ვის დაიმატებს კელტთა ლიგა

საქართველოში რაგბის განვითარებას აუცილებლად სჭირდება ჩვენი ეროვნული გუნდის ან ჯერ კიდევ არარსებული ფრანჩაიზის რომელიმე მაღალი დონის ტურნირში ჩართვა. ამაზე დიდი ხანია ლაპარაკი მიდის.

ექვსი ერის კარზე კაკუნი ჯერჯერობით უშედეგოა. დარჩა ორი ალტერნატივა, ზე რაგბი ან კელტთა ლიგა. ზე რაგბის უკვე მესამე სეზონია, იაპონური "სანვულვზი" და არგენტინული "იაგუარსი" დაემატა. ეს კი, ამ ქვეყნების ნაკრებებს უკვე მკვეთრად დაეტყოთ. მათი პროგრესი აშკარაა.

კელტთა ლიგაში დიდი ხანია, უკვე იტალიის ორი გუნდი თამაშობს და "სკუადრა აძურაც" აღარ არის ის, რაც იქამდე იყო. შარშან ამ ლიგას ორი სამხრეთაფრიკული ფრანჩაიზიც მიემატა და გუნდების რაოდენობა 14-მდე გაიზარდა.

როგორც ჩანს, ამან გაამართლა და "კელტთა ლიგის" გათამაშების დირექტორმა მარტი ანაიმ "ველშ ონლაინთან" ინტერვიუში თქვა, რომ გუნდების 16-მდე გაზრდა სურთ. ვინ იქნება ორი ახალი გუნდი? ამის თაობაზე მას არაფერი უთქვამს. თქვა, რომ რამდენიმე ვარიანტი განიხილება და გუნდები, რომლებიც "კელტთა ლიგას" დაემატებიან, უნდა იყვნენ კონკურენტუნარიანი, პერსპექტიულები, კარგად დაფინანსებულები და უნდა ჰყავდეთ მრავალრიცხოვან ქომაგები.

ის, რომ კელტთა ლიგა ფართოვდება კარგია. იქ თამაში ქართველი მორაგბეებისთვის ჰაერივით საჭიროა, მაგრამ ყველაფერი ისევ ფინანსებს ებჯინება და ეს წინააღმდეგობა როგორმე თუ არ დავძლიეთ, დიდი შანსია, ქართულ რაგბიში სტაგნაცია დაიწყოს. კელტთა ლიგის გაფართოება კი, შანსია კიდევ უფრო წინ წავიდეთ, განვვითარდეთ.

შეგახსენებთ, რომ იტალიისა და სამხრეთ აფრიკის ორ-ორი ფრანჩაიზის გარდა კელტთა ლიგაში ორი შოტლანდიური, ოთხი ირლანდიური და ამდენივე უელსური ფრანჩაიზი ასპარეზობს. სწორედ ამ გუნდების მორაგბეებისგან შედგება ძირითადად უელსის, ირლანდიის, შოტლანდიისა და იტალიის ნაკრებები.

ყოველდღიური სპორტული გაზეთი "ლელო"
459
მკითხველის კომენტარები / 0 /
მსგავსი ამბები
რუბრიკის სხვა სიახლეები