ვინ მონიშნა ვაისმა? შენგელია, ქიმაძე... სანაკრებო სტრატეგია იცვლება?

ბოლო საევროპო თბილისურ მატჩებს საქართველოს ნაკრების მწვრთნელი ვლადიმირ ვაისიც დაესწრო. საერთოდ, ნაკრების მწვრთნელი დიდად რომ არ სწყალობს საქართველოს ჩემპიონატში მოთამაშე ფეხბურთელებს, არ არის ახალი ამბავი და თუ მოვავლებთ თვალს ჩვენს საფეხბურთო ცხოვრებას, დავრწმუნდებით, რომ სლოვაკი სპეციალისტი ბევრ რამეში მართალია...

ფაქტია, საქართველოს ჩემპიონატში მოთამაშე ფეხბურთელების ფიზიკური გამძლეობა და სისწრაფეები ევროპულ სტანდარტებს გვარიანად ჩამორჩება და ამაში დავრწმუნდით ქართული კლუბებისთვის ახლახან დასრულებული ევროტურნირების მაგალითზე.

ჩვენ უნდა ვიცოდეთ ერთი რამ - სანამ თუნდაც ამ კომპონენტში არ გავძლიერდებით, ვიქნებით ასე თითოოროლა გამონათების შემყურე. მერე სწორედ ასეთი გამონათება-გაელველები გვიქმნის ყალბ წარმოდგენას და იმის ილუზიას, რომ ეროვნული ჩემპიონატის დონე ამაღლდა, მერე კი გვიკვირს, რატომ დაგვემართა ის, რაც დაგვემართა თუნდაც "არარატ არმენიასთან"...

თითქოს ავცდით სანაკრებო თემას, მაგრამ ასეც ნუ ვიტყვით - საქართველოს ეროვნულ ნაკრებს, რომელიც ძირითადად ლეგიონერებითაა დაკომპლექტებული, ნებისმიერ მომენტში სჭირდება რეზერისთვის 5-6 ფეხბურთელი. და საიდან უნდა მოვიყვანოთ ეს ფეხბურთელები, თუ არა საქართველოს ჩემპიონატიდან?

ლეგიონერები რომ ბლომად გვყავს, ესეც ვერ იქნება დალხენილი ცხოვრების გარანტია - ზოგი სკამზე ზის, ზოგიც - კატასტროფულად ცოტას თამაშობს... ამიტომაც იყო არა ერთი შემთხვევა, როცა ვლადიმირ ვაისსა და მის წინამორბედებსაც ლამის მთელი შემადგენლობის უთამაშებელი ლეგიონერებით დაკომპლექტება უწევდათ...

და მაინც, მიუხედავად პრობლემებისა, საქართველოს ჩემპიონატის, როგორ რეზევრის ერთ-ერთი წყაროს, იგნორირება არ შეიძლება. ვფიქრობ, უნდა შედგეს ჯგუფი ეროვნული ლიგის იმ ნიჭიერი მოთამაშეებისგან, რომლებიც სპეციალური ინდივიდუალური პროგრამით ივარჯიშებენ და ნებისმიერ მომენტში, ასე თუ ისე, მზად იქნებიან ეროვნული ნაკრებისთვის...

ეს ცალკე თემაა და, რა თქმა უნდა, კამათსა და განსჯას საჭიროებს. თუმცა მიმდინარე შესარჩევ ციკლში ჩვენი ნაკრების სადღეისო მდგომარეობა და უპერსპექტივობა (ახლა ნუ მეტყვით, რომ ამით მოთამაშეებში პესიმიზმს ვთესავ), თავისთავად იძლევა შანსს ექსპერიმენტებისთვის.

მაგრამ მოდით, ნუ დავარქმევთ ამას "ექსპერიმენტს" და იყოს, ვთქვათ, "სანაკრებო სტრატეგიის კორექცია". ანუ, როცა ლეგიონერების ჩანაცვლება თამამად უნდა მოხდეს ეროვნული ჩემპიონატის იმ მოთამაშეებით, ვინც გამოცდილებითა და მომზადების დონით ყველაზე ახლოს არიან ევროპულ სტანდარტებთან.

ახლა ჩვენი მთავარი ორიენტირი არის 2020 წლის მარტი, როცა ერთა ლიგის გადამწყვეტი მატჩები უნდა ჩავატაროთ და როცა ძალიან ახლოს ვიქნებით ევროპის ჩემპიონატის ფინალურ ეტაპთან. ამიტომ, მთელი რესურსი, ჭკუა და გონება ახლა ამ მიმართულებით უნდა მუშაობდეს, ყველა და ყველაფერი უნდა ჩადგეს ამ ერთი მიზნის სამსახურში!

შთამბეჭდავად მოგებულმა ერთა ლიგის ჯგუფურმა ეტაპმა, სადაც ჩვენს კბილა ნაკრებებს ვაჯობეთ, ეტყობა, დათვური სამსახური გაგვიწია და ამიტომაც იყო ძალიან ცივი ის შხაპი, რომელიც ევრო 2020-ის შესარჩევი ციკლის სტარტზე მივიღეთ.

ვფიქრობთ, ამ ფაქტმა ვაისიც დააფიქრა. კაცმა არ იცის, როგორ ფორმაში იქნებიან წამყვანი ლეგიონერები მომავალი წლის მარტისთვის. ამიტომ, მაქსიმალურად მზად უნდა იყოს რეზერვი, რომელსაც ეროვნული გუნდის მწვრთნელი შესარჩევი ციკლის დარჩენილ შეხვედრებში გამოიყენებს და ეცოდინება - ბოლოს და ბოლოს, შეიძლება თუ არა მათზე დაყრდნობა.

შევთანხმდეთ, რომ ერთი და ორის მატჩით არ შეიძლება ფეხბურთელზე დასკვნის გაკეთება. უცხო გარემოში მას გარკვეული დრო სჭირდება ადაპტაციისთვის. ამიტომ, ესა თუ ის ფეხბურთელი პირველ თამაშში რომ ვერ გაამართლებს, ეგრევე ხაზი არ უნდა გადავუსვათ...

ერთი სიტყვით, სანაკრებო სტრატეგიის კორექციისთვის საფუძველიც არსებობს და ეს აუცილებელიცაა. თუ ვინ მონიშნა ვაისმა თავის "ბლოკნოტში" უახლოესი საშინაო სანაკრებო მატჩისთვის  (8 სექტემბერს დანიასთან), ამასაც მალე ვნახავთ...

შეიძლება, ეს იყოს ლევან შენგელია, შეიძლება, იყოს გიორგი ქიმაძე, ან თუნდაც ნიკა ნინუა... ამ სამი დინამოელის გარდა, სავარაუდოდ, სიაში შეიძლება გამოჩნდეს გიორგი კოხრეიძეც "საბურთალოდან"...

დაველოდოთ...

პაატა გელაშვილი
გაზეთი "ლელო"

ყოველდღიური სპორტული გაზეთი "ლელო"
3413
მკითხველის კომენტარები / 0 /
მსგავსი ამბები
რუბრიკის სხვა სიახლეები
;