ვინ ახდენს გავლენას დავითაშვილზე? როგორც ამბობენ, მან 'რუბინი' ლამის ცრემლებით დატოვა...

რუსულმა გამოცემა “ბიზნესგაზეტამ” ყაზანის “რუბინში” ზურიკო დავითაშვილის ჩაშლილ ტრანსფერზე წერილი გამოაქვეყნა, სადაც ამ სატრანსფერო ისტორიის საინტერესო დეტალებია მოთხრობილი.

აქ ერთი განსაკუთრებით საკამათო დეტალიცაა - დავითაშვილი ყაზანის “რუბინს” არ აღმოუჩენია, არ “გაუხსნია” და ახალგაზრდა ქართველის მიმართ სხვა კლუბების ყურადღებაც არ არის “რუბინში” ჩატარებული ამხანაგური შეხვედრების დამსახურება. 18 წლის ფეხბურთელი თბილისის “დინამომ” გაზარდა და “ლოკომოტივმა” ათამაშა, საქართველოს ასაკობრივ ნაკრებებში კი 28 მატჩში 24 გოლი გაიტანა, ხოლო ელიტრაუნდის 3 მატჩში გატანილი 6 გოლით ტურნირის საუკეთესო ბომბარდირი გახდა. ასე რომ, ამ დეტალს ყურიდან ყურში ვერ გავატარებდით...

“ბერდიევმა დავითაშვილს ყველა მოთხოვნა შეუსრულა, მაგრამ ის გაიქცა. რატომ ჩაიშალა ნიჭიერი ქართველის ტრანსფერი “რუბინში”?” - ასეთია წერილის სათაური. ახლა კი თავად წერილი:

“ზურიკო დავითაშვილი ყაზანის “რუბინს” ზამთრის სამ შეკრებაზე ახლდა, მაგრამ ახალგაზრდა ქართველმა ნახევარმცველმა, რომლის ადგილსაც ყურბან ბერდიევი პირველ გუნდში მოიაზრებდა, ყაზანელებს მადლობა გადაუხადა და შეთავაზებული კონტრაქტით უკმაყოფილომ გუნდი დატოვა.

ზურიკო 15 თებერვალს 18 წლის გახდა და “რუბინს” შეეძლო, ფეხბურთელთან კონტრაქტი გაეფორმებინა. “ბიზნეს-გაზეტას” მონაცემებით, ყაზანურმა კლუბმა ქართველს 4,5-წლიანი კონტრაქტი შესთავაზა, მაგრამ მას მხოლოდ ერთწლიანი ხელშეკრულება სურდა და გუნდს ამიტომ დაემშვიდობა.

კლუბში ეს გაუკვირდათ: ახალგაზრდა ფეხბურთელთან შეთანხმების ხელმოწერა მხოლოდ ერთი წლით უცნაური და ატიპური იქნებოდა. სინამდვილეში, ეს იყო ცალსახა მინიშნება, რომ მოთამაშეს “რუბინის” სწრაფად დატოვება და კლუბის ტრამპლინად გამოყენება სურდა. სხვათა შორის, ეს დავითაშვილმა ინტერვიუში არ დამალა.

“რუბინს” ასეთი პირობა არ აწყობდა, მაგრამ კლუბი კომპრომისული ვარიანტის მოძებნას შეეცადა. პირველი უარის შემდეგ, დავითაშვილს 2,5-წლიანი ხელშეკრულება შესთავაზეს, მაგრამ მან კვლავ უარი თქვა. ზამთრის შეკრების დასრულებამდე ორი დღით ადრე კი ზურიკო გუნდსა და ფეხბურთელებს დაემშვიდობა, მადლობა გადაუხადა და ბელეკი დატოვა.

ამბობენ, რომ მოთამაშემ “რუბინი” ლამის ცრემლებით დატოვა. როგორც ჩანს, წასვლაზე გადაწყვეტილებას მარტო ფეხბურთელი არ იღებდა - მასზე დიდი გავლენა აგენტმა გიგა გადელიამ და მამამისმა მოახდინეს.

დავითაშვილს თბილისის “ლოკომოტივთან” კონტრაქტი დაუსრულდა და ბერდიევის “რუბინს” ზამთრის შეკრების პირველივე დღეებში შეუერთდა. ყაზანში ფეხბურთელს ერთი წლით ადრე ელოდნენ, რადგან იცოდნენ, კლუბში რა ვითარებაც ჰქონდა...

ბერდიევი დავითაშვილის ადგილს ძირითად გუნდში ხედავდა. “რუბინის” ამხანაგურ მატჩებში ის შემტევ ნახევარმცველად და უკანდახეულ თავდამსხმელად თამაშობდა. ყაზანელთა მწვრთნელი მას უაღრესად დადებითად აფასებდა, მიუხედავად იმისა, რომ ქართველს შეკრებაზე გოლი არ გაუტანია. ის უგოლოდაც საკმაოდ კარგად გამოიყურებოდა და ასაკისთვის უჩვეულოდ დაღვინებულის შთაბეჭდილებას ტოვებდა.

