ექსკლუზიური რეპორტაჟი ბელგრადიდან. შენგელიას მიმართვა გალა-დაჯილდოვებაზე

ევროლიგის ფინალური ოთხეულის ნახევარფინალური მატჩების შემდეგ გუნდებს დასვენება ჰქონდათ. სწორედ ამ დღეს, შაბათს გაიმართა გალა-დაჯილდოვება, რომელზეც ევროლიგის საუკეთესო კალათბურთელებს ჯილდოები გადასცეს.

სიმბოლურ ხუთეულში მოხვდა თორინკე შენგელია, ისიც დააფასეს, თუმცა ბელგრადში ვერ ჩამოვიდა, რადგან სწორედ შაბათს ესპანეთის ჩემპიონატის მატჩი ჰქონდა "ბურგოსთან", რომელშიც 16 ქულა ჩააგდო. სამაგიეროდ დიდ ეკრანზე მოვისმინეთ თორნიკეს ვიდეომიმართვა სამადლობელი სიტყვით.

ევროლიგის საუკეთესო კალათბურთელად ლუკა დონჩიჩი დასახელდა.

დაჯილდოების შემდეგ, რამდენიმე წუთში ბელგრადში ფოიერვერკები გამოჩნდა და ვიფიქრეთ ამ გალა საღამოს ნაწილი იყო, თუმცა ზუსტად ამ დროს აქაური "ცრვენა ზვეზდა" ფეხბურთში ოფიციალურად გახდა ჩემპიონი და ღამის ბელგრადი ცრვენას გულშემატკივრების ფოიერვერკად და მოუსვენარ ღამედ გადაიქცა.

ბელგრადის თითქმის ყველა უბანი "ცრვენას" გულშემატკივრების ხმაურმა მოიცვა. აქ მაცხოვრებლებს რომ ჰკითხო, ღამით ასეთი ხმაური კანონით ისჯება და მიუხედავად იმისა რომ ბევრ ბავშვს ღამის ძილი დაეფრთხო და ბევრი მანქანის სიგნალიზაცია აწრიპინდა, ხმაური გვიანობამდე მაინც გაგრძელდა.

არადა, აქ რომელიმე ოჯახმა ამ დროს ერთი მაშხალა რომ გაუშვას, პოლიცია ვალდებულია რეაგირება მოახდინოს. "ცრვენა ზვეზდას" ჩემპიონობა კი უკონტროლო შემთხვევაა.

"სტარკ არენაზე" ფინალის წინ პოლიციელთა უხვი მოზღვავებაა, თუმცა ინციდენტებს ყველა თავიდან ირიდებს. აქაურები ამბობენ, კიდევ კარგი ოთხთა ფინალში სერბული გუნდი არ გავიდა თორემ ასეთი სიმშვიდე არ იქნებოდაო. სამაგიეროდ თურქი გულშემატკივრები დარბაზს შიგნით ხმაურს საოცარ ელფერს სძენენ.

ფინალი 20 მაისს, კვირას საღამოსაა და ვნახოთ, ყვითლები აჯობებენ თუ თეთრები, "ფენერბაჰჩე" თუ "რეალი".

გიორგი ჭინჭარაული ბელგრადიდან სპეციალურად "ლელოსთვის"

1125
მკითხველის კომენტარები / 0 /
მსგავსი ამბები
რუბრიკის სხვა სიახლეები