ვაისის არჩევანი და მთავარი სადარდებელი

რა თქმა უნდა, არ წყდება კამათი იმის თაობაზე, თუ ვინ უნდა იყოს საქართველოს ეროვნული ნაკრების სიაში შვეიცარიასა და ირლანდიასთან მატჩებისთვის. ეს ძალიან კარგია, რადგან, ზოგადად, ფეხბურთს ძალიან უყვარს დახდება კამათი.

რა თქმა უნდა, ყველაფერ ამასთან დაკავშირებით ჩვენც გვაქვს საკუთარი მოსაზრება. უბრალოდ, დღევანდელ წერილში ყველანაირად ვეცდებით, გამოვიდეთ საკუთარი აზრის ტყვეობიდან და ფაქტებს მივცეთ შეფასება, რაც მხოლოდ და მხოლოდ ცივ გონებას ემყარება...

რატომ არ არის მთავარ სიაში ზარანდია?

ლუკა ზარანდია სანაკრებო სიაში არ არის, არის მხოლოდ გაფართოებულ შემადგენლობაში. არადა, ბევრი ელოდა, რომ "არკას" ქართველი ლიდერი, რომელსაც არაერთი წინადადება აქვს ევროპული კლუბებიდან, ვლადიმირ ვაისის რჩეულთა შორის მოხვდებოდა, მაგრამ მოხდა პირიქით.

რატომ გააკეთა ვაისმა ასეთი არჩევანი, ალბათ, მხოლოდ თავად იცის. ჩვენ კი ის ვიცით, რომ თავად ფეხბურთელი და მისი გულშემატკივრები მეტს ელოდნენ. ეს აშკარად ჩანს სოციალურ ქსელში...

ჩავწვდეთ მწვრთნელის არჩევანის არსს. თავიდანვე გავუსვათ ხაზი - თითქმის გამოვრიცხავთ, რომ წმინდა საფეხბურთოს გარდა, აქ რაიმე სხვა მიზეზი იყოს. ჩვენი აზრით, ვაისმა ამ შემთხვევაში აქცენტი შედარებით გამოცდილი ფეხბურთელების სასარგებლოდ გააკეთა.

არის კიდევ ერთი მომენტი: მოგეხსენებათ, დღევანდელ ფეხბურთში ლამის გამოკვეთილ ფორვარდსაც ევალება დაცვითი ფუნქციების შესრულება. როგორც ჩანს, სლოვაკმა სპეციალისტმა ჩათვალა, რომ ზარანდიაზე უკეთ ამ ფუნქციებს დღესდღეობით ის ფლანგელი ფეხბურთელები ასრულებენ, რომლებიც არიან ეროვნული გუნდის ძირითად შემადგენლობაში.

გარედან ასე ჩანს და რეალურად რას ფიქრობს ვაისი, ეს ყველაზე უკეთესად მას ეცოდინება. არადა, ზარანდია ახლა ძალიან კარგ ფორმაშია. მას შეუძლია, გაამწვავოს იერიში ფლანგზე და შეტევით ფაზაში არაერთი თავსატეხი შეუქმნას მოწინააღმდეგეს.

რატომ მხოლოდ კვასხვაძე?

საქართველოს ეროვნული ლიგიდიან ნაკრებში მხოლოდ ერთი ფეხბურთელია - ქუთაისის "ტორპედოს" კარის დარაჯი როინ კვასხვაძე. აქამდეც ასე იყო და, ვფიქრობთ, მომავალშიც ზუსტად ასე იქნება - სლოვაკი მწვრთნელი არ სწყალობს საქართველოს უმთავრეს საფეხბურთო ტურნირს.

ძალიან კარგად ვიცით, რომ ეროვნულ ლიგაში სანთლით არიან საძებარნი ისეთი ფეხბურთელები, საქართველოს ნაკრებს რომ გამოადგებიან, მაგრამ, ჩვენი აზრით, აუცილებელიც კი არის, ჩემპიონატიდან ეროვნულ გუნდში 2-3 ფეხბურთელი მაინც იყოს გამოძახებული.

მაგალითად, ირლანდიის ნაკრებში არცერთი ფეხბურთელი არ არის იქაური პრემიერ დივიზიონიდა მაგრამ ამას წლების განმავლობაში ყველა შეეჩვია. არადა, ისეთი ჩემპიონატიც არ გვაქვს, ვაისი ამის გამო კედელთან რომ მივაყენოთ.

აქ სადარდებელი სხვა რამეა - კარგად ჩანს, რომ საქართველოს ჩემპიონატი წინ ვერ მიდის, არადა, სახელმწიფოს მხრიდან დიდი ფული იხარჯება. რომელ წინსვლაზეა ლაპარაკი, როცა სანაკრებოდ სადაგი ორი ფეხბურთელის მოძებნაც კი შეუძლებელი ხდება...

