ვინ საით წავა? მოახლოებული ზაფხული და ლეგიონერთა ბედი

ზაფხული ახლოვდება. შესაბამისად, გაიხსნება სატრანსფერო ფანჯარა და ყველას ძალიან გვაინტერესებს, სად გააგრძელებენ კარიერას საქართველოს ეროვნული ნაკრების ფეხბურთელები თუ ნაკრების წევრობის კანდიდატები...

გიორგი ლორია
“მაგდებურგი” სხვა გუნდი გახდა მას შემდეგ, რაც იქ გიორგი ლორია მივიდა. ლორიას კარგი სეზონი აქვს. ცოტა ხნის წინ კვიპროსულ მედიაში გაჩნდა ინფორმაცია, რომ მისი გადაბირება “ანორთოსისს” სურს. ვნახოთ, გადავა საქართველოს ნაკრების მთავარი კიპერი - კვიპროსზე თუ დარჩება გერმანიაში?

გიორგი მაკარიძე
მიუხედავად იმისა, რომ მას კიდევ ერთი წლით აკავშირებს კონტრაქტი “სეტუბალთან”, ადვილი შესაძლებელია, გუნდი დატოვოს. ბოლო დროს, მას შემდეგ, რაც ტრავმა მოიშუშა, გიორგი მაკარიძე შესანიშნავ ფორმაშია. მან “ბენფიკასთან” შეხვედრაში 11-მეტრიანიც მოიგერია, მერე კი პორტუგალიის ჩემპიონატის სიმბოლურ ნაკრებში მოხვდა.

საბა კვირკველია
ყველა ველით, რომ ამ ზაფხულს საბა კვირკველია მოსკოვის “ლოკომოტივიდან” ევროპის ტოპჩემპიონატში მოასპარეზე რომელიმე კლუბში გადავა. მას საამისო პოტენციალი ნამდვილად აქვს. ინტერესი არის, დანარჩენიც გამოჩნდება.

ოთარ კაკაბაძე
ვფიქრობთ, ოთარ კაკაბაძე იმსახურებს იმას, რომ უფრო ძლიერ კლუბში გააგრძელოს კარიერა, ვიდრე შვეიცარიული “ლუცერნია”. ის ტრავმამ შეაფერხა, მაგრამ ვფიქრობთ, მაინც მალე გადავა უკეთეს კლუბში.

თორნიკე ოქრიაშვილი
ამ შემთხვევაში ყველაფერი გადაწყვეტილია და სანერვიულოც არაფერია - საქართველოს ეროვნული ნაკრების ერთ-ერთ ლიდერს უკვე გაფორმებული აქვს კონტრაქტი კვიპროსულ “ანორთოსისთან”. მოგეხსენებათ, ამ გუნდს სულ მალე თემურ ქეცბაია ჩაიბარებს და თორნიკე ოქრიაშვილიც იქ გააგრძელებს კარიერას.

ვაკო გვილია
პოლონური “გურნიკის” ქართველი ნახევარმცველი ისეთ ფორმაში შევიდა, მას ამ კლუბში დიდხანს ნამდვილად არავინ გააჩერებს. სხვა თუ არაფერი, ვაკო გვილიას გარჯას კარგად ხედავენ პოლონური ფეხბურთის წამყვანი კლუბები...

გიორგი ჩაკვეტაძე
ოპერაციამ, რომელიც გიორგი ჩაკვეტაძემ გუშინ გაიკეთა ანტვერპენში მტკივან მუხლზე, შედარებით შეამცირა ზაფხულში მისი ტრანსფერის შანსი. ჩვენი ინფორმაციით, ეს მაინც არ არის გამორიცხული.

გიორგი აბურჯანია
ალბათ დატოვებს “ლუგოს”. ამას წინათ, ესპანურ პრესაში დაიწერა, რომ გიორგი აბურჯანიასთან თანამშრომლობით რამდენიმე კლუბია დაინტერესებული. ალბათ, მართლაც უმჯობესი იქნება, ძალები სხვა გუნდში მოსინჯოს.

საბა ლობჟანიძე
სულაც არ იქნება მოულოდნელი, რომ “რანდერსმა” ზაფხულში ვერ შეინარჩუნოს მისი ერთ-ერთი ლიდერი. საბა ლობჟანიძე კარგ ფორმაშია, მან კარგად აუღო ალღო დანიის სუპერლიგას.

ჯანო ანანიძე
ცოტა ხნის წინ რუსულ მედიაში გავრცელდა ინფორმაცია, რომ ამ სეზონის დასრულების შემდეგ მოსკოვის “სპარტაკი” ჯანო ანანიძეს გაყიდის. დროც არის - ძალიან გვინდა, ჯანომ ევროპაში დაამტკიცოს დასამტკიცებელი. 

ლევან მჭედლიძე
თითქმის ასპროცენტიანი ალბათობით შეგვიძლია დავწეროთ, რომ ლევან მჭედლიძე დატოვებს “ემპოლის”. უკვე რა ხანია, ჩვენებური ტოსკანურ კლუბში უფრო უქმობს, ვიდრე თამაშობს. იქნებ, გარემოს შეცვლამ არგოს. 

ვატო არველაძე
პოლონურ “კორონაში” ადაპტაცია მალე გაიარა. ცოტა ხნის წინ დაიწერა იმის თაობაზე, თითქოს, ვატო არველაძის გადაბირება გლაზგოს “სელტიკს” სურს. ვნახოთ. დღეს ევროპაში ძვირად ფასობენ ახალგაზრდა, ნიჭიერი ფეხბურთელები...

ნიკა კაჭარავა
დაიწერა, ნიკა კაჭარავას გადაბირებასთან ძალიან ახლოსაა მოსკოვის “სპარტაკიო”, მაგრამ ჩვენი ინფორმაციით, დიდი შანსია, ნიკა “ანორთოსისში” დარჩეს. მით უმეტეს, იქ მალე თემურ ქეცბაია შეუდგება მუშაობას. 

2027
მკითხველის კომენტარები / 0 /
მსგავსი ამბები
რუბრიკის სხვა სიახლეები
;