ვალერი ლიპარტელიანის პირველობას არაფერი ემუქრება

დიუსელდორფში გამართულმა გრანდ სლემმა ცვლილებები შეიტანა ძიუდოისტთა მსოფლიოს რეიტინგში.

ახალ რეიტინგში 90 კილოგრამში ლიდერობა დაკარგა ბექა ღვინიაშვილმა, მაგრამ, სამაგიეროდ, გერმანიაში გამარჯვებამ და ამისთვის მიღებულმა 1 000-მა ქულამ გაალიდერა ვალერი ლიპარტელიანი (100). ახლა მის ანგარიშზე 5 800 ქულაა, ცხრილში კი ადგილი გაუცვალა ჰოლანდიელ მიხაელ კორელს (5761).

უახლოეს მომავალში ეს სხვაობა კიდევ უფრო გაიზრდება ქართველის სასარგებლოდ, რადგან მალე კორელი ქულებს დაკარგავს: მას გაუნულდება ორი წლის წინ თბილისში მოპოვებული 36 ქულა, მოგვიანებით კი იგივე ბედი ეწევა ბუდაპეშტში მოპოვებულ ქულებსაც (წლის თავზე მოპოვებული ქულები ნახევრდება, ხოლო ორი წლის შემდეგ საერთოდ უქმდება).

აი, ლიპარტელიანი ამ პერიოდში არაფერს არ დაკარგავს, რადგან არც გამოსულა ტურნირებზე, ხოლო სადაც იჭიდავა - ორი წლის წინ პარიზში, იმისი ქულები უკვე დაკლებული აქვს. ამიტომ მალე კიდევ უფრო გაუსწრებს მდევარს. სხვები კი ლიდერებს ბევრად ჩამორჩებიან.

რეიტინგში ღვინიაშვილის დაქვეითება მოსალოდნელიც იყო, რადგან მას აკლდებოდა წინა წლების ანალოგიურ პერიოდში მოპოვებული ქულები, თვითონ კი გერმანიაში არ ჭიდაობდა.

მას ლიდერობას გამოსვლა და მორიგი წარმატება შეუნარჩუნებდა, მაგრამ ერთი, რომ ის ტრავმას იშუშებს და გამოჯანმრთელებას ვერანაირად ვერ ასწრებდა და მეორეც: სამწვრთნელო შტაბმა არც დაუგეგმა იქ ჭიდაობა და ვფიქრობთ, სამართლიანადაც, რადგან ევროპის ჩემპიონატისთვის ინდივიდუალურად ამზადებენ.

ახლა მთავარი სწორედ ეს შეჯიბრებაა, ლიდერობას კი სხვა ტურნირებზე წარმატებით დაიბრუნებს. რეიტინგი კარგია და მას აქვს გარკვეული უპირატესობები: შეჯიბრებებზე ხვდები განთესილებში; ფინანსურადაც მიმზიდველი რეალობაა, მაგრამ მთავარი მაინც ოფიციალური შეჯიბრებებისთვის კარგად მომზადებაა.

ამიტომ რეიტინგს ყურადღება უნდა მივაქციოთ - ამაზეა დამოკიდებული ლიცენზიების მოპოვებაც - მაგრამ არც ზედმეტი გამოკიდება და უფრო დიდი მიზნების გაწირვა ღირს.

უმეტეს წონებში ისევ მოწინავეთა შორის ვართ. ამასთან, ზოგან ერთი საფეხურითაც წავიწიეთ წინ. ასეთი წონა სულ ორია: 60 და 90. პირველში ამირან პაპინაშვილი დაწინაურდა, მეორეში - უშანგი მარგიანი იმის მიუხედავად, რომ არ უჭიდავიათ გერმანიაში - მათ წინ მდგომებს დააკლდათ წინა წლების ქულები.

