ვინ დაწყევლა? ტოკიოში ოლიმპიადა 1940-შიც უნდა ჩატარებულიყო... ოლიმპიური საფრთხე 40 წელიწადში ერთხელ

ტოკიო და ოლიმპიადა აშკარად დათარსული მცნებებია: 1896 წლიდან მოყოლებული, როცა ათენში პირველი თამაშები გაიართა, ოლიმპიადის ჩატარება საფრთხის ქვეშ ოთხჯერ დადგა, აქედან ორჯერ კი მისთვის ტოკიოს უნდა ემასპინძლა!

ოლიმპიური კომიტეტის პრეზიდენტი ლერი ხაბელოვი ოლიმპიადის გადადებაზე: გულდასაწყვეტია, მაგრამ დღევანდელ ვითარებაში ამ გადაწყვეტილებას მივესალმები

პირველად ეს 80 წლის წინ, 1940 წელს მოხდა, მეორედ კი - ახლა, წლეულს, 2020 წელს. თუმცა არის ერთი პროგრესიც: პირველად თამაშები თუ საერთოდ ჩაიშალა იაპონია-ჩინეთის ომის გამო, ამჯერად მხოლოდ ერთი წლით გადავადდა, რაც ახალი კორონავირუსით გამოწვეულმა მსოფლიოს პანდემიამ განაპირობა. განსხვავება ისიც, რომ პირველ შემთხვევაში თამაშებს საფრთხე ომმა შეუქმნა, ამჯერად კი - კაცობრიობისთვის ჯერ კიდევ უცნობმა ვირუსმა. იმედია, გაისად ამ დროისთვის ის საბოლოოდ იქნება დამარცხებული, თუ არადა, მერე კაცობრიობას აღარც ოლიმპიადა დასჭირდება...

ვერ გეტყვით, ვინ დაწყევლა, რის გამო დაითარსა ოლიმპიადის ტოკიოში ჩატარება თუ სხვა მიზეზის გამო, ჩვენ მხოლოდ ფაქტზე გავამახვილეთ ყურადღება. ისე კი ტოკიომ ერთხელ მაინც უმასპინძლა ზაფხულის ოლიმპიურ თამაშებს - 1964 წელს, რომელიც ცოტა უჩვეულო დროს - ოქტომბერში გაიმართა.

უცნაურია ისიც, რომ 40 წელიწადში ერთხელ ოლიმპიადის ჩატარებას საფრთხე ემუქრება. 1940 წელზე უკვე გითხარით და 1980 წლის მოსკოვის ოლიმპიადის ამბებიც კარგად გახსოვთ, როცა მაშინდელი საბჭოთა კავშირის ავღანეთში შეჭრის გამო ლამის ნახევარი მსოფლიო XXII ოლიმპიური თამაშების სხვაგან გადატანას ითხოვდა, ხოლო როცა ამას ვერ მიაღწიეს, ადგნენ და ბოიკოტი გამოუცხადეს მას, რამაც ფრიად დააზარალა ამ კონკრეტული თამაშების იმიჯი. მართალია, ყოფილმა სოციალისტურმა ბანაკმა ბოიკოტი მომდევნო, 1984 წლის ლოს ანჟელესის თამაშებსაც გამოუცხადა, თუმცა ეს ადრიდანვე ცნობილი იყო და თანაც იმ ოლიმპიადის გაუქმება-გადატანის საკითხი არც დამდგარა დღის წესრიგში.

ამჯერად, თამაშების ჩატარებას საფრთხე არა ომმა, არამედ ოლიმპიამის ისტორიაში პირველად, ვირუსულმა ეპიდემიამ შეუქმნა. ვიქონიოთ იმედი, რომ XXXII თამაშები გადარჩება და გაისად აუცილებლად ჩატარდება.

2624
მკითხველის კომენტარები / 0 /
მსგავსი ამბები
რუბრიკის სხვა სიახლეები
;