ვინ დააგებს საფარს ქართულ სტადიონებზე?

წელს 6 სტადიონზე (ფოთში, ქობულეთში, სამტრედიაში, წყალტუბოსა და საჩხერეში) ინფრასტრუქტურული პროექტების დაწყება დაანონსდა.

მოედნის საფარის დაგება ამ სტადიონებზე ფეხბურთის ფედერაციას უნდა ეზრუნა.

"ლელოს" ჰქონდა ინფორმაცია, რომ ფოთში "ფაზისის" სტადიონზე ქარულ ბალახს დააგებდნენ, რომელიც ფოთთან ახლოს მდებარე მეურნეობაში მზადდება. ჩვენთვის ცნობილი გახდა, რომ ყველა სხვა სტადიონზეც, ადრინდელივით, მოედნის საფარს უცხოეთიდან კი არ ჩამოიტანენ, არამედ, სხვაგანაც ქართულ პროდუქციას გამოიყენებენ.

"სიახლე არაა, რომ "ზესტაფონი" ინფრასტრუქტურის გამართულად ფუნქციონირებასა და შემდგომ განვითარებას დიდ ყურადღებას აქცევს. ამ მიზნით, სამი წელია, რაც ხობის რაიონის სოფელ ჭალადიდში Lawns of Georgia-ს მეურნეობა ამოქმედდა და უმაღლესი ხარისხის ლანდშაფტურ და უეფას სტანდარტების შესაბამის გაზონებს ამზადებს.

მხოლოდ საფეხბურთო მინდვრები 10 ჰექტრამდე ფართობზეა გაშენებული. ეს კომპანია "ზესტაფონის" მფლობელის, ილია კოკაიას დაფუძნებულია. ზესტაფონისა და თბილისის ზღვაზე მდებარე ჩვენი კლუბის ბაზებსა და დავით აბაშიძის სახელობის სტადიონზე საფარის დაგებაზე, ხარისხსა და მის მოვლაზე სწორედ ეს კომპანია ზრუნავდა.

ფეხბურთის ფედერაციასა და ჩვენს კლუბს შორის არსებული ხელშეკრულებით, ბოლო 2,5 წელია, ეროვნული და ასაკობრივი ნაკრები ოფიციალური და ამხანაგური მატჩებისთვის თბილისის ზღვაზე მდებარე ჩვენს ბაზაზე ემზადებიან.

იქვე ვარჯიშობდნენ საქართველოში გამართული 21, 19 და 17-წლამდელთა ნაკრებების შესარჩევი ტურნირის მონაწილეები, ხოლო 2017 წლის ივნისში, რაგბის ახალგაზრდულ მსოფლიო თასზე ჩამოსული ირლანდია და ახალი ზელანდია, არაერთი ქართული, ირანული და აზერბაიჯანული კლუბი, ივნისში კი საზაფხულო "კემპს" მილანის "ინტერი" გამართავს.

ფეხბურთის ფედერაცია დაინტერესდა, საფარის ხარისხი გაითვალისწინა და ქართულ სტადიონებზე მინდვრების განახლება სწორედ Lაწნს ოფ Gეორგია-ის პროდუქციით გადაწყვიტა", - ამბობს "ზესტაფონის" მენეჯერი სერგო ფუტკარაძე.

სხვათა შორის, ამ თემაზე რამდენიმე თვის წინ "ლელოსთან" ილია კოკაიამ ილაპარაკა. გარდა იმისა, რომ ბალახი ხარისხიანია, ის უცხოურზე იაფია - ფუტკარაძემ ყურადღება ამაზეც გაამახვილა:

"რაც ვიცი, პირველ ეტაპზე, საფარი 5 სტადიონზე შეიცვლება - ფოთში, ქობულეთში, სამტრედიაში, წყალტუბოსა და საჩხერეში. დარწმუნებული ვარ, ყველა ამ სტადიონზე გუნდები ხარისხიან მოედნებზე თამაშით ისიამოვნებენ. ქართული ბალახის გამოყენება რამდენიმე ფაქტორის გათვალისწინებით მოგებიანია.

გარდა ხარისხისა, ეს საფარი ოთხჯერ უფრო იაფი დაჯდება, ვიდრე უცხოეთიდან ჩამოტანილი. მესამე - ამით ქართული წარმოება წახალისდება და განვითარდება, ხოლო საკმაოდ სოლიდური თანხა საქართველოში რჩება, რაც არანაკლებ მნიშვნელოვანია.

ყველასათვის ცნობილია, რომ ვალუტის კურსის დაცემას ისიც იწვევს, რომ ჩვენ საკუთარ პროდუქტს ნაკლებად ვაწარმოებთ და ეს ყოველივე ეკონომიკურადაც გამართლებულია".

ყოველდღიური სპორტული გაზეთი "ლელო"
1618
მკითხველის კომენტარები / 0 /
მსგავსი ამბები
რუბრიკის სხვა სიახლეები
;