ვარსკვლავები, რომლებიც მუნდიალს მიღმა დარჩნენ

კარსმომდგარ მსოფლიოს ჩემპიონატს არაერთი ვარსკვლავი დააკლდება. ზოგი მათგანის ნაკრები მუნდიალზე ვერ მოხვდა, ზოგი მწვრთნელმა დაიწუნა... მოდი, ვნახოთ, ვინ არიან ის ფეხბურთელები, რომლებიც რუსულ მუნდიალს ნამდვილად დაამშვენებდნენ...

იან ობლაკი
ატლეტიკო/სლოვენია

მსოფლიოს ერთ-ერთი საუკეთესო მეკარე. 2002 და 2010 წლებში სლოვენიელებმა მუნდიალებზე კი ითამაშეს, მაგრამ ბოლო შესარჩევი ციკლი ჩააგდეს. მიმდინარე სეზონში ბალკანელი დიდებული იყო "ატლეტიკოში" და გუნდთან ერთად ევროპალიგაც მოიგო. ზაფხულში არ გამორიცხავენ მის ტრანსფერს "ლივერპულში".

ანტონიო ვალენსია
მანჩესტერი/ეკვადორი

ჟოზე მოურინიო სისტემატურად ათამაშებს ეკვადორელს ძირითად შემადგენლობაში. ვალენსიას უკვე დაუცავს მუნდიალზე მშობლიური ქვეყნის ღირსება. მან ეკვადორის ნაკრების შემადგენლობაში 92 შეხვედრა ჩაატარა. შესარჩევ ციკლში ის გუნდის ერთ-ერთი საკვანძო ფეხბურთელი იყო.

ვირჯილ ვან დეიკი
ლივერპული/ჰოლანდია

2014 წელს ჰოლანდიის ნაკრები მესამე იყო ბრაზილიურ მუნდიალზე. ნიდერლანდელებმა ჩააგდეს ბოლო შესარჩევი ციკლი და რუსეთში ვერ ითამაშებენ. მას შემდეგ, რაც სარეკორდო ტრანსფერის შემდეგ ვირჯილ ვან დეიკი "საუთჰემპტონიდან" "ლივერპულში" გადავიდა, უმალ იურგენ კლოპის გუნდის ერთ-ერთ საკვანძო მოთამაშედ იქცა.

ლეონარდო ბონუჩი
მილანი/იტალია

გასულ ზაფხულს "იუვენტუსიდან" "მილანში" გადასვლის შემდეგ ის გვარიანად გააკრიტიკეს. ის რჩება მსოფლიოს ერთ-ერთ საუკეთესო ცენტრალურ მცველად. არჩევანი კი ვერ გამოუვიდა ზუსტი, რადგან "მილანი" ჩემპიონთა ლიგაში ვერ მოხვდა, მისმა ყოფილმა კლუბმა კი "ოქროს" დუბლი შეასრულა. ბონუჩიმ სრულად ითამაშა შვედეთთან ორივე საპლეიოფო მატჩი, რის შემდეგაც "სკუადრა აძურა" მუნდიალის გარეშე დარჩა.
დავიდ ალაბა
ბაიერნი/ავსტრია

თავის პოზიციაზე ერთ-ერთი საუკეთესოა მსოფლიო ფეხბურთში. ავსტრიის ნაკრებმა ევროპის წინა ჩემპიონატზე კი ითამაშა, მაგრამ ახლა ვეღარ გავიდა მსოფლიოზე. დავიდ ალაბა ნებისმიერი ნაკრებისთვის სასურველი ფეხბურთელი იქნებოდა.

რიად მაჰრეზი
ლესტერი/ალჟირი

"მანჩესტერ სიტი" ამ ფეხბურთელის სანაცვლოდ 65 მილიონი ფუნტის გადახდას აპირებს და ამით ყველაფერია ნათქვამი. ალჟირი ბოლო ორ მუნდიალზე იყო, მაგრამ ამჯერად "ტრადიცია" დაირღვა. ქომაგს აშკარად მოგვაკლდება რიად მაჰრეზის ფლანგური რეიდები.

მარკო ვერატი
იტალია/პსჟ

იტალიური ფეხბურთის ერთ-ერთი საუკეთესო წარმომადგენელი. "პესკარას" საფეხბურთო აკადემიის პროდუქტმა სულ მალე მიიპყრო ყველას ყურადღება. 2012 წლიდან "პარი სენ-ჟერმენის" ღირსებას იცავს. ძალიან განიცადა იტალიის ნაკრების წარუმატებლობა. ისღა დარჩენია, მოთმინებით დაელოდოს პარიზული გრანდის ახალი ბოსის, თომას ტუხელის გაცნობას.

ლეროი სანე
მანჩესტ. სიტი/გერმანია

იოახიმ ლიოვმა ყველა გააოგნა, როცა მუნდიალს მიღმა დატოვა 22 წლის ლეროი სანე, პრემიერლიგის ბოლო სეზონის საუკეთესო ახალგაზრდა ფეხბურთელი. პეპ გვარდიოლას "ჯილას" "ლევერკუზენის" ახალგაზრდა "ვინგერი" იულიან ბრანდტი ამჯობინეს.

გარეთ ბეილი
რეალი/უელსი

"რეალის" უელსელი გარემარბი რა ძალასაც წარმოადგენს, ეს მან ნათლად გვიჩვენა ჩემპიონთა ლიგის ფინალში. საიდუმლო არავისთვისაა, რომ გარეთ ბეილმა უდიდესი წვლილი შეიტანა "ლივერპულის" დამარცხებაში. უელსის ნაკრები ევროპის ბოლო ჩემპიონატის მთავარი აღმოჩენა იყო, თუმცა გუნდი მუნდიალზე ვერ გავიდა.

ქარიმ ბენზემა
რეალი/საფრანგეთი

2015 წლის შემდეგ აღარ უთამაშია ეროვნულ გუნდში. მაშინ ის ყველასთვის ცნობილ სკანდალში გაეხვია, რომელიც მატიე ვალბუენას უკავშირდება. ამის შემდეგ მას აღარ იწვევენ ნაკრებში. ის ღიად დაუპირისპირდა საფრანგეთის ფეხბურთის მამებს, რომლებმაც საბოლოოდ დაუკეტეს ნაკრების კარი.

პიერ-ემერიკ ობამეიანგი
არსენალი/გაბონი

გაბონის ნაკრებს არასოდეს უთამაშია მსოფლიოს ჩემპიონატზე და გამონაკლისი არც ამჯერად მომხდარა. იანვარში პიერ-ემერიკ ობამეიანგი 55 მილიონ ფუნტად გადავიდა "დორტმუნდიდან" "არსენალში".

სათადარიგოები: ჯანლუიჯი დონარუმა (მილანი/იტალია), ემერიკ ლაპორტი (სიტი/საფრანგეთი), ალექს სანდრო (იუვენტუსი/ბრაზილია), რაჯა ნაინგოლანი (სიტი/ბელგია), მირალემ პიანიჩი (იუვენტუსი/ბოსნია), ალექსის სანჩესი (მანჩესტერი/ჩილე), მაურო იკარდი (ინტერი/არგენტინა).

ყოველდღიური სპორტული გაზეთი "ლელო"
1712
მკითხველის კომენტარები / 0 /
მსგავსი ამბები
რუბრიკის სხვა სიახლეები
;