ვაკო გვილია: ამაზე ლაპარაკი არ შემიძლია, რადგან ეს კონფიდენციალურია

ერთა ლიგის გათამაშება სექტემბერში დაიწყება. მანამდე ნახევარი წელია დარჩენილი, მაგრამ რეალურად, ეს ძალიან მცირე პერიოდია და ასეთ დროს საქართველოს ნაკრების თითოეული ფეხბურთელის მდგომარეობა ბევრს ნიშნავს.

ვაკო გვილიას ბოლოდროინდელი ამბები კი გულშემატკივარს ახარებს, რადგან ბორისოვოს ბატე-ში უთამაშებლობის შემდეგ შვეიცარიაში გადასული საქართველოს ნაკრების ნახევარმცველი "ლუცერნშიც" ერთ-ერთ საკვანძო მოთამაშედ ყალიბდება...

მატჩის ბედი გადაწყვიტა...

"ლუცერნმა" შვეიცარიის სუპერლიგის 25-ე ტურში "ბაზელს" 1:0 მოუგო. საქართველოს ნაკრების ნახევარმცველმა ახალ გუნდში პირველი გოლი გაიტანა. შეგახსენებთ, "ბაზელი" ჩემპიონთა ლიგის მიმდინარე გათამაშების პლეი ოფში გავიდა, საიდანაც "მანჩესტერ სიტიმ" გამოაგდო, თუმცა ევროპის ერთ-ერთ საუკეთესო გუნდს გასვლაზე მაინც მოუგო (0:4, 2:1).

დავუბრუნდეთ შვეიცარიის სუპერლიგას. საქართველოს ნაკრების ფეხბურთელმა გამარჯვების გოლი 46-ე წუთზე გაიტანა. მისი და პასკალ შურპის დუეტი ამჯერადაც საუკეთესო იყო - თუკი წინა ტურში შურპმა ქართველის პასით გაიტანა, ახლა როლები გაიცვალა - გვილიამ შვეიცარიელის ფლანგური გადაცემა დააგვირგვინა.

უცნაურია, რომ "ბლიკ სპორტმა" ტურის სიმბოლურ ნაკრებში შეიყვანა საგოლე გადაცემის ავტორი შურპი, ხოლო ამ გოლის გამტანისთვის რჩეულებს შორის ადგილი ვერ გამონახა. სამაგიეროდ, სიმბოლურ ნაკრებში გვილია ზედიზედ მესამედ დაასახელა შვეიცარიაში ყველაზე პოპულარულმა საფეხბურთო გამოცემამ "ველოუფუტბოლმა".

"ლუცერნცაიტუნგმა" კი მატჩის მიმოხილვაში ყურადღება გუნდის ახალ პლეიმეიკერზე გაამახვილა. შურპს 5,5 ქულა დაუწერა, ხოლო გვილიას გუნდში ყველაზე მაღალი შეფასება არგუნა - 6 ქულა, რაც ასე დაასაბუთა: "თამაშობდა მწვავედ და "ლუცერნის" მაისურით თავისი პირველი გოლი გაიტანა".

მოვძებნეთ ის, ვინც გვჭირდებოდა

"ამ საინტერესო და დაძაბული მატჩის ბედი "ლუცერნში" ამ ზამთარს ჩარიცხულმა ვაკო გვილიამ გადაწყვიტა. გუნდის ახალმა პლეიმეიკერმა ფანებს მისცა ნიშანი, რომ ფეხბურთელები გაემხნევებინათ.

ეს ისეთი სიხარული იყო, რომელიც "ლუცერნის" სტადიონს დიდი ხანია არ განუცდია. გვილიამ შურპის გადაცემა ცივსისხლიანად გამოიყენა. ბურთის ფლობაში უპირატესობა "ლუცერნს" ჰქონდა - 60 პროცენტი. იმიტომ, რომ მათ რიგებში იყო გვილია, რომელმაც იცის, სიღრმიდან როგორ ითამაშოს.

ისევე, როგორც "სიონთან" წინა კვირის შეხვედრისას, ქართველი "ლუცერნში" ამჯერადაც ერთ-ერთი საუკეთესო იყო. ბელარუსული ბატე-ს შემდეგ გვილია ახალ გუნდში თავს ძალიან კარგად გრძნობს", - წერს "ლუცერნცაიტუნგი".

ამავე გამოცემამ 23 წლის ქართველის კომენტარიც გამოაქვეყნა: "ახალ გუნდში ძალიან კარგად მიმიღეს. ისეთი შეგრძნება მაქვს, თითქოს, აქ უკვე მრავალი წელია, ვთამაშობ. "ლუცერნის" მაისურით გატანილი პირველი გოლი ჩემთვის ბევრს ნიშნავდა".

