ყველაფერში ვანდაა დამნაშავე! კასანო იკარდის ცოლის წინააღმდეგ

ანტონიო კასანო, ახლო წარსულის ჭირვეული ვარსკვლავი, რომელსაც ფეხბურთი მაღალ დონეზე უნდა ეთამაშა, "ინტერის" ფორვარდ მაურო იკარდის ცოლსა და აგენტს, ვანდა ნარას - იტალიურ შოუბიზნესში ერთობ გავლენიან ქალბატონს უტევს. 

კასანო, რომელსაც თავის დროზე "ინტერშიც" უთამაშია, თოქშოუ "ტიკი ტაკაში" იყო მიწვეული, სადაც ლაპარაკი ჩამოვარდა იკარდიზეც. მისი აზრით, არგენტინელ ფორვარდთან დაკავშირებულ სკანდალურ სიტუაციაში მთავარი დამნაშავე სწორედ ვანდაა, რომელიც, ნებსით თუ უნებლიედ, ქმრისთვის მთავარ დაბრკოლებად იქცა. აი, რა თქვა კასანომ:

"ადამიანი, რომელმაც ეს ყველაფერი გამოიწვია, არის ვანდა. ეს არის ნამდვილი კატასტროფა! იკარდის ყველა პრობლემა სწორედ ვანდას ბრალია. მისი წყალობით მაუროს გარშემო ნიადაგი ვეღარ არის მყარი. ვანდა, თქვენ ძალიან ბევრს ლაპარაკობთ! თქვენ მწვრთნელიც ხართ? ძალიან ბევრს და ცუდად იყენებთ სოციალურ ქსელებს...

თუკი "ინტერის" ხელმძღვანელობამ იკარდის კაპიტნის სამკლაური ჩამოართვა, ესე იგი ამისთვის სერიოზული მიზეზი ჰქონდა. არა მგონია, აუზილიო, მაროტა და სპალეტი ერთ დღეს გაგიჟდნენ...

როცა კაპიტნობა ჩამოართვეს, მაშინ ასტკივდა მუხლი? 21 წლისა მეც ვიყავი ასეთი თეატრალური. თუ მან ისევ არ დაიწყო თამაში "ინტერში", აუცილებლად წავა, ანუ სიტუაცია ჩიხურია. რეალობა ისაა, რომ იკარდის კონტრაქტთან დაკავშირებით ვლაპარაკობთ უკვე 4 თვეა და ეს ყველაფერი სწორედ ვანდას დამსახურებაა...

თავის დროზე სპალეტიმ ვიცეკაპიტნობა მომცა "რომაში". მაშინ 20 წლის ვიყავი. ჯერ იყო ტოტი, მერე - მე. სპალეტიმ მაშინ ისიც მითხრა, რომ მეტს ვერ მივიღებდი, რადგან არ ვიყავი მაინცდამაინც კარგი მაგალითი თანაგუნდელებისთვის. მართალი იყო მაშინ მწვრთნელი და თუ დღეს მსგავსი სიტუაციაა, ესე იგი მას აქვს საამისო მიზეზი", - ასკვნის კასანო.

1093
მკითხველის კომენტარები / 0 /
მსგავსი ამბები
რუბრიკის სხვა სიახლეები
;