ვენტურა წავიდა, ანჩელოტის მოდის? ხელმოცარულმა მწვრთნელმა იტალიას ერთხელაც დასცინა

სადღეისოდ მსოფლიო ფეხბურთის ყველაზე აქტუალური თემა იტალიის ნაკრებთან დაკავშირებული სიახლეებია. მას შემდეგ, რაც "სკუადრა აძურა" ვერ გავიდა მსოფლიოს ჩემპიონატზე, გუნდის მომავალი ყველა მედიასაშუალების განხილვის საგანია.

მაშ ასე, რა მოხდა გუშინ იტალიის ნაკრების ირგვლივ...

...ამიტომ დაისაჯა იტალია!
ანდრეა დ'ამიკომ, დომენიკო კრიშიტოსა და სებასტიან ჯოვინკოს აგენტმა განაცხადა, რომ "სკუადრა აძურა" მისი კლიენტების უგულებელყოფის გამო დაისაჯა.

"არ მესმის, რა გახდა იმის მიზეზი, რომ იტალიის ნაკრებში არ ეძახდნენ ჯოვინკოსა და კრიშიტოს. არადა, ორივე ფეხბურთელს ჰქონდა შესანიშნავი მატჩები და მწვრთნელის მხრიდან ეს მოითხოვდა დაფასებას. მე არ ვარ ის ადამიანი, ვინც იტალიურ ფეხბურთში მომხდარს მხოლოდ ვენტურას აბრალებს, მაგრამ ფაქტია, ჩვენ ნაბიჯ-ნაბიჯ მივდიოდით ამ შედეგამდე და ბოლოს რაც მივიღეთ, არ უნდა გაგვიკვირდეს", - თქვა მან.

დინო ძოფი: ვენტურამ სელექცია არ იცის
"რა თქმა უნდა, დიდი ტრაგედიაა, როცა მსოფლიოს ჩემპიონატს პირველად აცდენ 60 წლის შემდეგ. რას ვიზამთ, დროს ვერავინ და ვერაფერი შეაჩერებს. ფაქტია, ეს არის შავი დღე იტალიური ფეხბურთის ისტორიაში და ჩვენ ყველანი უბედურები ვართ.

არ მინდა, ყველაფერში მწვრთნელი გამოვიყვანო დამნაშავედ, მაგრამ ფაქტია, რომ ვენტურამ შეცდომები დაუშვა სელექციის კუთხით და ჩვენ ამ შეცდომების გამო ვართ დღეს იქ, სადაც ვართ", - თქვა იტალიური ფეხბურთის ცოცხალმა ლეგენდამ, დინო ძოფმა.

ვენტურა: ჩემი შედეგები ერთ-ერთი საუკეთესოა ბოლო 40 წელიწადში
კომენტარი გააკეთა იტალიის ნაკრების აწ უკვე ყოფილმა მწვრთნელმა ჯან პიერო ვენტურამ, რომელიც გუშინ ოფიციალურად დაითხოვეს თანამდებობიდან. მანამდე კი ხელმოცარულმა მწვრთნელმა თქვა, რომ მისი ხელმძღვანელობით იტალიის ნაკრებს საუკეთესო შედეგები ჰქონდა ბოლო 40 წლის განმავლობაში. აი, მისი კომენტარი:

"მე ახლა არ ვილაპარაკებ იმაზე, შევწყვეტ თუ არა კონტრაქტს. ამისთვის ბევრი თავისუფალი დრო მექნება და შედეგს ყველა ნახავთ. ეს არ არის ასე უცბად გადასაწყვეტი საკითხი და მსჯელობა სჭირდება. მე ბოდიშს ვიხდი იტალიელი ქომაგების წინაშე იმის გამო, რომ მსოფლიოს ჩემპიონატი ჩვენ გარეშე ჩაივლის, მაგრამ ეს უკვე შემდგარი ფაქტია და მე არაფრის შეცვლა აღარ შემიძლია.

და მაინც, ბოლო 40 წელიწადში მე ერთ-ერთი საუკეთესო შედეგი მქონდა იტალიის ნაკრების მთავარი მწვრთნელის პოსტზე. ნუ დაგავიწყდებათ, რომ ნაკრებმა ჩემი ხელმძღვანელობით მხოლოდ ორი შეხვედრა წააგო", - თქვა ვენტურამ და ამ სიტყვებით იტალიას ერთხელაც დასცინა.

"სქაი იტალიას" ინფორმაციით, გუშინდელი სერობა ფეხბურთის ფედერაციაში მოსალოდნელი შედეგით დასრულდა - ვენტურა გაუშვეს, რის სანაცვლოდაც, კომპენსაციის სახით, დაახლოებით 860 ათას ევროს მიიღებს.

პაოლო მალდინი: ახალი ხალხის დროა!
იტალიური ფეხბურთის ცოცხალმა ლეგენდამ, პაოლო მალდინიმ, ახალი სახეების აუცილებლობაზე ილაპარაკა:

"ბოლო 15 წელიწადია, იტალიურ ფეხბურთში ერთსა და იმავე ხალხს ვხედავთ. ნაკრებში რომ ვთამაშობდი, ისინი ჯერ კიდევ მაშინ იყვნენ პოსტებზე. ახლა დროა, სათავეში ახალი ხალხი მოვიდეს. ეს ფიასკო ჭკუის სასწავლებელი უნდა იყოს ჩვენთვის", - თქვა მალდინიმ.

ტავეკიოს ანჩელოტი უნდა
იტალიის ნაკრების ახალი მწვრთნელი, დიდი ალბათობით, კარლო ანჩელოტი იქნება. იტალიური ფეხბურთის შეფს, კარლო ტავეკიოს მიაჩნია, რომ შექმნილი კრიზისიდან "სკუადრა აძურას" ყველაზე სწრაფად და ეფექტურად სწორედ ანჩელოტი გამოიყვანს.

შეგახსენებთ, რომ 58 წლის მწვრთნელი უმუშევარია მას შემდეგ, რაც "ბაიერნიდან" წავიდა. დაანონსდა, რომ ორშაბათს იტალიის ფეხბურთის ფედერაციაში ფართო კონსილიუმი შედგება და ახალ მთავარ მწვრთნელზე იმსჯელებს. ტავეკიოს თქმით, განხილული იქნება ყველა ის კანდიდატურა, ვისაც იტალიურ და, ზოგადად, მსოფლიო ფეხბურთში დიდი სახელი აქვს.

ყოველდღიური სპორტული გაზეთი "ლელო"
1373
მკითხველის კომენტარები / 0 /
მსგავსი ამბები
რუბრიკის სხვა სიახლეები
;