კომენტარი გააკეთა "ლუცერნის" მთავარმა მწვრთნელმა ხერარდ სოიანომაც: "გვილიამ გუნდს სწორედ ის შემატა, რაც აქამდე ძალიან გვაკლდა. ქართველი შემოქმედებითი მოთამაშეა.

მას მშვენიერი პასები გამოსდის. ამავე დროს, გვილიას "სტანდარტები" ყოველთვის სახიფათოა, დღეს კი იდეალური იყო. თუმცა ჩვენ ამ წარმატებით არ უნდა დავკმაყოფილდეთ და შრომა გავაგრძელოთ".

სხვათა შორის, ბატე-ს პრეზიდენტ ანატოლი კაპსკის გუნდიდან წასული ქართველის სიტყვებზე განმარტების გაკეთება მოუხდა, თითქოსდა, მისი მითითებით არ ათამაშებდნენ. კაპსკიმ ტელეკომპანია "ბელარუს 5-ის" გადაცემაში - "ფეხბურთის დრო" - საკმაოდ ღვარძლიანი კომენტარი გააკეთა:

"ყველაფერი უნდა დაემტკიცებინა გუნდში და მოედანზე. მაშინ ერთი იმასაც ამტკიცებდა, რომ მას ლამის იტალიაში იწვევდნენ თუ რაღაც მსგავსს. იმ მოთამაშეების გასაგონად ვიტყვი, რომლებიც ბატე-ში მოვლენ ან ახლა არიან გუნდში: შემადგენლობის შედგენაში არასდროს ჩავრეულვარ. ეს მწვრთნელის სფეროა და იმედია, ყოველთვის ასე იქნება".

გვილიამ ბელარუსულ გამოცემა "ტრიბუნასთან" ძალიან საინტერესო და ვრცელ ინტერვიუში კაპსკიზეც ილაპარაკა და ყოფილ მთავარ მწვრთნელ ალექსანდრ ერმაკოვიჩზეც. მას ასევე ჰკითხეს, თუ რა თანხის საფასურად გაუშვა ის ბატე-მ "ლუცერნში":

"2017 წლის ბოლოს მრჩებოდა შთაბეჭდილება, რომ ისინი დამცინოდნენ. ერმაკოვიჩი შანსი მოცემას მპირდებოდა, მაგრამ რეალურად მისი საქციელი სხვა რამეზე მეტყველებდა.

მივხვდი, მათთან ლაპარაკს აზრი არ ჰქონდა. მაგრამ გულში ბოღმა არ დამრჩენია - მათ მადლობაც კი უნდა ვუთხრა, რადგან ბატე-ში მიმიწვიეს და გარკვეულწილად, მათივე დამსახურებაა, "ლუცერნში" და უკეთეს ლიგაში რომ მოვხვდი. შვეიცარიაში ბევრად სწრაფი ტემპი და უკეთესი საფეხბურთო გარემოა.

სხვათა შორის, ბატე-ში ყოფნისას გავრცელდა ინფორმაცია, თითქოს ჩემით ბუნდესლიგის გუნდები დაინტერესდნენ. ზოგიერთი გაზეთი პირდაპირ შხამს ანთხევდა.

ირონიულად მეკითხებოდნენ, როდის მიდიხარ გერმანიაშიო... რაც შეეხება სატრანსფერო პირობებს, ამაზე ლაპარაკი არ შემიძლია, რადგან ეს კონფიდენციალურია. ბორისოვოს გუნდთან კონტრაქტი მხოლოდ ერთი წლის შემდეგ მიმთავრდებოდა".

გვილიას თქმით, ახალ გუნდში თბილად მიიღეს, მაგრამ არსებობს ენობრივი ბარიერი: "გუნდშიც თბილად მიმიღეს და ვგრძნობ, მწვრთნელიც კარგად მიყურებს. თუმცა, არის მცირე ენობრივი ბარიერი, რადგან გუნდში უმთავრესად გერმანულად ლაპარაკობენ. მე კი მწვრთნელი ინგლისურად მელაპარაკება.

მაგრამ გერმანულის სწავლა მსურს, თანაგუნდელებთან ურთიერთობა რომ გავიადვილო. ამიტომ, უკვე დავდივარ რეპეტიტორთან. მსურს, რომელიმე ტოპლიგის გუნდში მოვხვდე. ეს კი შვეიცარიის ჩემპიონატიდან გაცილებით ადვილია".

ყოველდღიური სპორტული გაზეთი "ლელო"
1998
მკითხველის კომენტარები / 0 /
მსგავსი ამბები
რუბრიკის სხვა სიახლეები
;