ვან დაიკი რესტორანში თეფშებს რეცხავდა, დღეს ყველაზე ძვირფასი მცველია

...ათი წლის წინ ის რესტორანში თეფშებს რეცხავდა, დღეს კი მსოფლიოს ყველაზე ძვირფასი მცველია. ვირჯილ ვან დაიკის გზა მართლაც ზღაპარს ჰგავს. "ლივერპულის" გულშემატკივრები ჯერ კიდევ მაშინ ელოდნენ მის ყიდვას, როცა ის "საუთჰემპტონის" ღირსებას იცავდა...

ბრიტანული მედია ბოლო დროს განსაკუთრებით ინტერესდება ვირჯილ ვან დაიკის პირადი ცხოვრების დეტალებით. მაგალითად, ფეხბურთელის ბიძამ (დედის ძმა) სენსაციებზე დახარბებულ ინგლისურ პრესას არ დაამადლა და უთხრა, რომ ვან დაიკის მამამ ისე მიატოვა ოჯახი, წარბიც არ შეუხრია.

შვილი მამის მიმართ არაფერს გრძნობს. მას "ლივერპულის" მაისურაზე აწერია "ვირჯილ" - გვარის გარეშე.

ზოგადად, ირკვევა, რომ ვან დაიკის მამა, რონ ვან დაიკი, კარგი ადამიანია. მაგრამ იყო გულღია, ეს არ ნიშნავს, იყო კარგი მამაც. პირველი ოჯახის დანგრევის შემდეგ უფროსმა ვან დაიკმა მალევე შექმნა მეორე ოჯახი. ქალმა ქმარს ხელი მაგრად მოუჭირა. ის მას შვილის ნახვას მხოლოდ იშვიათად თუ ანებებდა.

ვირჯილის მამა ბოლო 20 წლის განმავლობაში საერთოდ არ შეცვლილა. ის ისევ ბრედაში ცხოვრობს. აყენებს სატელევიზიო მოწყობილობებს და ყურადღებით ადევნებს თვალს შვილის კარიერას.

მას შემდეგ, რაც ვირჯილი ოფიციალურად გადავიდა "ლივერპულში", მამამ "ტვიტერზე" დაწერა, რომ ამაყობს ვაჟით. ვირჯილის უმცროსმა ძმამ კი, ჯორდანმა, განაცხადა, რომ მამას ვირჯილზე საუბრის უფლება საერთოდ არ აქვს.

მამამ თავი ასე იმართლა: "ბავშვებს დედის მხარე ამუშავებს. მათ საერთოდ არ აინტერესებდათ, ვინ იყო ვირჯილი, სანამ ის არ გახდა პროფესიონალი ფეხბურთელი. რა გამოდის? დედის მხარე მასში მხოლოდ ფულს ხედავდა. მე კი ზუსტად ვიცოდი, ვინ იქნებოდა ის და როგორ განვითარდებოდა მისი კარიერა".

მთელი ბავშვობა ვან დაიკმა მამასა და დედას შორის მოგზაურობაში გაატარა. როცა ის მამამ წაიყვანა აღსაზრდელად, თითქოს ბედნიერი იყო, მაგრამ, საბოლოო ჯამში, იქაც ვერ გაძლო და დედას დაუბრუნდა.

"საუთჰემპტონში" თამაშისას ვირჯილმა მამა ერთ-ერთ თამაშზე დაპატიჟა. უფროსმა ვან დაიკმა მიწვევა არ მიიღო, რაკი ჩათვალა, რომ შვილი ამას მხოლოდ მოვალეობის მოხდის მიზნით აკეთებდა.

ამის შემდეგ შვილსა და მამას შორის პატარა ხიდიც კი ჩაინგრა. ვირჯილმა ცოტა ფული რომ იშოვა, უმალვე დედას ბრედაში დიდი სახლი უყიდა.

50 წლის ელენი სურინამში დაიბადა. ის პოლიციაში მუშაობდა და თან სამ შვილს ზრდიდა. ვან დაიკის პირველი მწვრთნელის თქმით, ვირჯილის დედა ყველაფერს აკეთებდა იმისთვის, რომ შვილი კარგად აღეზარდა. ის არასოდეს ისვენებდა.

ვირჯილი სიღარიბეში იზრდებოდა. საკმარისია, აღინიშნოს, რომ 16 წლის ბიჭი რესტორანში მოეწყო სამუშაოდ. იქ თეფშებს რეცხავდა და საათში 2,5 ფუნტს გამოიმუშავებდა.

"75 მილიონი! როცა ეს ციფრი გავიგე, კინაღამ წავიქეცი. ეს ჩემთვის აბსოლუტური მოულოდნელობა იყო. მე კარგად მახსოვს, როგორ შრომობდა ის ჩვენს რესტორანში", - ამბობს იმ რესტორნის მფლობელი, რომელშიც ვან დაიკი მრეცხავად მუშაობდა.

