ვის ენდობა ვაისი?

12 მარტს, დღის პირველ ნახევარში, საქართველოს ეროვნული ნაკრების მთავარი მწვრთნელი ვლადიმირ ვაისი იმ ფეხბურთელთა ვინაობას გაგვაცნობს, რომლებიც ევროპის ჩემპიონატის შესარჩევ ციკლში შვეიცარიისა (23 მარტი, თბილისი) და ირლანდიის (26 მარტი, დუბლინი) ნაკრებთან ითამაშებენ.

სოციალური ქსელის მეშვეობით არაერთი მკითხველი შეგვეხმიანა და დაინტერესდა, რატომ დააგვიანა ვაისმა საუკეთესოების არჩევა. ჩვენი მოსაზრებით, ეროვნული გუნდის დამრიგებელი ამაზე ბევრს ფიქრობდა, რადგან ამ ეტაპზე არჩევანის გაკეთება იოლი არ არის. "ძველი გვარდიის" წარმომადგენელ რამდენიმე ფეხბურთელს აშკარად აკლია სათამაშო პრაქტიკა. მეორე მხრივ, შესარჩევი შედეგიანად უნდა დავიწყოთ და ასეთ დროს ცოტა ძნელია გამოუცდელი ფეხბურთელების ნდობა...

ახლავე ვიცით, რომ სათამაშო პრაქტიკის მხრივ პრობლემები აქვთ გიორგი ნავალოვსკის, თორნიკე ოქრიაშვილს, გიორგი ჭანტურიას... ზოგიერთიც ტრავმირებულია - გიორგი ჩაკვეტაძე, ოთარ კაკაბაძე...

დიდი ალბათობით, სანაკრებო სიაში იქნება პოლონეთში ახლახან გადასული გიორგი გაბედავა. მეორე მხრივ, ქართული მედია გაბედავას ეროვნულ გუნდში გამოჩენას მანამდეც ელოდა, სანამ ის "ჩიხურაში" თამაშობდა. ერთი ეგ არის, ძალიან არ გვინდა, რომელიმე ფეხბურთელმა იფიქროს, რომ ნაკრებში დასამკვიდრებლად აუცილებელია უცხოეთში წასვლა...

დანარჩენს სია გვიჩვენებს...

ყოველდღიური სპორტული გაზეთი "ლელო"
2803
მკითხველის კომენტარები / 0 /
მსგავსი ამბები
რუბრიკის სხვა სიახლეები
;