ვარსკვლავთცვენა სლოვენიაში: ბოისა და ევროპული ელიტა, კიდევ ერთხელ მოედანზე

სლოვენიაში მსოფლიოს ვარსკვლავები შეიკრიბებნენ. მათ შორის იყო ვლადიმერ ბოისა, საქართველოს კალათბურთელთა ნაკრების ექს-ფორვარდი, რომელმაც კარიერა 2014 წელს დაასრულა და ამჟამად საქართველოს კალათბურთის ფედერაციის ვიცე-პრეზიდენტია.

ლიუბლიანის "შტოჟიცე არენაზე" თანავარსკვლავედის შეკრების მიზეზი ბოსტიან ნახბარი და სანი ბეჩიროვიჩი იყვნენ. ისინი კალათბურთიდან საზეიმო ვითარებაში გააცილეს. შედგა მეგობრული დაპირისპირება მათ გუნდებს შორის.

ვლადიმერ ბოისა სანი ბეჩიროვიჩის კრებულში მოხვდა. ასეთი იყო გუნდის სრული შემადგენლობა: ფრაგისკოს ალვერტისი, პერო ანტიჩი, დალიბორ ბაგარიჩი, მარკო ბელინელი, ვლადიმირ ბოისა, პრიმოჟ ბრეჟეცი, პრიმოჟ ბროლიჰი, ლუიჯი დატომე, როდრიგო დელა ფუენტე, დიმიტრის დიამანტიდისი, იურიცა გოლემაცი, ჟასმინ უკიჩი, ვლადო ილიევსკი, შარუნას იასიკიევიჩუსი, სლავკო კოტნიკი, საშა პავლოვიჩი, მიროსლავ რადულიცა, მატიაშ სმოდიში.
მწვრთნელები: მემი ბეჩიროვიჩი, საშა ჯორჯევიჩი, დიმიტრის იტუდისი, ტონე კრუმპი, ჟელკო ობრადოვიჩი.

ბოსტიან ნახბარის გუნდი: ბორის გორენცი, გორან იაგოდნიკი, ნენად კრსტიჩი, იაკა ლაკოვიჩი, ერაზემ ლორბეკი, მარკო მილიჩი, რაშო ნესტეროვიჩი, სმილიან პავიჩი, იგორ რაკოჩევიჩი, უროშ სლოკარი, ზორან პლანინიჩი, ბენო უდრიხი, სამო უდრიხი, ნიკოლა ვუიაჩიჩი, ირჟი ველში.
მწვრთნელები: ზორან მარტიჩი, გრეგა ნახბარი, ალეს პიპანი, ზმაგო საგადინი.

მატჩი მეგობრული ანგარიშით დასრულდა - 100:100. ბომბარდირი დღის გმირი სანი ბეჩიროვიჩი გახდა. მის ანგარიშზე 32 ქულა დაფიქსირდა. ბოსტიან ნახბარმა 20 ქულა ჩააგდო.

სლოვენიაში დავუკავშირდით მატჩის მონაწილე ვლადიმერ ბოისას:

- სასიამოვნო საღამო იყო. ნახბარმა და ბეჩიროვიჩმა მართლაც საუკეთესო კალათბურთელები შეკრიბეს, ვის გვერდითაც უთამაშიათ. მათ გარდა, ვინც მოედანზე იყო, საღამოზე კიდევ უამრავი მოთამაშე მიიწვიეს. ჩემთვის დიდი პატივი იყო ბეჩიროვიჩის გუნდის მაისურით გასვლა. ეს ჩემი და საქართველოს დაფასებაცაა.

- რამდენი წუთი ითამაშეთ?

- ათზე ნაკლები. თითო გუნდში იმდენი კალათბურთელი იყო, დრო ნამდვილად არავის ეყოფოდა. მხოლოდ ნახბარმა და ბეჩიროვიჩმა ითამაშეს ბოლომდე. სხვათა შორის, ისინი ამ მატჩისთვის განსაკუთრებულად ემზადებოდნენ, ბევრს ვარჯიშობდნენ და ფორმაშიც იყვნენ. მე ძველებურ კონდიციებში აღარ ვარ და მეორე ტაიმში თავად ვთხოვე მწვრთნელს არ შევეყვანე. იმიტომაც, რომ სხვას მეტი დრო დარჩენოდა.

- ბევრ ძველ ნაცნობ-მეგობარს შეხვდებოდით...

- იმდენი კალათბურთელი და მწვრთნელი იყო, თამაშის შემდეგ წვეულებაზე ყველასთან მისალმებაც კი ვერ მოვახერხე. სასიამოვნოა, მათთან შეხვედრა, ვისთანაც არაერთი ბრძოლა გამომივლია, ძველი, საინტერესო ამბები გავიხსენეთ. ნახბარმა და ბეჩიროვიჩმა საგანგებოდ სააგენტოს შეუკვეთეს ამ ღონისძიების ორგანიზება. ყველაფერი იდეალურად იყო.

- გაცილების მატჩს თქვენც გეგმავდით...

- ახლა უკვე დაგვიანებულია. მინდოდა საქართველოში გამემართა, მაგრამ ძალიან ძნელია ასეთ მანძილზე კალათბურთელების მოპატიჟება. ხარჯებს რომ თავი დავანებოთ, მათ საკუთარი გრაფიკები აქვთ და საქართველოში რომ ჩამოვიდნენ, სამი დღე მაინც სჭირდებათ თავის მგზავრობიანად. სლოვენიელებისთვის ყველაფერი მარტივადაა: ნახბარისა და ბეჩიროვიჩის გაცილების მატჩზე ზოგი მეზობელი ხორვატიიდან ჩამოვიდა მანქანით, ზოგი სერბეთიდან, ზოგი იტალიიდან...

კიდევ ერთხელ დავრწმუნდი, რომ გაცილების მატჩი აუცილებელია. ვურჩევ ვიქტორ სანიკიძეს, რომ ორგანიზება გაუკეთოს ასეთ ღონისძიებას. კალათბურთის გულშემატკივარს იგი ძალიან უყვარს და დარწმუნებული ვარ, მის გაცილებაზე ბევრი ქომაგი მოვა.

ყოველდღიური სპორტული გაზეთი "ლელო"
1059
მკითხველის კომენტარები / 0 /
მსგავსი ამბები
რუბრიკის სხვა სიახლეები
;