60-ში გერმანულმა ბრინჯაომ 5 ადგილით დააწინაურა ლუხუმ ჩხვიმიანი, ვინც მე-17 პოზიციამდე აღზევდა.
66-ში ვაჟა მარგველაშვილი, ხოლო 73-ში ლაშა შავდათუაშვილი თითო საფეხურით დაქვეითდნენ.

მძიმე წონაში სტატუსკვო უცვლელია: ევროპის ჩემპიონი გურამ თუშიშვილი ისევ ინარჩუნებს მეორე ადგილს, პირველი კი კვლავაც ბრაზილიელი დავიდ მოურაა, მესამეზე - ლეგენდარული და დაუმარცხებელი ფრანგი ტედი რინერი, ვინც იშვიათად ჭიდაობს და ამიტომ დათმო ლიდერობა.

ერთ დროს ჩვენთვის საუკეთესო წონად მიჩნეული 81 კილოგრამი ახლა ერთადერთია, სადაც 8 განთესილში არავინ გვყავს. ჩვენგან საუკეთესო კვლავაც ზებედა რეხვიაშვილია, თუმცა ამჯერად ორი ადგილით უკანაა - მე-14 საფეხურზე. 6 პოზიციით დაქვეითდა ნუგზარ ტატალაშვილი - 59-ე, ამასობაში კი მას თამაზ კირაკოზაშვილმაც გადაუსწრო დიუსელდორფში მარცხის მიუხედავად.

60 კგ.
1. რიუჯუ ნაგაიამა (იაპონია) - 5 080
2. ნაოჰისა ტაკატო (იაპონია) - 4 550
3. რობერტ მშვიდობაძე (რუსეთი) - 4 238
5. ამირან პაპინაშვილი (საქართველო) - 3 557
17. ლუხუმ ჩხვიმიანი (საქართველო) - 2 075

66 კგ.
1. ტალ ფლიკერი (ისრაელი) - 4 616
2. ჰიფუმი აბე (იაპონია) - 4 000
3. ვაჟა მარგველაშვილი (საქართველო) - 3 633
26. ლაშა გიუნაშვილი (საქართველო) - 1 236

73 კგ.
1. სოიჩი ჰაშიმოტო (იაპონია) - 6 650
2. რუსტამ ორუჯოვი (აზერბაიჯანი) - 5 338
3. ოდბაიარ განბაატარი (მონღოლეთი) - 4 898
5. ლაშა შავდათუაშვილი (საქართველო) - 4 007

81 კგ.
1. ფრანკ დე ვიტი (ჰოლანდია) - 4 530
2. ხასან ხალმურზაევი (რუსეთი) - 4 500
3. საეიდ მოლაე (ირანი) - 4 443
14. ზებედა რეხვიაშვილი (საქართველო) - 2 194
55. თამაზ კირაკოზაშვილი (საქართველო) - 576
59. ნუგზარ ტატალაშვილი (საქართველო) - 612

90 კგ.
1. ალექსანდარ კუკოლი (სერბეთი) - 4 361
2. ბექა ღვინიაშვილი (საქართველო) - 4 320
3. ნიკოლოზ შერაზადიშვილი (ესპანეთი) - 4 087
11. უშანგი მარგიანი (საქართველო) - 2 741

100 კგ.
1. ვალერი ლიპარტელიანი (საქართველო) - 5 800
2. მიხაილ კორელი (ჰოლანდია) - 5 761
3. მიკლოშ ცირიენიჩი (უნგრეთი) - 4 209

+ 100 კგ.
1. დავიდ მოურა (ბრაზილია) - 5 565
2 გურამ თუშიშვილი (საქართველო) - 4 760
3. ტედი რინერი (საფრანგეთი) - 3 550
18. ადამ ოქრუაშვილი (საქართველო) - 1 936
22. ლევან მატიაშვილი (საქართველო) - 1 488

ყოველდღიური სპორტული გაზეთი "ლელო"
1173
მკითხველის კომენტარები / 0 /
მსგავსი ამბები
რუბრიკის სხვა სიახლეები
;