და მაინც, ვაისს, ალბათ, თავისუფლად შეეძლო, ნაკრებში მიეწვია ამ ფორმაციის თბილისის "დინამოს" ლიდერი ლევან შენგელია. ლევანი კარგად ქმნის და კიდევ უფრო უკეთესად აგვირგვინებს, მაგრამ მას აქვს კიდევ ერთი ძვირფასი საფეხბურთო თვისება - არაფრისგან შეუძლია გოლის "გამოცხობა". თუ წამით იხელთა მომენტი, ეგრევე კარს უმიზნებს...

ბოლოს და ბოლოს, "საბურთალო" ქვეყნის ჩემპიონია და ალბათ უპრიანი იქნებოდა, თუნდაც საჩვენებლად მაინც ყოფილიყო ამ გუნდიდან ერთი ფეხბურთელი ნაკრებში, მაგრამ, მეორე მხრივ, როცა შედეგს გთხოვენ, საჩვენებელი რამეებისთვის ნაკლებად გცალია.

როგორ ვითამაშოთ?

შევთანხმდეთ - საქართველოს ნაკრებს ამ ეტაპზე არავინ მიიჩნევს ჯგუფის ფავორიტად. ეს გასაგებიცაა. ჯერ ერთი, ამაში რომ დარწმუნდე, ფიფას რეიტინგში წამით ჩახედვაც კი საკმარისია და მეორეც - ისეთ მეტოქეებთან გვიწევს საქმის დაჭერა, რომლებიც წლების განმავლობაში უხერხულად ითვლებიან საქართველოს ნაკრებისთვის.

როგორ უნდა ვითამაშოთ, როდის უნდა ვიყოთ "პირველი" და როდის - "მეორე ნომერი", ამის განსაზღვრა მწვრთნელის საქმეა, მაგრამ ჩვენც შეიძლება გვქონდეს რაღაც მოსაზრება.

მოგეხსენებათ, საქართველოს ეროვნულმა ნაკრებმა ერთა ლიგაზე ყველა შეხვედრა "პირველ ნომრად" ითამაშა. რა თქმა უნდა, ამ ტურნირზე ვაისის გაწვრთნილ გუნდს შედარებით სუსტი მეტოქეები ჰყავდა, მაგრამ რაოდენ ძლიერებიც უნდა იყვნენ შვეიცარია, ირლანდია და დანია, მაინც უნდა ვცადოთ "პირველ ნომრად" თამაში, თუნდაც ამან შედეგს ავნოს.

ჯერ ერთი, სად არის გარანტია, რომ "მეორე ნომრად" თამაში ამ მართლაც ურთულესი ჯგუფიდან გაგვიყვანს. მეორეც, არ უნდა დაგვავიწყდეს, რომ საქართველოს ნაკრები ორ ნაბიჯშია ევროპის ჩემპიონატთან. ერთა ლიგის ნახევარფინალში ბელარუსთან უდავოდ "პირველნომრობა" მოგვიწევს.

წესით, ასევე უნდა იყოს ფინალშიც. მართალია, ჩვენ არ ვიცით, რომელი გუნდი იქნება საქართველოს ნაკრების მეტოქე იქ, მაგრამ ისიც ცხადია, რომ იმ გადამწყვეტ შეხვედრაში ვერ დაველოდებით ბედის წყალობას და თავიდანვე უნდა ვაჩვენოთ ყველას, თუ ვინ არის ფავორიტი.

ყოველდღიური სპორტული გაზეთი "ლელო"
2096
მკითხველის კომენტარები / 2 /
ზაზა
0
ნეტავ ხვიჩა კვარაცხელიას სიაში შეყვანა ვინ ურჩია? კარგია და ძალიან კარგი და იქნებ სხვა ბიჭებძეც დამოძღვროს ან გააგებინოს ვინ რას წარმოადგენს...
თეიმურაზ რეხვიაშვილი
4
საქართველოს ნაკრების მწრთვნელი უნდა ცხოვრობდეს
საქართველოში ვაისი ცუდად იქცევა ის არა მარტო
ჩვენს ჩემპიონატს არ ადევნებს,არამედ არც რუსეთის
შვედეთის და პოლონეთის ჩემპიონატებს რადგან
დღეისათვის უძლიერეს მარცხენა მცველს გრიგალავას
არ ათამაშებს,რომელმაც ცსკა–ს მარტომ მოუგო საკვირველია ხარაიშვილის და ზარანდიას უგულვერყოფა,კიდევ დაკარგა 30 ბურთის გამტანი ნახ
ევარმცველი ბეგლარიშვილი ან თუ იწვევს ოქროაშვილს
რატომ არ იწვევს ჭანტურიას გაუგებარია,ალავიძე დაფრინავს და იწვევს კვასხაძეს რომელიც არ არის გო
ლიათი,აუცილებლად უნდა მოეწვიათ წიტაიშვილი,რომლის დაკარგვა ჯიქიასავით დანაშაული იქნება,რისთვის მივეცით მოქალაქეობა ვაჩეიშვილს ვაფრთხილებ კობიაშვილს ასე შორს ვერ
წავალთ
მსგავსი ამბები
რუბრიკის სხვა სიახლეები
;