ვარსკვლავი: ჯერ ოქროს ბუცი, მერე კონტრაქტი

ლიონელ მესის ოფიციალურად გადასცეს ევროპის "ოქროს ბუცი", რომელიც მან 2016/17 წლების სეზონის საუკეთესო ბომბარდირობისთვის მიიღო. პრიზი მას თანაგუნდელმა ლუის სუარესმა გადასცა.

ლეომ ლა ლიგაში 34 მატჩში 37 გოლი გაიტანა. მან 74 ქულა მიიღო. მეორე ადგილზე გავიდა ლისაბონის "სპორტინგის" ფორვარდი ბას დოსტი (34 გოლი) - 68 ქულა. მესამე ადგილზე გავიდა პიერ-ემერიკ ობამეიანგი (დორტმუნდი) - 31 გოლი, 62 ქულა.

არგენტინელი ევროპის საუკეთესო ბომბარდირი აქამდე სამჯერ გახდა - 2010, 2012 და 2013 წლებში. მესი 4 "ოქროს ბუცით" კრიშტიანო რონალდოს გაუთანაბრდა.

"ინდივიდუალური პრიზები არასდროს არ არის ერთი ფეხბურთელის დამსახურება. ეს მთლიანად გუნდის დამსახურებაა. ჩემი პარტნიორების გარეშე როგორ მოვახერხებდი ამდენი გოლის გატანას? ეს პრიზი მათ მომაგებინეს", - განუცხადა არგენტინელმა "მარკას".

* * *
მეორე დღეს მოხდა ის, რასაც ამდენ ხანს ელოდნენ "ბარსას" ქომაგები - როგორც იქნა, ლიონელმა ახალი კონტრაქტი გააფორმა "ბარსელონასთან". 30 წლის შემტევმა გუნდს ბედი 2021 წლამდე დაუკავშირა. ძველი კონტრაქტი კი 2018 წლის ზაფხულში სრულდებოდა. ახლა არგენტინელის გამოსასყიდი თანხა 700 მილიონი ევროა. ლიონელმა "ბარსას" მაისურით 602 მატჩში 523 გოლი გაიტანა ("ვალენსიასთან" თამაშამდე).

კატალონიურ კლუბში იგი 8-ჯერ გახდა ესპანეთის ჩემპიონი, 4-ჯერ მოიგო ჩემპიონთა ლიგა, 5-ჯერ კოპა დელ რეი, 7-ჯერ ესპანეთის სუპერთასი, 3-ჯერ ევროპის სუპერთასი და 3-ჯერ მსოფლიოს საკლუბო ჩემპიონობა. ლეომ 5-ჯერ მოიგო "ოქროს ბურთი".

ხელმოწერის შემდეგ მესიმ აღნიშნა, რომ იგი დიდი სიამოვნებით დაასრულებს კარიერას "ბარსელონაში".

ყოველდღიური სპორტული გაზეთი "ლელო"
980
მკითხველის კომენტარები / 0 /
მსგავსი ამბები
რუბრიკის სხვა სიახლეები
;