ვინ მიგვიყვანა ევრობასკეტი 2021-მდე: გზა, რომელიც მსოფლიოს ჩემპიონის, ნიკოლოზ დერიუგინის პასით დაიწყო

- საქართველოს ნაკრების კალათბურთელები გმირები არიან, - თქვა 2015 წლის ევრობასკეტის მსვლელობისას მწვრთნელმა იგორ კოკოშკოვმა და განმარტა, - მაშინ, როცა ევროლიგისა და NBA-ს ევროპელი მოთამაშეები ნაკრებზე უარს ამბობენ, ზღვის პირას განცხრომას ამჯობინებენ, ქართველი კალათბურთელები მთელი ზაფხული ნაკრებთან ერთად ვარჯიშობენ, პირადულზე წინ საკუთარ ქვეყანას აყენებენ.

საქართველოს ნაკრებში თამაში მისი დაარსების დღიდან გმირობა იყო - 90-იან წლებში, როცა ჩვენი გუნდი ფეხს იდგამდა, მის წევრებს მძიმე პირობებში უწევდათ ვარჯიში და თამაში. შეგვძლია გავიხსენოთ შემთხვევები, როცა ევრობასკეტის შესარჩევი მატჩის სათამაშოდ გასამგზავრებელი ფული გაფრენის წინა ღამით უშოვიათ... ვერ ხერხდებოდა შეკრებების მოწყობა... კალათბურთელები კი ბოლომდე გვერდში ედგნენ ქვეყანას.

ეროვნულ ნაკრებში 1995 წლის 24 მაისიდან დღემდე 95 კალათბურთელს უთამაშია. მათ თავიანთი შრომით ორ მთავარ მიზანს მიაღწიეს:

პირველი - "ჯვაროსნები" ევროპის ტოპ-გუნდების ელიტაში გააწევრიანეს.

და მეორე - 2021 წლის ევროპა თბილისში ჩამოგვიტანეს.

ქართველმა გულშემატკივარმა თუ დამწყებმა კალათბურთელმა უნდა იცოდეს ნაკრების თითოეული წევრის გვარი, მათი ღვაწლი. ამიტომ, გადავწყვიტეთ დღეიდან თებერვლის ბოლომდე ყოველკვირეულად წარმოგიდგინოთ ორ-ორი მოთამაშე. თებერვლის ბოლოს კი...

ნიკოლოზ დერიუგინი
11


დაიბადა: 30.04.1959
სიმაღლე: 206 სმ.
კარიერა: "დინამო", "ვითა", "მაფთი" (უნგრეთი), "სლოვაკფარმა" (სლოვაკეთი)
მიღწევები: მსოფლიოს ჩემპიონი (1982), ევროპის ჩემპიონი (1981), საკონტინენტაშორისო თასის მფლობელი (1977, 1979), მოსკოვის ოლიმპიადის ბრინაოს მფლობელი (1980), სსრკ-ს პირველობის ბრინჯაოს პრიზიორი (1977)

ვიდრე ზევით ავიხედებოდი

მივყვეთ მოვლენებს თანმიმდევრობით. ჩვენმა ნაკრებმა პირველი საერთაშორისო მატჩი ინგლისის ქალაქ ბირმინგემში 1995 წლის 24 მაისს გამართა. ევრობასკეტი 1997-ის საკვალიფიკაციოზე პოლონეთს დაუპირისპირდა. პირველ წუთებს ვახტანგ ნაცვლიშვილი იხსენებს:

- სადაო გდებისას ავხტი და ბურთი ჩემი თანაგუნდელებისკენ გადავაგდე. პირველი შეტევა წარუმატებელი გამოდგა, ავაცილეთ. პოლონელების საპასუხო იერიშიც უშედეგოდ დასრულდა. მატჩის მესამე შეტევისას ჩვენმა გამთამაშებელმა ბურთი ფარქვეშ ნიკოლოზ დერიუგინს ჩაუგდო. იგი ახტა, ნახევარკაუჭით კალათისკენ უნდა ესროლა, თუმცა დამინახა, რომ თავისუფალ პოზიციაში ვიყავი, მაჯის მოძრაობით ბურთს მიმართულება ჩემკენ შეუცვალა. ასეთი ეფექტური პასის გაცუდება წარმოუდგენელი იყო - 2:0.

სიმბოლურია, რომ პირველი ქულები მსოფლიოსა და ევროპის ჩემპიონის, ნიკოლოზ დერიუგინის პასით ჩავაგდეთ. მას 1982 წელს თვით ამერიკის ნაკრები ჰყავს დამარცხებული (კოლუმბიის მსოფლიოს პირველობაზე). 13 წლის შემდეგ ნაკრებს რომ დასჭირდა უყოყმანოდ მოირგო მაისური რომელსაც გულზე "ჯორჯია" ეწერა.

თუმცა, რომ არა ტრავმა, ეგებ პირველივე ცდაზე მიგვეღწია ევრობასკეტისთვის:

- 1986 წელს მუხლის მძიმე ტრავმა მივიღე. მას მერე 5 წელი გამიცდა. მოედანზე კი დავბრუნდი, მაგრამ, როგორც იტყვიან, ცალი ფეხით ვთამაშობდი. ჯერ უნგრული "მაფთის" ღირსებას ვიცავდი, ხოლო პირველი სანაკრებო მატჩებისას სლოვაკურ "სლოვაკფარმში" ვთამაშობდი. მაშინ ზედმეტი წონა არ მაწუხებდა და, შესაბამისად, მუხლიც ძლიერ არ მტკიოდა, თუმცა მუდმივად შეხვეული მქონდა, მეშინოდა მეორედაც არ დამეზიანებინა. ბურთის რომ ავიღებდი, ვიდრე ზემოთ ავიხედებოდი, დაბლა ვიყურებოდი... ახტომისას მარჯვენა ფეხით ვიწეოდი და ვცდილობდი ორივე ფეხზე ერთად დავმხტარიყავი, რადგან მარცხენა ფეხი არ მეტკინა. ასე რომ, ნაკრებისთვის რასაც შემეძლო იმას ვაკეთებდი, თუმცა ტრავმა თავისუფლად თამაშის საშუალებას არ მაძლევდა, - იხსენებს ნიკოლოზ დერიუგინი.

საქართველოს ნაკრებმა ბირმინგემში გამართული საკვალიფიკაციო ეტაპი დაძლია, შესარჩევი ბოსნიასთან ხმაურიანი გამარჯვებით დაიწყო (77:66) და იმავე ბოსნიასთან ბერლინში რომ მოეგო, ევროპის ჩემპიონატსაც ხელის გაწვდენაზე მიუახლოვდებოდა, მაგრამ საკალათბურთო განგებამ 2011 წლამდე არ ინება "ჯვაროსნების" ევრობასკეტზე ხილვა.

ნიკოლოზ დერიუგინმა კი სანაკრებო კარიერა 1996 წელს პირველი ციკლის შემდეგ 10 მატჩით დაასრულა.

333
მკითხველის კომენტარები / 0 /
მსგავსი ამბები
რუბრიკის სხვა სიახლეები
;