“რუბინის” დაკომპლექტებისა და ფინანსური პრობლემების გათვალისწინებით, დავითაშვილი აუცილებლად რეგულარულად ითამაშებდა. 18 წლის ფეხბურთელს თავდაპირველად სწორედ ეს იზიდავდა: ძნელი წარმოსადგენია, რომელიმე დიდი ჩემპიონატის კლუბს მისთვის გარანტირებული ადგილი შეეთავაზებინა...

შესაძლოა, “რუბინის” ამხანაგურ შეხვედრებში ახალგაზრდა ქართველმა ფეხბურთელმა სხვა გუნდების ყურადღება მიიპყრო. ზურიკო არ მალავს, რომ შესაძლოა, კარიერა ევროპაში გააგრძელოს. როგორც თავისუფალ აგენტს, მას “სატრანსფერო ფანჯრის” დახურვის შემდეგ ორი კვირის განმავლობაში ნებისმიერ კლუბში ჩარიცხვა შეუძლია. ანუ “რუბინს” ან სხვა კლუბს აქვს დაახლოებით 10 დღე იმისთვის, რომ ფეხბურთელი საჩემპიონატო განაცხადში შეიყვანოს. წინააღმდეგ შემთხვევაში, ის ზაფხულამდე უგუნდოდ დარჩება.

“ბიზნეს-გაზეტას” ცნობით, ასეთი რთული მოლაპარაკებებისა და დავითაშვილის უცნაური ქცევის მიუხედავად, “რუბინი” მოთამაშესთან კონტრაქტის გაფორმებისთვის კვლავ მზადაა. თუ ქართველი ყაზანში დაბრუნებას და შეთანხმების გაფორმებას მოინდომებს, მაშინ “რუბინი” ფეხბურთელზე უარს არ იტყვის - ანუ ყაზანელთა შეთავაზება ძალაშია.

ამავდროულად, “რუბინში” არ აპირებენ დათმობაზე წასვლას ახალგაზრდა ფეხბურთელთან, რომელსაც ჯერჯერობით ზრდასრულ დონეზე მიღწევები არ აქვს. “რუბინის” პოზიციაა, რომ კლუბი მზადაა ფეხბურთელს სათამაშო პრაქტიკა მისცეს, ფინანსური პირობები გაუუმჯობესოს და ხანგრძლივი კონტრაქტზეც უარი თქვას, ოღონდ ერთწლიანი კონტრაქტი გამორიცხულია, რათა ზაფხულში მოთამაშე კარიერის გაგრძელების სხვა ვარიანტების ძიებას არ შეეცადოს. თუ დავითაშვილი ყაზანელთა წინადადებაზე კვლავ უარს იტყვის, მაშინ ეს კატასტროფა არ იქნება. ნაკლებად სავარაუდოა, რომ ახალგაზრდა, გამოუცდელმა ფეხბურთელმა “რუბინი” ახლა და დაუყოვნებლივ გააძლიეროს და ხანგრძლივი ადაპტაციის გარეშე შედეგი დადოს.

სავარაუდოდ, ქართველის საკითხი მომავალ კვირას გადაწყდება. თავად დავითაშვილმა თქვა, რომ ისევ ევროპაში წავა და არა - “რუბინში” ბერდიევთან, რომელსაც ქართველ ფეხბურთელებთან მუშაობის პოზიტიური გამოცდილება აქვს - მისი ხელმძღვანელობით მაღალ დონეზე ათამაშდნენ საბა კვირკველია, დავით კვირკველია და ლაშა სალუქვაძე...

იქნება თუ არა ეს “რუბინისთვის” დანაკარგი? ნაწილობრივ - კი, რადგან კლუბმა ყურადღება ნიჭიერი ქართველის კანდიდატურაზე გადაიტანა და “ზენიტში” გადასული სერდან აზმუნის წასვლის შემდეგ თავდასხმაში არავინ დაუმატებიათ.

“რუბინს” რომ სცოდნოდა, დავითაშვილის ვარიანტი არ გამოდიოდა, სხვა მოთამაშეს მიიწვევდა. ყაზანელებს სჯეროდათ, რომ ქართველს დაიმატებდნენ, მაგრამ ფორსმაჟორის შემთხვევისთვის თავი არ დაიზღვიეს.

ერთი წლის წინ, მსგავსი რამ მოხდა ილზათ ახმეტოვის შემთხვევაში, რომელიც ცსკა-ში გადავიდა და მოსკოველთა ლიდერი გახდა. სირცხვილი იქნება, თუ დავითაშვილის შემთხვევაშიც იგივე მოხდება - ფეხბურთელი, რომელიც “რუბინმა” აღმოაჩინა და გახსნა, საბოლოოდ სხვა კლუბში ითამაშებს”.

ყოველდღიური სპორტული გაზეთი "ლელო"
1192
მკითხველის კომენტარები / 1 /
სოსო
0
ზურიკოსათვის და რუბინისათვისაც მისაღები იქნება 1,5 წლიანი კონტრაქტი.ამ შემთხვევაში, არც ერთი მხარე არ წააგებს.უფრო ხანგრძლივი კონტრაქტის შემთხვევაში კი რუსული ინტრიგები დაიწყება და ჩაითრევენ.
მსგავსი ამბები
რუბრიკის სხვა სიახლეები
;