ვახტანგ ჭანტურიშვილი სლოვაკეთის ჩემპიონია - 'ჩვენ ისტორია დავწერეთ'

45-წლიანი პაუზის შემდეგ სლოვაკური "ტრნავა" კვლავ გახდა ჩემპიონი, ოღონდ, ბოლოს ეს ჩეხოსლოვაკიის სახელით მოხდა.

ჩემპიონობაში დიდი წვლილი შეიტანა ვახტანგ ჭანტურიშვილმა, ვინც პირველივე სეზონში ბოლომდე შეეწყო იქაურ ლიგას, გაიტანა არაერთი მნიშვნელოვანი გოლი და საგოლე პასებიც ჩამოარიგა.

გუშინ "ლელო" სლოვაკეთში დაუკავშირდა ჭანტურიშვილს და ინტერვიუ ჩაწერა.

- ვახტანგ, თავდაპირველად გილოცავთ სლოვაკეთის ჩემპიონობას...

- დიდი მადლობა. ძალიან ბედნიერი ვარ. აქ ისეთი ამბები მოხდა, რომ რა ვიცი... ბავშვი, ქალი... ყველა ქუჩაში იყო, ყველა ერთად ზეიმობდა ამ დიდ წარმატებას. ძალიან დიდი ზეიმი იყო, სახალხო ზეიმს რომ უწოდებენ, ისეთი.

- ფაქტია, ბევრისთვის მოულოდნელად გუნდი მთელი სეზონის განმავლობაში ლიდერობდა სლოვაკეთის პირველობაზე. ეს შემთხვევით ვერ იქნებოდა...

- დიახ, ასე იყო. თუ არ ვცდები, მხოლოდ ერთხელ მოხდა სეზონში, როცა ლიდერი შეიცვალა. რომ იტყვიან, ჩემპიონატი ერთი ამოსუნთქვით ჩავატარეთ.

- რას იტყვით სლოვაკეთის ჩემპიონატზე? რამდენად არის იქ შესაძლებელი ფეხბურთელის პროგრესი?

- მერწმუნეთ, აქ ყველანაირი საშუალებაა ფეხბურთელის ზრდისთვის. განსაკუთრებით ზედა ექვსეულის მატჩებისას შეიმჩნეოდა მაღალი დონე. არაერთი გუნდია ისეთი, რომელსაც, შეიძლება, "მაღალი დონის" ვუწოდოთ.

თუნდაც, "სლოვანი" და "ტრენჩინი" ავიღოთ. სლოვაკურ კლუბებში არაერთი ისეთი ფეხბურთელია, რომელთაც ჰქონდათ კარგი კარიერა და ახლაც შესანიშნავ ფორმაში არიან.

- "ტრნავა" არ მიეკუთვნება სლოვაკური ფეხბურთის ტრადიციულ გრანდებს. ალბათ, ეს ჩემპიონობა ამადაცაა განსაკუთრებული...

- შეიძლება, თამამად ითქვას, რომ ჩვენ ისტორია დავწერეთ. 45 წელია, გუნდი არ გამხდარა ჩემპიონი. ჩვენ ეს შევძელით და სწორედ ამიტომ იყო ამხელა აჟიოტაჟი და ზეიმი, რომელიც დღესაც გრძელდება.

- მაინც, რამ განაპირობა "ტრნავას" გამარჯვება?

- შეიძლება, პარადოქსულ რამეს ვამბობ, მაგრამ, ჩემი აზრით, ბევრი ახალი ფეხბურთელი რომ დაგვემატებინა, გაჭირდებოდა ამ შედეგის მიღწევა. გუნდი ძალიან შეკრულია, მართლა ერთი დიდი ოჯახია.

ცხადია, ეს ძალიან მნიშვნელოვანი ფაქტორია. იყო თამაშები, რომელიც ჩვენ, ამ სიტყვის სრული მნიშვნელობით, ხასიათის ხარჯზე მოვიგეთ. არაერთ ისეთ შეხვედრას გავიხსენებ, როცა მოწინააღმდეგეს გამარჯვება ბოლო წუთებზე გამოვგლიჯეთ.

ცაკლე უნდა ვთქვა ჩვენი გუნდის მთავარი მწვრთნელის, სერბი ნესტორ ელ მაესტროს შესახებ. ის ძალიან კარგი სპეციალისტია. სულ რაღაც 35 წლისაა. მისი წვლილი ჩემპიონობაში უდიდესია.

- ჩემპიონთა ლიგაში რა მიზანს დაისახავთ?

- ჯერ ასე კონკრეტულად არ გვილაპარაკია მიზნებზე. ფაქტია, ისეთი აჟიოტაჟი მოჰყვა ამ ჩემპიონობას, ლიგაში მხოლოდ მონაწილეობის მიზნით არ ვიქნებით. ჯერ ემოციები ისევ არ გაციებულა.

- ალბათ, გუნდი გაძლიერდება...

- ნებისმიერი გუნდი ცოცხალი ორგანიზმია და ცვლილებები გარდაუვალია. რა ცვლილებები იქნება გუნდში, ამას ყველა ერთად ვნახავთ სეზონის დასრულების შემდეგ.
- თავად რას აპირებთ?

- კლუბთან 1+1 სისტემით მაქვს კონტრაქტი გაფორმებული. ჩემპიონთა ლიგაში მეორედ ვითამაშებ და ეს ჩემთვის დიდი პასუხისმგებლობაა. სიმართლე გითხრათ, ახლა მხოლოდ ჩემპიონთა ლიგაზე ვფიქრობ.

სხვათა შორის, სლოვაკეთის ჩემპიონატის ბოლო ტურში წითელი ბარათი მიიღეთ, რომელიც მერე გაუქმდა...

არაფერ შუაში არ ვიყავი. კურიოზული სიტუაცია მოხდა. მსაჯს სხვა ფეხბურთელში შევეშალე. ეპიზოდი რომ მოხდა და რომ მოტრიალდა მსაჯი, მოწინააღმდეგე გუნდის მოთამაშე მინდორზე იწვა და ჩათვალა, რომ მე ვიყავი დამნაშავე. ნახეს ვიდეოფირი და, რა თქმა უნდა, სასჯელი გამიუქმეს.

ყოველდღიური სპორტული გაზეთი "ლელო"
1733
მკითხველის კომენტარები / 1 /
რიგითი ფანი
0
წარმატებები მინდა ვუსურვო ,,შეუჩერებელ" ვახტანგ ჭანტურიშვილს. ძალიან მახარებს მისი და ზოგადად ქართველი ფეხბურთელების მიღწევები,(სამწუხაროდ, ქართულ ფეხბურთში არდანახულების) რომლებიც სხვათა კლუბებში ,, ისტორიებს წერენ" და ლიდერობას არ თმობენ.
მსგავსი ამბები
რუბრიკის სხვა სიახლეები
;