ვინ მიდის ევროლიგიდან NBA-ში დონჩიჩის შემდეგ? - ბითაძე! [VIDEO]

"პოდგორიცას "ბუდუჩნოსტის" შემადგენლობაში ევროლიგაზე გამართული ორი მატჩის შემდეგ გოგა ბითაძემ დაგვანახა ათლეტიზმისა და ტექნიკის უნიკალური მიქსი. ქართველი ცენტრი ჯერ 19 წლისაა, მაგრამ უკვე ჩამოყალიბებული პიროვნება და კალათბურთელია, მალე ევროლიგის წამყვან კალათბურთელად იქცევა და NBA-ში ვიხილავთ," - ვკითხულობთ საიტ "ევროსპორტზე", რომლის ჟურნალისტი დანიელე ფანტინი მეტად საინტერესო პუბლიკაციას გვთავაზობს.

"მას შემდეგ, რაც სლოვენიელი ლუკა დონჩიჩი NBA-ში გადავიდა, გაჩნდა შეკითხვა - ვინ იქნებოდა შემდეგი დიდი ევროლიგელი, ვინც ამერიკის ნაციონალურ საკალათბურთო ასოციაციას მიაშურებდა.

ამ შეკითხვაზე პასუხი უკვე გვაქვს - გოგა ბითაძე, 1999 წლის 20 ივლისს დაბადებული ქართველი ცენტრი, რომელიც "ბუდუჩნოსტის" ღირსებას იცავს.

სამშობლოდან ევროპაში გადასვლის შემდეგ ბითაძე "მეგა ბიმაქსში" ჩაირიცხა, გუნდში, საიდანაც NBA-ში მოხვდა ნიკოლა იოკიჩი.

ამ სეზონში ბითაძემ "მეგა ბიმაქსში" 11 მატჩი გამართა (ადრიატიკის ლიგაზე). 19 წლის ყმაწვილის კვალობაზე სტატისტიკა შთამბეჭდავი ჰქონდა: 20.2 ქულა, 7.9 მოხსნა, 2.5 დაფარება, ორქულიანების რეალიზების 64.5 და სამიანების 41.7 პროცენტი.

ბითაძე თანამედროვე ცენტრია - ეფექტურია ფარქვეშაც და თუ გუნდს დასჭირდა, ახლო და შორი დისტანციიდანაც შეუძლია ტყორცნა.

კარგად ნავარჯიშები ტანით (211 სმ, 112 კგ) გოგას მშვენივრად შეუძლია სირბილი, მობილური ცენტრია და ექსტრემალურად აქტიურია ფარქვეშ მოხსნებისა და დაფარებებისას.

საკუთარი შესაძლებლობები ბითაძემ მსოფლიოს უკეთ დაანახა ევროლიგის საწყის ორ მატჩში. მართალია, მისი "ბუდუჩნოსტი" ერთ-ერთი აუტსაიდერია, მაგრამ "ქართულმა განძმა" თუ ასე განაგრძო, მომავალი სეზონისთვის ევროპის ტოპ-კლუბის შეთავაზებას მიიღებს.

მან ხომ ევროლიგურ დებიუტში, მიუნხენში 17 ქულა, 7 მოხსნა და 4 დაფარება მიითვალა. მომდევნო შეხვედრაში, მილანში - 23 ქულა, 8 მოხსნა და 3 დაფარება ჰქონდა.

ევროპული ტოპ-კლუბისგან წინადადება შეიძლება მიიღოს, მაგრამ ძველ კონტინენტზე, ალბათ, აღარ დარჩება. ივნისში NBA-ს დრაფტზე დადგება. სადღეისო მონაცემებით დრაფტის პირველი წრის ბოლოს ან მეორის დასაწყისში აირჩევენ - 22-ე და 33-ე ნომრებს შორის. ბითაძე დრაფტის ტოპ-5 ცენტრს შორის აუცილებლად იქნება."

6649
მკითხველის კომენტარები / 0 /
მსგავსი ამბები
რუბრიკის სხვა სიახლეები
;