'ვინც გუნდის მოთხოვნებს ვერ დააკმაყოფილებს, წავა' - ფოთის 'კოლხეთს ახალი სპორტული დირექტორი ჰყავს

ქალაქ ფოთის ხელმძღვანელობამ "კოლხეთს" ახალი დირექტორი დაუნიშნა - დავით ბუკია, რომელმაც თემურ ბარქაია ჩაანაცვლა.

შეგახსენებთ, ბარქაია კოლხებს 2006 წელს ჩაუდგა სათავეში, როცა კლუბს უკიდურესად უჭირდა და რანგით მესამე ლიგაში დაქვეითდა. მისი ხელძღვანელობით "კოლხეთმა" უმაღლეს ლიგაში დაბრუნება მოახერხა. 2009 წელს, ბარქაია ჩამოაშორეს ფოთურ კლუბს, მაგრამ მალევე დააბრუნეს...

სამწუხაროდ, ბოლო ერთი წელიწადია, ჯანმრთელობის მდგომარეობის გაუარესების გამო, ბარქაია კლუბთან დიდ დროს ვეღარ ატარებდა და ახალი დირექტორის დანიშვნაც ამიტომ გახდა საჭირო. ეს "ლელოსთან" თავად დავით ბუკიამაც თქვა:

- თემურ ბარქაიამ ამ გუნდისთვის ბევრი რამ გააკეთა და დიდი მადლობა მინდა გადავუხადო, რომ ფოთს "კოლხეთი" შეუნარჩუნა. მან ეს გაჭირვების პერიოდში მოახერხა და გუნდი აქამდე მოიყვანა. ის ისტორიაში ჩაიწერა, როგორც კლუბის ერთ-ერთი გამორჩეული მენეჯერი. იმედი მაქვს, თანამშრომლობას გავაგრძელებთ.

- აქამდე, ფეხბურთთან რა შეხება გქონდათ?

- ფეხბურთს მხოლოდ ტელევიზორიდან არ ვუყურებდი, თავადაც ვთამაშობდი, მაგრამ მაღალ დონეზე არ მითამაშია, აფხაზეთის ჩემპიონატში გამოვდიოდი... მერეც აქტიური გულშემატკივარი ვიყავი. პროკურატურასა და პოლიციაში ვმუშაობდი...

- რომელ ადგილზე და რომელ ლიგაშიც უნდა იყოს, "კოლხეთი" უძველესი ქართული კლუბია და მის მიმართ ყოველთვის გამორჩეული ინტერესი იქნება. აქედან გამომდინარე, "კოლხეთის" სათავეში ყოფნა რამდენადაც საამაყოა, იმდენადვე - ძალიან რთულიც.

- სანამ კლუბში მოვიდოდი, მეც ვფიქრობდი ამაზე და კარგად გავიაზრე ეს მომენტი. მაგრამ ჩემი და ქალაქის მიზანი გუნდის გაძლიერებაა. ჩვენ ყველა თამაშში მოსაგებად უნდა გავიდეთ მოედანზე. ბოლო შეხვედრებში გამოჩნდა, რომ "კოლხეთს", დიდი ამბიციის გარდა, საკმაოდ დიდი პოტენციალიც აქვს.

- გუნდში ცვლილებები თუ არის მოსალოდნელი?

- ჩვენ არ გვინდა ცვლილება ცვლილებისთვის. ვერც საჭირო ხალხს შეველევით. დავაკვირდებით, ვინ დასჭირდება გუნდს - მენეჯმენტში იქნება ეს თუ მწვრთნელებსა და ფეხბურთელებში. ვნახოთ, შედეგები გვექნება და ვინ როგორ გამოავლენს თავს.

- და მაინც, აპირებთ ახალი ფეხბურთელების დამატებას?

- სატრანსფერო "ფანჯარა" რომ გაიხსნება, ცხადია, სიახლეები იქნება. ვინც გუნდის მოთხოვნებს ვერ დააკმაყოფილებს, წავა, მათ ნაცვლად კი უკეთეს ფეხბურთელებს დავიმატებთ. მთავარია, "კოლხეთს" ძველი იმიჯი დავუბრუნოთ.

- ამას სერიოზული ფინანსები დასჭირდება. იყო დრო, "კოლხეთი" ამ მხრივ საქართველოში გამორჩეული იყო. მაგრამ კლუბმა სპონსორი მხოლოდ წელს მოიძია. თქვენ ამ კუთხით რაიმე ჩანაფიქრი თუ გაქვთ?

- მონახაზი არსებობს და გვაქვს იმედი, რომ სპონსორებს მოვიზიდავთ. სხვაგვარად, გუნდის გაძლიერება წარმოუდგენელი იქნება. ეს არის ჩვენი ვალდებულება, რადგან არ გვინდა, მხოლოდ ფეხბურთის ფედერაციას დააწვეს კისერზე ჩვენი დაფინანსების სიმძიმე. ეს ორგანიზაცია ისედაც უამრავ კლუბს ინახავს და სპონსორები თავადაც უნდა მოვძებნოთ. ასე აღარ უნდა გაგრძელდეს.

- "კოლხეთის" მომავალი როგორ წარმოგიდგენიათ?

- უძველესი ქართული კლუბი მინიმუმ სამეულში მაინც უნდა შედიოდეს - აი, ასე წარმომიდგენია. გუნდს აქვს ამბიციაც და პოტენციალიც, რომ გაცილებით მაღალი ადგილებისთვის იბრძოლოს.

დიდი სურვილი მაქვს, როცა "კოლხეთიდან" წავალ, გუნდი გაძლიერებული დავტოვო, ისეთი გუნდი დავტოვო, რომელიც ყველასთვის ანგარიშგასაწევი ძალა იქნება და ევროთასებზეც ითამაშებს.

- "ფაზისის" სტადიონის რეკონსტრუქციაზეც გკითხავთ. წელს ეს სამუშაოები დასრულდება?

- მოედნის დაგება, ფაქტობრივად, დასრულდა, ამოყვანილია დასავლეთ ტრიბუნის კონსტრუქციები და მხოლოდ მისი კეთილმოწყობაღა დარჩა. ერთი სიტყვით, ტემპი დამაკმაყოფილებელია და დიდი იმედი გვაქვს, აგვისტოში "კოლხეთი" საკუთარ სტადიონზე დაბრუნდება.

ყოველდღიური სპორტული გაზეთი "ლელო"
1183
მკითხველის კომენტარები / 0 /
რუბრიკის სხვა სიახლეები
;