზე ივარჯიშებს.

ლეგენდა
"ფეიენოორდში" სხვადასხვა დროს არაერთ დიდ ფეხბურთელს უთამაშია და კლუბის სათავეში არაერთი გამორჩეული მწვრთნელი მდგარა 1908 წლიდან, ანუ გუნდის დაარსებიდან, მაგრამ სადღეისოდ ყველაზე პოპულარული რობინ ვან პერსია.

ქალაქში "ფეიენოორდის" არაერთი გულშემატკივარი შეგხვდებათ რობინის მაისურით. სხვათა შორის, ვან პერსიმ საფეხბურთო კარიერა "ექსელსიორის" საფეხბურთო აკადემიაში დაიწყო და მერე გადაბარგდა "ფეიენოორდის" აკადემიაში. სხვადასხვა დროს ითამაშა "ფეიენოორდში", "არსენალში", "მანჩესტერ იუნაიტედში", "ფენერბახჩესა" და ისევ "ფეიენოორდში".

სხვათა შორის, ვან პერსის ერთი სეზონით რომ გადაედო კარიერის დასრულება, რასაც მას ძალიან ბევრი სთხოვდა, ის აუცილებლად დაუპირისპირდებოდა "დინამოს" და ეს 8 აგვისტოს გასამართ შეხვედრას კიდევ უფრო დიდ ინტრიგას შესძენდა.



მასპინძელთა წუხილი
რა თქმა უნდა, როტერდამში ფავორიტად "ფეიენოორდს" თვლიან, მაგრამ კარგად თუ დააკვირდები, მიხვდები, რომ მათი ოპტიმიზმი მთლად მყარი ვერაა. ჯერ ერთი, "სპარტასთან" შეხვედრამ ნათლად აჩვენა, რომ სეზონის დასაწყისში გუნდი იდეალურ ფორმაში ვერაა.

ეს ჩანდა "ფეიენოორდის" მიერ სეზონის დაწყების წინ გამართულ ამხანაგურ შეხვედრებშიც. ორ ფრონტზე ბრძოლა გუნდს ძალიან უნდა გაუჭირდეს. ამას ემატება ისიც, რომ ჯერ კაცმა არ იცის, რა გაქანების მწვრთნელია იაპ სტამი.

ყველაზე მეტად გულშემატკივრები იმაზე წუხან, რომ კლუბმა არც ამჯერად დახარჯა თანხა შემადგენლობის გასაძლიერებლად. ახალწვეული ნარსინგი თავის დროზე მართლაც შესანიშნავად თამაშობდა, მაგრამ დღეს ის აღარ არის, რაც პსვ-ში თამაშის დროს იყო.

ამინდი შესანიშნავია
როტერდამში შესანიშნავი ამინდია. არც ცივა და არც ცხელა. მოკლედ რომ ვთქვათ, ნაღდი საფეხბურთო ამინდია და მთავარია, ის 8 აგვისტოსათვის შენარჩუნდეს. რაც მთავარია, სინოპტიკოსები ცუდს არაფერს პროგნოზირებენ - შეიძლება, ოდნავ წამოწვიმოს და მორჩა.

ისე, როტერდამში ათასნაირად ჩაცმულ-დახურული ათასი ერისა თუ რჯულის ადამიანი დადის და ჩანს, რომ თუ გლობალიზაცია სადმე არის, ზუსტად აქ...



ზაზა დოლიძე: განწყობა ოპტიმისტურია!
მოკლე კომენტარი ვთხოვეთ თბილისური კლუბის გენერალურ დირექტორს, ზაზა დოლიძეს, ვინც შემდეგი გვითხრა:
"განწყობა ოპტიმისტურია. რა თქმა უნდა, ძლიერი მეტოქე გვყავს, მაგრამ ბოლომდე ვიბრძოლებთ სასურველი შედეგის მისაღწევად. გვახარებს ის, რომ ყველა ფეხბურთელი ჯანმრთელად არის." - გვითხრა.

6708
მკითხველის კომენტარები / 0 /
მსგავსი ამბები
რუბრიკის სხვა სიახლეები
;