"სულ ვეუბნებოდი, რომ დარჩენილიყო აქ, რადგან აქვე შეჭამდა და არ ექნებოდა დაძინების პრობლემა. ძალიან კეთილსინდისიერი ბიჭი იყო. უაღრესად პატიოსნად რეცხავდა ჭურჭელს და არასოდეს ცდილობდა, თავი იოლად დაეძვრინა", - ესეც რესტორნის მეპატრონის სიტყვებია.

ბავშვობის მწვრთნელები იგონებენ, რომ თავიდან ვან დაიკი დიდი ვერაფერი ფეხბურთელი იყო, მაგრამ თავდაუზოგავი შრომით მიაღწია იმას, რომ ბევრმა მასზე დაიწყო ლაპარაკი. ამას არც თავად უარყოფს.

"ძალიან ცუდი ვიყავი ტილბურგის "ვილემის" სკოლაში. ყველაზე პატარა გახლდით. იყო ერთი რამ, რამაც მაგრად მიშველა. რომ არა ეს ფაქტორი, ნამდვილად არ ვიცი, საერთოდ რა მეშველებოდა", - იხსენებს ვან დაიკი და საინტერესოა, რას გულისხმობს?

გულისხმობს იმას, რომ სიმაღლეში ძალიან სწრაფად გაიზარდა. მისი პირველი კონტრაქტი "გრონინგენში" შედგა. ვირჯილი გაჭირვებით თამაშობდა, რადგან მუცლის მწვავე ტკივილებს უჩიოდა. ექიმები ტაბლეტებს აძლევდნენ, მაგრამ ფეხბურთელს ასე დიდხანს გაძლება აღარ შეეძლო.

"ექიმებმა ამიღეს შარდის ანალიზი, მაგრამ ვერაფერი ნახეს. მეორე დღეს ძლივს მივედი საავადმყოფოში. ტკივილისგან ვტიროდი. მითხრეს, რომ საჭირო იყო ოპერაცია".

აპენდიციტს აბსცესი დაერთო და ბიჭი კინაღამ დაიღუპა. საბოლოო ჯამში ვან დაიკი ექიმების პროფესიონალიზმმა გადაარჩინა. ეგ იყო, 15 კილოგრამი დაკარგა და ძალიან გაუჭირდა, როცა ვარჯიშს დაუბრუნდა.

საბოლოოდ, ყველაფერი ისე მოხდა, როგორც კეთილ ზღაპარში. ვან დაიკი მიიჩნევს, რომ ამაში ღმერთის ხელი ურევია.

"ადრე ყოველ კვირას დავდიოდი ეკლესიაში. შეიძლება, ახლა ამას ძველებურად ხშირად ვეღარ ვახერხებ, მაგრამ სისტემატურად კი ვლოცულობ. ეს ძალიან მეხმარება რთული სიტუაციების დროს", - ამბობს ვირჯილი.

მის მეუღლეს რიკი ჰქვია. ვან დაიკმა ერთადერთხელ თქვა უარი ჰოლანდიის ნაკრებში მიწვევაზე. ეს იყო მაშინ, როცა საყვარელმა მეუღლემ ბავშვი აჩუქა.
"ჩემი ცხოვრება არის ფეხბურთი.

ხშირად ვლოცულობ ჩემი ოჯახისთვის, ჩემი მეგობრებისთვის, უბრალოდ, კეთილი ხალხისთვის. ვფიქრობ, ყოველთვის ვიქნები იქ, სადაც ჩემს საყვარელ ხალხს სჭირდება.

ჩვენი ცხოვრება ხანმოკლეა და თითოეული ჩვენგანი უნდა ეცადოს, მაქსიმალურად დაიხარჯოს საყვარელი ადამიანებისთვის. ეს, უბრალოდ, აუცილებელია. ჩემთვის ამაზე უკეთესი ცხოვრებისეული რეცეპტი არ არსებობს.

არის ხოლმე დღეები, როცა ყველაფერი ძალიან ცუდადაა, მაგრამ არ უნდა დაკარგო იმის რწმენა, რომ ხვალ უთუოდ იქნება უკეთესობა. მთავარია, გჯეროდეს".

ყოველდღიური სპორტული გაზეთი "ლელო"
5160
მკითხველის კომენტარები / 1 /
S.K.K
0
ვირჯილმა ცოტა ფული რომ იშოვა, უმალვე დედას ბრედაში დიდი სახლი უყიდა!!!!!!!!!!!!!!!!!!! Ha-ha-ha...............................................
მსგავსი ამბები
რუბრიკის სხვა სიახლეები
;