ვინ არის ის ინკოგნიტო ბიზნესმენი? დავალიანების ნაწილი დაფარულია, ფოთის პორტმა დაფინანსებაზე უარი თქვა

ფოთის "კოლხეთს" მძიმე დღეები უდგას. ეროვნული ლიგა 2-ის ფინიშამდე 6 ტურით ადრე, გუნდი 20 ქულით ბოლო ადგილზეა და საგრძნობლად ჩამორჩება ლანჩხუთის "გურიასა" (27 ქულა) და "ცხინვალს" (30). ფაქტია, პირველ ქართულ გუნდს ლიგა 3-ში გავარდნისგან სასწაული თუ იხსნის...

...ამას ფინანსური პრობლემები ემატება, რეალურად კი ეს არის ყველა პრობლემის სათავე. "კოლხეთის" ოფიციალურმა გვერდმა კლუბში არსებულ ვითარებასთან დაკავშირებით სიახლეები გაავრცელა. ცნობილი გახდა, რომ დავალიანების ნაწილი დაიფარა. არადა, ამის გარეშე ლიცენზიის ჩამორთმევა რეალური იყო. ამავე დროს, ცნობილი გახდა, რომ შარშანდელი დავალიანების ნაწილი ინკოგნიტო ბიზნესმენმა დაფარა...

"დღეს ფოთის კოლხეთმა" გასული სეზონის დავალიანების მორიგი ციკლი დაფარა, რაშიც ლომის წილი ქალაქის ხელმძღვანელობას, გუნდის ადმინისტრაციას და ფეხბურთელებს მიუძღვით. ცნობილია, რომ წინა ციკლის თანხის უდიდესი ნაწილი გუნდისადმი კეთილგანწყობილმა ბიზნესმენმა დაფარა და პირდაპირ შეიძლება ითქვას, "კოლხეთი" ეროვნული საფეხბურთო რუქიდან გაქრობას გადაარჩინა...

იმედია, სეზონის ბოლოსკენ დარჩენილი დავალიანების გადახდა შეძლებისდაგვარად უმტკივნეულოდ მოხდება და გუნდი მომავალ სეზონს ვალების გარეშე შეხვდება. ეს საშუალებას მისცემს მის ხელმძღვანელობას, კონკურენტუნარიანი, ძლიერი, ჩვენი ქალაქისთვის ღირსეული გუნდი ჩამოაყალიბოს, რომელიც შეძლებს, იბრძოლოს და ქართული ფეხბურთის ელიტაში თავისი ადგილი დაიბრუნოს", - წერია კლუბის განცხადებაში.

იქვე აღნიშნულია, რომ ფოთის პორტმა "კოლხეთის" სპონსორობაზე უარი განაცხადა: "როგორც ცნობილია, გასული საუკუნის 90-ანი წლების მეორე ნახევარში ფოთის "კოლხეთის" მეპატრონე გახდა ქალაქის საზღვაო ნავსადგური, რომელიც წლების განმავლობაში გუნდისთვის მილიონ ლარამდე თანხას გამოყოფდა. პერიოდულად, ეს თანხა 1,2 მილიონ ლარამდეც აღწევდა, რაც იმ დროისთვის საკმაოდ სოლიდურ დაფინანსებად მოიაზრებოდა. შესაბამისად, გუნდი ხშირად ახერხებდა ევროტურნირების საგზურების მოპოვებას, უცხოურ კლუბებთან თამაშით კლასის ამაღლებას და გამოცდილების მიღებას...

სამწუხაროდ, წინა ხელისუფლების პერიოდში ჩვენი ქალაქის საზღვაო ნავსადგური მფლობელობაში გადაეცა ერთ-ერთ უცხოურ კომპანიას, რომელმაც გუნდის დაფინანსება შეწყვიტა და 2006 წელს "კოლხეთი" დაშლის საფრთხის წინაშე დადგა. იმ პერიოდში, გუნდის შესანარჩუნებლად თანხები ქალაქმაც ვერ გამონახა და "კოლხეთი" დაიშალა. საბედნიეროდ, ამ პერიოდში გამოჩნდნენ ფეხბურთზე უზომოდ შეყვარებული ბიზნესმენი თემურ ბარქაია და "კოლხეთის" ყოფილი ფეხბურთელი ზაზა ინაშვილი, რომელთა ძალისხმევითაც "კოლხა" შეიქმნა. გუნდმა 2006 წლიდან ასპარეზობა რეგიონალურ ლიგაში დაიწყო, წარმატებით გაიარა შესაბამისი საჩემპიონატო ბარიერები და მალე ქართულ საფეხბურთო ელიტაში დაწინაურდა.

2011-15 წლებში საზღვაო ნავსადგურის ხელმძღვანელობამ, გამოიჩინა რა კეთილი ნება, გამოყო გარკვეული თანხა, რომლის მეშვეობით გუნდის თურქული შეკრებები და სპორტული ინვენტარით აღჭურვა ფინანსდებოდა. თუმცა ოთხწლიანი თანამშრომლობის შემდეგ ეს კავშირი დამფინანსებლის ინიციატივით შეწყდა და ქალაქის ყველაზე დიდი საწარმო დღემდე უარს აცხადებს, ფოთის პირველ საფეხბურთო გუნდს თუნდაც უმნიშვნელო თანხით დაეხმაროს.

დღეისთვის, გუნდის სავალალო მდგომარეობიდან გამომდინარე, "კოლხეთის" ხელმძღვანელობამ მიმართა ფოთის საზღვაო ნავსადგურს მოკრძალებული დახმარებისთვის. თუმცა მათმა ხელმძღვანელებმა უარი განაცხადეს, თანადგომა აღმოუჩინონ "კოლხეთს", რომლის ასწლოვანზე მეტი ისტორია არ იმსახურებს იმ კრიზისს, რომელშიც დღეს მავანთა გამო იმყოფება".

ალბათ, დროა, ფოთის "კოლხეთი" და მსგავს გაჭირვებაში მყოფი სხვა გუნდებიც სახელმწიფომ აუქციონზე გაიტანოს და კერძო საკუთრებაში გაასხვისოს. სახელმწიფო კლუბებში საარჩევნო რესურსი კი არის, მაგრამ უფრო საფრთხეა, რომ ასეთ მდგომარეობაში მყოფი გუნდი სახელმწიფოსთვის "ანტიპიარად" იქცეს. კერძო საკუთრებაში გადასვლა კი "კოლხეთის" და, ზოგადად, ქართული ფეხბურთის სწორი მომავლია.

951
მკითხველის კომენტარები / 0 /
რუბრიკის სხვა სიახლეები
;