ვინ გაწვრთნის ძიუდოისტთა ნაკრებს - ჯარჯი ზვიადაური? არა! უცხოელი? არა!

უკვე რამდენიმე დღეა, სოციალურ ქსელებში, ახლა კი მედიაშიც ვრცელდება ინფორმაცია, რომ თითქოს საქართველოს ძიუდოს ფედერაცია ნაკრების მთავარი მწვრთნელის პოსტზე საბერძნეთში წასული ილიას ილიადისის (ჯარჯი ზვიადაურის) კანდიდატურას განიხილავს.

ბუნებრივია, დავინტერესდით, რამდენად შეესაბამება ეს ხმები სინამდვილეს და საქმეში გასარკვევად საქართველოს ძიუდოს ფედერაციის პრეზიდენტ გიორგი ათაბეგაშვილს დავუკავშირდით, რომელმაც უარჰყო აღნიშნული ინფორმაცია. მისი თქმით, ეს საკითხი ფედერაციის აღმასკომის წინა სხდომაზე მართლაც დასმულა და ილიადისსაც დაკავშირებიან, მაგრამ მოუცლელობის გამო თავად უთქვამს უარი. ილიადისი გროზნოს კლუბ "ედელვაისს" ავარჯიშებს და, პარალელურად, ძიუდოს საერთაშორისო ფედერაციაშიც მუშაობს.

თუმცა სოციალურ ქსელებში ილიადისის კანდიდატურის გაჟღერებას ქომაგთა ნაწილის უკმაყოფილება მოჰყვა, როგორც ჩეჩნეთისა და რუსეთის პრეზიდენტებთან - რამზან კადიროვთან და ვლადიმერ პუტინთან დაახლოებული პირისას. ილიადისი სოციალურ ქსელებში პერიოდულად მართლაც აქვეყნებს ხოლმე მათთან გადაღებულ ფოტოებს, ერთხელ კი, აგვისტოს ომიდან არც ისე დიდი ხნის შემდეგ პუტინის ფოტოს მიაწერა, თავისი საქმის ჩემპიონიო.

ათაბეგაშვილის ინფორმაციით, აღმასკომი ხვალ ოსაკაში მიმხდარი ჩხუბის გარდა, ნაკრების მთავარი მწვრთნელის შესახებაც იმსჯელებს. პრეზიდენტის თქმით, უცხოელი მწვრთნელის მოწვევაც გამორიცხულია, რადგან ისინი განსაკუთრებულ პირობებს ითხოვენ. ამიტომ ისევ ქართველ მწვრთნელზე შეჯერდებიან.

ძიუდო. აღმასკომი 1 დეკემბერს გადაწყვეტს...

1563
მკითხველის კომენტარები / 0 /
რუბრიკის სხვა სიახლეები