ვინ არის ანორთოსისის ქართველი მეკარე მიქაია? 19-წლამდელთა შემადგენლობა ცნობილია

ევროშესარჩევი ციკლის დაწყებამდე, საქართველოს 19-წლამდელთა ნაკრები მორიგ ამხანაგურ მატჩს ჩაატარებს - რამაზ სვანაძის გაწვრთნილები 10 სექტემბერს პოლონეთს დაუპირისპირდებიან.

"მიხეილ მესხის" სათადარიგო მოედანზე მატჩი 19 საათზე დაიწყება. საქართველოს ნაკრების მწვრთნელმა ეს ფეხბურთელები შეარჩია:

მეკარეები - ლუკა კუტალაძე (დინამო თბ), ლუკა მიქაია (ანორთოსისი, კვიპროსი), რევაზ ლომიძე (ლოკომოტივი);

მცველები - თორნიკე ჯანგიძე, სანდრო კალანდაძე, ლაშა აწყურელი (დინამო თბ), ზურაბ ჭავჭანიძე (ლოკომოტივი), ცოტნე კაპანაძე (რუსთავი), ივა გელაშვილი (სპარტა, ჩეხეთი), საბა ჭინჭარაული (ბევერენი, ბელგია);

ნახევარმცველები- ირაკლი აზაროვი, ნოდარ ლომინაძე, გიორგი მოისწრაფიშვილი, ანზორ მექვაბიშვილი (ყველა - დინამო თბ), ბექა ხარაიშვილი, შოთა ნონიკაშვილი (ორივე - საბურთალო), გიორგი კანდელაკი (თელავი), ანატოლი მესიაჩენკო (სამტრედია), ნიკა გაგნიძე (დილა), გიორგი ლომთაძე (ლოკომოტივი);

თავდამსხმელები - გიორგი იაკობიძე (ლოკომოტივი), გიორგი გაგუა (ალავესი, ესპანეთი), გიორგი გულიაშვილი (საბურთალო).

სიაში თითქმის ყველა ფეხბურთელი ცნობილია, უცნობია მხოლოდ ლუკა მიქაია, რომელიც 2001 წელსაა დაბადებული. ახალგაზრდა მეკარე 2018-19 წლებში ქუთაისის "ტორპედოში" თამაშობდა, ახლახან კი ფამაგუსტის "ანორთოსისში" მიიწვიეს.

მიქაია ზუგდიდელია. 2017 წლის 19 სექტემბერს მასზე პირველად გამოჩნდა ინფორმაცია "ტორპედოს" ვებგვერდზე, რომელიც გვამცნობდა - "ქუთაისურ გუნდში პირველად ივარჯიშა 16 წლის მეკარემ".

თუმცა, მთავარ გუნდში მოგვიანებით დააწინაურეს - 2019 წლის 21 თებერვალს "ტორპედომ" სამი ახალწვეული წარადგინა და მათ შორის მიქაიაც იყო. მაშინდელ ინფორმაციაში ვკითხულობთ:

"ქუთაისელთა სამწვრთნელო შტაბის გადაწყვეტილებით, 17 წლის მეკარემ ორი წლით გააფორმა "ტორპედოსთან" პროფესიული კონტრაქტი. ლუკა ეროვნულ ლიგაში წლეულს "ტორპედოს"  განაცხადში ერთხელ მოხვდა, შარშან - სამჯერ, თუმცა არ უთამაშია".

ლუკას გვარი პირველი გუნდის ოქმში 2018 წლის 18 ოქტომბერს მოხვდა: ეროვნული ლიგის 21-ე ტურის გადადებულ შეხვედრაში "ტორპედომ" "რამაზ შენგელიაზე" თბილისის "ლოკომოტივი" 3:1 დაამარცხა. კახა ჩხეტიანმა 17 წლის ლუკა მიქაია განაცხადში შეიყვანა. მაშინ ცნობილი ის იყო რომ სოციალურ ქსელებში გავრცელდა ვიდეო, სადაც მიქაიამ რეგიონული ლიგის გათამაშებაში "ტორპედო 2-ის" მაისურით "ეგრისთან" შეხვედრაში უკანასკნელ წუთზე პენალტი მოიგერია.

კვიპროსულ მედიაში "ანორთოსისში" კიდევ ერთი ქართველის გადასვლის შესახებ აგვისტოს დასაწყიში გახდა ცნობილი. გიორგი ლორიას, ბუბა დაუშვილის, თორნიკე ოქრიაშვილისა და ნიკა კაჭარავას შემდეგ მიქაია გუნდში მეხუთე ქართველი აღმოჩნდა.

რამაზ სვანაძე მიქაიას საქართველოს 19-წლამდე ნაკრებში სისტემატურად იწვევდა, ასე რომ, მისთვის "ანორთოსისის" ახალწვეული უცნობი ნამდვილად არ არის.

...თუმცა ბევრისთვის შეიძლება უცნობი იყოს გიორგი გაგუა, თუმცა მას ახალგაზრდულ ნაკრებში იწვევედნენ, გუბაზ დოლიძის გაზრდილია და ესპანურ "ალავესში" წლეულს გადავიდა.

საბა ჭინჭარაული კი, შეიძლება ითქვას, "ბელგიური" პროდუქტია. წლებია, ამ ქვეყანაში თამაშობს. ის გია ჭინჭარაულის ვაჟია, 80-იან წლებში თბილისის "დინამოს" თავდამსხმელი რომ იყო. წლების წინ ოჯახი ბელგიაში დასახლდა, საბაც ფეხბურთელად ამ ქვეყანაში ჩამოყალიბდა, ოღონდ, მამისგან განსხვავებით, მცველი გახლავთ. საბა "ნაიკის" აკადემიაში ვარჯიშობდა, ბოლო სამი წელი კი "ბევერენში" თამაშობს - ტანმაღალი მცველი მთავარ გუნდში გადასვლის კანდიდატია.

საინტერესო ცენტრალური მცველია ივა გელაშვილი, რომელსაც ყველა ასაკობრივ ნაკრებში იწვევდნენ და ახლა პრაღის "სპარტას" დუბლშემადგენლობის კაპიტანი გახლავთ.

შეგახსენებთ, რომ საქართველოს 19-წლამდელთა ნაკრები ევროშესარჩევი ციკლის XIII ჯგუფში მოხვდა, სადაც მისი მეტოქეები არიან ხორვატია, უნგრეთი და ყაზახეთი. მატჩებს 9-15 ოქტომბერს უნგრეთის ქალაქი დიორი უმასპინძლებს.

საქართველოს ნაკრების თამაშების განრიგი ასეთია: 9 ოქტომბერი. უნგრეთი-საქართველო; 12 ოქტომბერი. საქართველო-ყაზახეთი; 15 ოქტომბერი. საქართველო-ხორვატია.

6945
მკითხველის კომენტარები / 1 /
status quo
0
როგორ ჰგავს ლუკა ბაბუამისს დედის მხრიდან.ისიც სიმპათიური ვაჟკაცი იყო.
მსგავსი ამბები
რუბრიკის სხვა სიახლეები
;