ვიდეოგამეორება და... 'ტორონტომ' ნავსი და 'მილუოკი' გატეხა [VIDEO]

აღმოსავლეთი კონფერენციის ფინალურ სერიაში ტრადიცია დაირღვა - პირველად მოიგო სტუმარმა გუნდმა. და ეს გუნდი გახდა "ტორონტო", რომელსაც ორი დღის შემდეგ საკუთარ მოედანზე მოგების შემთხვევაში, შეუძლია არსებობის ისტორიაში პირველად გავიდეს NBA-ის ფინალში, სადაც "გოლდენ სტეიტი" ელოდება.

არადა, სერიის მეხუთე მატჩი "ტორონტოსთვის" ძალიან ცუდად დაიწყო - "მილუოკი" 18:4 დაწინაურდა და მეოთხედი 10 ქულით მოიგო.
სამაგიეროდ, სტუმრებს მეორე მეოთხედის სტარტი გამოუვიდათ შთამბეჭდავი - 16:2 გაქცევა და მატჩში პირველი ლიდერობა. დიდ შესვენებამდე თანაბარი თამაში გაგრძელდა და ტაიმი "მილუოკიმ" სამი ქულით მოიგო.

მესამე მეოთხედში მასპინძლები კიდევ ერთხელ გაექცნენ მეტოქეს - 14:2 სპურტის შემდეგ, სხვაობა 12 ქულა გახდა. "ტორონტო" მალე დაეწია, მაგრამ ამ 12-წუთეულში "მილუოკი" მუდმივად წინ იყო.

მასპინძლების ლიდერობა მეოთხე მეოთხედის სტარტზეც გაგრძელდა, მაგრამ, როცა "ტორონტომ" 79:81-ზე 10:0 გაქცევა მოაწყო და მატჩში ყველაზე დიდი ანგარიშით დაწინაურდა, მას შემდეგ "მილუოკი" წინ აღარ ყოფილა. ამ გაქცევისას ზედიზედ ორი სამქულიანი ჩააგდო მატჩის საუკეთესო კალათბურთელმა კავაი ლეონარდმა. მან თავისი 35 ქულიდან 15 მეოთხე მეოთხედში აიღო და ამ სერიაში მეოთხედ მოახერხა 30-ქულიანი ზღვარის გადალახვა.

"ტორონტოს" გაქცევის შემდეგ, მილუოკიმ" მხოლოდ ერთხელ გაათანაბრა ანგარიში - 93:93, თუმცა, იქვე ფრედ ვანვლიტმა სამქულიანით ისევ წინ გაიყვანა "რეპტორზი". ვანვლიტიც მატჩის ერთ-ერთ გმირად უნდა მოვნათლოთ - მან შვიდი სამქულიანი ჩააგდო და 21 ქულა დააგროვა.

მატჩის ბოლო წუთზე ბევრი იყო საკამათო სიტუაცია. მაგალითად, სირენამდე 35 წამით ადრე, "მილუოკი" ორი ქულით აგებდა და ლეონარდმა შეტევა გააფუჭა, თუმცა, მსაჯებმა ვიდეოზე შეამოწმეს და დაინახეს ბრუკ ლოპესის ჯარიმა მარკ გასოლზე. ესპანელმა ორი საჯარიმო ჩააგდო და სხვაობა ოთხ ქულამდე გაიზარდა. შემდეგ ეპიზოდშიც მსაჯებმა ვიდეოგამეორებას მიმართეს და მალკოლმ ბროგდონს ბურთი ჩამოართვეს, რის შემდეგაც პასკალ სიაკამის ჩატენვით "ტორონტო" უკვე ექვს ქულას იგებდა 25 წამით ადრე და მატჩიც დასრულებული იყო.

ამ მატჩის შემდეგ, "ტორონტოს" გამთამაშებელი კაილ ლაური თავისი კლუბის საუკეთესო ბომბარდირი გახდა პლეი ოფში - მას 1126 ქულა დაუგროვდა და გაუსწრო დემარ დეროზანს (1117).

დასავლეთი
მილუოკი-ტორონტო 99:105
32:22, 17:24, 26:26, 24:33
მ: ანტენტოკუნმპო (24+6 მოხსნა+6 პასი), ბლედსოუ (20), ბროგდონი (18+11 მოხსნა+6 პასი), ლოპესი (16+8 მოხსნა), მიდლტონი (6+10 მოხსნა+10 პასი) - სასტარტო; ჰილი (12+8 მოხსნა), კონაუტონი (3).
ტ: ლეონარდი (35+7 მოხსნა+9 პასი), ლაური (17+7 მოხსნა+6 პასი), სიაკამი (14+13 მოხსნა+ 3 დაფარება), მ. გასოლი (4+6 მოხსნა), გრინი (0) - სასტარტო; ვანვლიტი (21), პაუელი (8), იბაკა (6+6 მოხსნა).
სერია: 2-3

802
მკითხველის კომენტარები / 0 /
მსგავსი ამბები
რუბრიკის სხვა სიახლეები
;