ვაკო გვილია პოლონურ გრანდში გადავიდა - 2 წლით ლეგიაში!

საქართველოს ნაკრების ნახევარმცველი ვაკო გვილია, ვინც დანიასთან მატჩში საგოლე პასით გამოიჩინა თავი, კარიერას პოლონურ გრანდში გააგრძელებს. მისი ახალი კლუბი ვარშავის “ლეგიაა”, რომელთანაც 24 წლის ნახევარმცველმა 2-წლიანი კონტრაქტი გააფორმა.

გვილიამ სეზონი პოლონურ “გურნიკში” (ზაბჟე) დაასრულა, სადაც შვეიცარიული “ლუცერნიდან” იყო განათხოვრებული. “გურნიკში” გვილია გუნდის ერთ-ერთი ლიდერი გახლდათ, რაც “ლეგიას” ხელმძღვანელობას შეუმჩნეველი არ დარჩენია. ახალ გუნდში ის 8-ნომრიანი მაისურით ითამაშებს.

“გურნიკიდან” გვილიას წამოსვლის ამბავი გუშინ დილით გავრცელდა: “ზაბჟეს “გურნიკში” ორი ფეხბურთელის თავგადასავალი დასასრულს უახლოვდება. ვაკო გვილია და დანი სუარესი ახალი სეზონიდან პოლონეთის 14-გზის ჩემპიონს აღარ დაეხმარებიან”, - წერდა “გურნიკის” ვებგვერდი. 

გვილიას ტრანსფერი შვეიცარიულ “ლუცერნს” ეკუთვნოდა, პოლონეთში კი იჯარით თამაშობდა. “გურნიკის” პრესსამსახურთან გვილიას წასვლის მიზეზებზე კლუბის სპორტული განყოფილების კოორდინატორმა არტურ პლატეკმა ილაპარაკა.

“ვალერიან გვილია ზაბჟეში კარიერის გაგრძელებას არ აპირებს. ქართველი ჩვენს კლუბში შვეიცარიული “ლუცერნიდან” ზამთარში გადმოვიდა. ვაკომ რამდენიმე დღის წინ განაცხადა, რომ მომავალ გეგმებთან დაკავშირებით პასუხს მალე გვეტყოდა. მან “გურნიკისგან” კარგი ახალი კონტრაქტი მიიღო, მაგრამ ის ჯერ კიდევ “ლუცერნის” ფეხბურთელია. საღამოს მან გვითხრა, რომ ჩვენი კლუბის შეთავაზებას არ მიიღებდა. ჩვენ ამისთვის მზად ვიყავით, თუმცა მის გადაწყვეტილებაზე არანაირი ზეგავლენის მოხდენა არ შეგვეძლო. აქედან გამომდინარე, ჩვენ მოლაპარაკებებს ვაწარმოებდით იმ ფეხბურთელებთან, რომელთაც ქართველის წასვლით შექმნილი ვაკუუმის შევსება შეუძლიათ”.

თავად გვილიამ კი “ლუცერნერცაიტუნგთან” გულისტკივილი არ დამალა. მისი თქმით, ამ კლუბისგან სათანადო ინტერესსა და ყურადღებას ვერ გრძნობდა.
“ მინდა, დავტოვო ეს გუნდი. ლუცერნი კარგი ქალაქია, მაგრამ არ მინდა, იქ ტურისტად დავბრუნდე. ხუთი თვეა, რაც იჯარით პოლონეთში ვიყავი და შვეიცარიიდან თითქმის არავინ დამლაპარაკებია. პოლონეთში ჩემს თამაშებსაც არავინ აკვირდებოდა და არავინ მეხმიანებოდა. ასეთი დამოკიდებულებით იმედგაცრუებული ვარ”.

შვეიცარიული გამოცემის ცნობით, ბოლოს გვილიას “ლუცერნის” სპორტული დირექტორი რემო მეიერი დაუკავშირდა, რომელსაც ქართველმა უთხრა: “მსურს, კლუბი დავტოვო, რადგან პოლონეთში ექსტრაკლასას ორი წამყვანი კლუბი მიწვევს”.

ყოველდღიური სპორტული გაზეთი "ლელო"
1535
მკითხველის კომენტარები / 0 /
მსგავსი ამბები
რუბრიკის სხვა სიახლეები
;