ვინ რას აკეთებს გოლდენ სტეიტში?

ზაზა ფაჩულიამ სეზონის საუკეთესო მატჩი გამართა, 16 ქულა და 11 მოხსნა მოაგროვა, რაც მისი ამერიკული კარიერის 113 დუბლი გამოდგა. თუმცა მისმა "გოლდენ სტეიტმა" "მინესოტასთან" 103:109 წააგო.
ვფიქრობთ, ეს იყო ყველაზე საინტერესო მატჩი "გოლდენ სტეიტის" შესრულებით, როგორც მინიმუმ ამ სეზონში. რატომ საინტერესო? იმიტომ, რომ ამ შეხვედრაში ყველაზე ნათლად გამოჩნდა მინუსები. არადა, მსოფლიოს ჩემპიონები ბევრისთვის უნაკლონი არიან...
ვიდრე მოთამაშეების განხილვით მატჩის სურათს წარმოვიდგენდეთ, დანაკლისზე უნდა ვთქვათ: "გოლდენ სტეიტს" ვერ ეხმარებოდა გუნდის სული სტეფ კარი და კიდევ ორი მნიშვნელოვანი ფიგურა, ვესტისა და იგუოდალას სახით.

NBA: ზაზა ფაჩულიას 113-ე ორმაგი დუბლი: 16 ქულა, 11 მოხსნა [VIDEO]

კუკი ვინღაა?
გადავხედოთ სასტარტო შემადგენლობას: კუკი, ტომპსონი, დურანტი, გრინი და მაკგი. ქვინ კუკი ვინღაა? დაიბადა კითხვა, რომელზე პასუხი თამაშის მერეც არ მოიძებნა.
თავიდან ბურთი მაინც გადმოჰქონდა, მესამე პერიოდიდან სულ დაიკარგა, როცა ბურთის ტარების პრივილეგიაც დურანტმა ჩამოართვა. თავად იმსჯელეთ: 29 წუთი, 4 ქულა (2-7 თამაშიდან), 4 მოხსნა, 2 პასი, 3 დაკარგვა, და მისი მოედანზე ყოფნის პერიოდში გუნდი 18 ქულით ჩამორჩა მეტოქეს.



ტომპსონი კარის გარეშე?
შესაძლოა, ბევრი არც დაგვეთანხმოს, მაგრამ კლეი ტომპსონი სტეფ კარის გარეშე გაცილებით ცუდი კლეი ტომპსონია, ვიდრე სტეფ კარის გვერდით მოთამაშე. ამას თავისებური ახსნა მოეძებნება: მოედანზე ყოფნისას კარის დაცვა ყველაზე დიდ ყურადღებას აქცევს და დურანტისგან განსხვავებით არც პასები ენანება თანაგუნდელებისთვის.
ტომპსონიც იღებს და დაუფიქრებლად სტყორცნის. სტეფის გვერდით თამაში, როგორც ჩანს, ტომპსონის ფსიქოლოგიაზეც დადებითად მოქმედებს.

როგორი დურანტი უფრო სასარგებლოა?
კევინ დურანტი: 39 ქულა, 12 მოხსნა, 4 პასი, 3 დაფარება. რიცხვები მეტად შთამბეჭდავია, არ ვდავობთ, რომ იგი ერთ-ერთი საუკეთესო მოთამაშეა ლიგაში. მეოთხე პერიოდშიც ბევრი გადამწყვეტი ტყორცნა ჩააგდო, მაგრამ უფრო მეტი გააფუჭა: 32 ნასროლი ბურთიდან მხოლოდ 11 აქვს მოთავსებული კალათში.
შესაძლოა, სტეფ კარის არყოფნაში საკუთარ თავზე თამაშის აღება გამართლებულიც იყოს, თუმცა ციფრები მაინც სხვას გვეუბნება - მისი მოედანზე ყოფნის დროს გუნდი ყველაზე მეტით, 19 ქულით მარცხდებოდა.

იქნებ დურანტს, ცოტათი მეტად მართებდა გუნდზე თამაში.

უინიციატივო გრინი?
რაც შეეხება დრეიმონდ გრინს... იგი როგორც ყოველთვის სტაბილურია თუმცა მასაც მართებდა მომენტებში მეტი ინიციატივის გამოჩენა. გავიხსენოთ ერთ-ერთი ეპიზოდი მეოთხე მეოთხედის დასასრულს: "მეომრები" ქულით მარცხდებოდნენ, როცა დრეიმონდი პირისპირ დარჩა კარლ-ენტონი თაუნსთან, მაგრამ დალოდა და ტომპსონს სამიანისთვის პასი გაუკეთა, რომელმაც ტყორცნა გააცუდა (თამაშში მას 12 დან 3 გამოყენებული სამქულიანი ჰქონდა).

ვის უკვირს მაკგის ასეთი თამაში?
მაკგის ცუდი თამაში არც არავის გაჰკვირვებია, ყოველთვის სტაბილურად სუსტად გამოიყურება ძლიერ ინტელექტუალურ ცენტრებთან.

სათადარიგოები რას აკეთებდნენ?
შონ ლივინგსტონი, აი სწორედ მას მართებდა ყველაზე მეტად ბურთით თამაში სტეფის არყოფნისას. მან თამაშიდან მხოლოდ 6 სროლა მოასწრო 21 წუთის განმავლობაში, მატჩი 8 ქულითა და 1 პასით დაასრულა. არადა შეუძლია...



იანგი?
ნიკ იანგი, როცა სროლა არ მისდის...

რატომ არ იყო ზაზა ბოლო წუთებზე?
დაბოლოს, ზაზა ფაჩულია. მან მართლაც საუკეთესო მატჩი ჩაატარა ამ სეზონში. დურანტისა და ტომპსონის მერე ყველაზე მეტი, 16 ქულა შესძინა გუნდს, თანაც საკმაოდ შტამბეჭდავი პროცენტით შეუტია 7-9 ორიანი და 2-3 საჯარიმო. ამას დაამატა 11 მოხსნა და 3 პასი.
იგი კარგად გამოიყურებოდა დაცვაში და როცა მაკგის ცვლიდა გუნდს აშკარად უმარტივდებოდა დაცვის თამაში.

არის ერთი ნიუანსი რომელსაც მინესოტელთა თავკაცი ტომ ტიბოდო კარგად იყენებდა. ვგულისხმობთ პიკის თამაშს შეტევაში, რის შედეგადაც "მგლების" უკანახაზელები ტიგი და კროუფორდი ხშირად ერთი-ერთზე რჩებოდნენ ფაჩულიასთან და უმეტესად ამ უპირატესობას არც ანიავებდნენ. ალბათ, ესაა მიზეზი, რომლის გამოც სტივ კერი ბოლო წუთებში ზაზას არ ენდო, მიუხედავად იმისა რომ ფარზე ძალიან უჭირდათ.

თამაშში მონაწილეობა კიდევ მიიღო ორმა "მეომარმა" - კევონ ლუნიმ და ომრი კასპიმ (7-7 წუთი), თუმცა მათზე ყურადღების გამახვილება არც ღირს.

რა აკლდა?
აშკარა იყო, "გოლდენ სტეიტს" რაღაცა აკლდა. რაღაცა თუ ვიღაცა? - შემოქმედი, გუნდის სული და გული სტეფ კარი... იგუოდალაც

2914
მკითხველის კომენტარები / 0 /
მსგავსი ამბები
რუბრიკის სხვა სიახლეები