რუმინეთი VS საქართველო. ვინ იყო ანთიმოზ ივერიელი? რატომ თამაშდება მისი სახელობის თასი? ვის მეტჯერ აქვს მოგებული?

უქეიფოდ მყოფი კოჩია ვერის ბაღში გრძელ სკამზე ზის ჩაფიქრებული.

გვერდით ახალგაზრდები ჩამოუსხდნენ ხმაურით. ლაპარაკს არ აცლიან ერთმანეთს. მთავრობის პოლიტიკა გააქვთ და გამოაქვთ ხერხივით.
ბევრი ითმინა და...

- ბიჭებო, რაგბი თუ გიყვართ? - ჰკითხა მოულოდნელად.
სიჩუმე ჩამოვარდა.

- როგორ არა, სტადიონზეც დავდივართ საყურებლად, - უპასუხა ერთმა.

- რუმინეთთან შეხვედრებს თუ დასწრებიხართ?

- ხშირად, - დაამატა მეორემ.

- იმ მატჩებში ჩვენები ანთიმოზ ივერიელის თასს რომ ეცილებიან სტუმრებს, ის კაცი საქართველოს ნაკრებში რომელ პოზიციაზე თამაშობდა, თუ იცით?
ბიჭებმა ერთმანეთს გადახედეს.

- მგონი, დაცვაში, - ძლივს ამოღერღა გვერდით მჯდომმა.

- არა... როგორც ვიცი, შერკინებაში. - შეუსწორა მეორემ.

- რას ამბობ, ბიჭო, - ფეხზე წამოდგა მესამე, - ის კაცი დიდი ხნის წინათ ცხოვრობდა და ლელობურთელი იყო...

ცნობისთვის: მწიგნობარი, მესტამბე, განმანათლებელი, პოლიტიკური და საეკლესიო მოღვაწე ანთიმოზ ივერიელი გახლდათ სამცხე-საათაბაგოში დაბადებული ქართველი, რომელიც თურქებმა ტყვედ გაყიდეს. 1691 წელს მან ბუქარესტში დაარსა სტამბა და რუმინელებს მშობლიურ ენაზე პირველი წიგნი დაუბეჭდა.

უდიდესი წვლილი შეიტანა რუმინული სალიტერატურო ენის განვითარებაში. 1705 წელს ანთიმოზი ეპისკოპოსად, 1708 წელს უნგრო-ვლახეთის მიტროპოლიტად აკურთხეს. 1716 წლის 12 სექტემბერს თურქმა იანიჩარებმა ხმლებით აკუწეს. 1992 წელს რუმინეთის ეკელსიამ ანთიმოზ ივერიელი წმინდანად შერაცხა.

2002 წელს სპორტის ჟურნალისტ ზაალ გიგინეიშვილის ინიციატივითა და რაგბის მხარდამჭერთა ლიგის ძალისხმევით ყოფილმა მორაგბემ და ცნობილმა მოქანდაკე გია ჯაფარიძემ ანთიმოზ ივერიელის თასი ჩამოასხა. ეს სიმბოლური გახლდათ, რადგან ტომით ქართველი ანთიმოზ ივერიელი რუმინეთში ეწეოდა პოლიტიკურ და სასულიერო მოღვაწეობას.

ახალ სარაგბო ტრადიციას ჩაეყარა საფუძველი. ანთიმოზ ივერიელის თასის პირველი მფლობელი გახდა რუმინეთის ნაკრები, რომელმაც წლეულს 3 მარტს თბილისში საქართველოს ეროვნულ გუნდს 31:23 სძლია.

2002 წლიდან საქართველოს და რუმინეთის მორაგბეთა ნაკრებ გუნდებს შორის ანთიმოზ ივერიელის თასი 17-ჯერ გათამაშდა, საიდანაც 11-ჯერ ჩვენებმა, 6-ჯერ კი კარპატელებმა მიაღწიეს წარმატებას. ბოლო რვა წელიწადში ბორჯღალოსნებმა შვიდჯერ დაიმსახურეს ეს საპატიო ჯილდო, მათ შორის - შარშანაც, როცა რუმინეთს თბილისში 18 მარტს 25:16 სძლიეს. იმედია, ქართველი მორაგბეები 9 თებერვალს ანთიმოზის თასს კლუჟშიც შეინარჩუნებენ...

7656
მკითხველის კომენტარები / 0 /
მსგავსი ამბები
რუბრიკის სხვა სიახლეები
;