ვინ იქნება საქართველოს ნაკრების ჯოკერი?

საქართველოს ეროვნული ნაკრების ძირითადი ბირთვი ჩამოყალიბებულია, მაგრამ ძალიან ძნელად მოიძებნება ტურნირი ახალი სახეების გარეშე. არ გვინდა, რომ ერთა ლიგა და საქართველოს ნაკრების შემთხვევა ამ მხრივ გამონაკლისი იყოს.

ვლადიმირ ვაისის გაწვრთნილ გუნდს ამ ტურნირში წარმატებისთვის აუცილებლად დასჭირდება ერთგვარი "ჯოკრები". მათი რაოდენობა ლიმიტირებულია, მაგრამ ისინი მაინც არიან და ჩვენ მათი გვეიმედება.

მაშ ასე, ვინ შეიძლება "გაისროლოს" საქართველოს ეროვნული ნაკრების შემადგენლობაში ერთა ლიგაზე? ეს მხოლოდ ჩვენი პროგნოზია და ერთად ვნახავთ, გამართლდება თუ არა...

გიორგი ჩაკვეტაძე - ის ახლახან მოიყარა 18 წლის, მაგრამ უკვე გადადგა დიდი ნაბიჯი კარიერაში და თანდათან მკვიდრდება ბელგიურ "გენტში". მის მიერ იქაური ჩემპიონატის ერთ-ერთ მატჩში გატანილი გოლი მართლაც რომ შესანიშნავი სანახავი იყო და აკი საუკეთესოდაც აღიარეს. შემოდგომამდე ჩაკვეტაძე კიდევ უნდა გაიზარდოს, როგორც ფეხბურთელი.

საქართველოს ეროვნული ნაკრების ნახევარდაცვაში დიდი კონკურენციაა, მაგრამ თუ ასე გაგრძელდა, "გენტის" შემტევს არა მხოლოდ ეროვნული გუნდის წევრობის, არამედ ძირითად შემადგენლობაში თამაშის ჯანსაღი ამბიციაც ექნება.

კონკურენციას კი არც ერთ დროში არც ერთი გუნდისთვის არ უვნია და რაღა საქართველოს ნაკრები იქნება გამონაკლისი?!

ირაკლი სიხარულიძე - 27 წლის ასაკში, საქართველოს ჩემპიონატის საუკეთესო ბომბარდირის, ფორვარდისა და ფეხბურთელის სტატუსით წავიდა ჩეხურ "სლოვაცკოში".ასაკს მაინცდამაინც ყურადღებას ნუ მივაქცევთ.

არაერთი ფეხბურთელი გვახსოვს თუნდაც ჩვენს საფეხბურთო სინამდვილეში, რომელიც შედარებით გვიან "გაიხსნა". ირკვევა ისიც, რომ სიხარულიძემ "სლოვაცკოზე" არჩევანი ეროვნული გუნდის თავკაცის, ვლადიმირ ვაისის რჩევით გააკეთა. როგორც ჩანს, მწვრთნელს ეიმედება ცენტრფორვარდის, რომელმაც პირველი სანაკრებო გოლი უკვე მიითვალა.

გიორგი ჭანტურია - ვნახოთ, როგორ ფორმაში იქნება შემოდგომისთვის. თუ მისი ფორმა იქნება ოპტიმალურთან მიახლოებული, მაშინ მას თამამად შეუძლია, ვაისის იმ "ჯოკერთაგანი" იყოს, ზემოთ რომ ვილაპარაკეთ.

ცუდი ისაა, რომ ჭანტურიას არა და არ ეშვება ტრავმები. რომ არა ეს, ვფიქრობთ, გაცილებით მეტ სარგებელს მოუტანდა საქართველოს ნაკრებს. და კიდევ ერთი: ჭანტურიამ უკეთ უნდა ისწავლოს გუნდზე თამაში, რასაც ვაისი მართებულად ითხოვს საქართველოს ნაკრების თითოეული მოთამაშისაგან.

გიორგი ბერიძე - "ტრენჩინის" ფლანგელი 20 წლისაა და მას ჯერ არ უთამაშია საქართველოს ნაკრების შემადგენლობაში. როცა ახალგაზრდა ფეხბურთელის სანაკრებო შანსებზე ლაპარაკობ, ძალიან ფრთხილად უნდა იყო.

კაცია და გემოვნება - მიმაჩნია, რომ დღეს ძალიან ცოტა ან თითქმის არ გვყავს ასეთი სწრაფი და ტექნიკური ფლანგელი.

მე ასე მგონია: ჯერ ბერიძის ნიჭი და შესაძლებლობები საქართველოს არც ერთ ასაკობრივ ნაკრებში არ ყოფილა ბოლომდე გამოყენებულ-ამოწურული. თავისი სათამაშო თვისებებით ბერიძე არის უაღრესად თანამედროვე ფეხბურთელი, რომელსაც სწორად გამოყენება სჭირდება.

დაკვირვებული ვარ: როცა გუნდს არ შეუძლია სისწრაფეზე თამაში, მაშინ ბერიძე როგორღაც იკარგება მინდორზე. თუ გვინდა, რომ ერთა ლიგაზე წარმატებით ვითამაშოთ, მაშინ უნდა შევძლოთ კიდეც ისე გარჯა, როგორც ზემოთ დავწერეთ.

გიორგი პაპუნაშვილი - არ მინდა დავიჯერო, რომ ის ბიჭი, რომელიც თავის ასაკში ერთ-ერთი საუკეთესო იყო ევროპაში, ზრდასა და პროგრესს შეწყვეტს. ამ დროისთვის პაპუნაშვილი ესპანურ "სარაგოსაში" თამაშობს.

მან უკვე ძალიან ბევრი ნახა თავისი კარიერის განმავლობაში. გიორგის გვარ-სახელი უკვე ძალიან დიდი ხანია, გვესმის, მაგრამ ეს არ ნიშნავს იმას, რომ სოლიდურ საფეხბურთო ასაკშია.

პაპუნაშვილი მხოლოდ 24 წლისაა და მთელი კარიერა წინ აქვს. მთავარია, მან ბოლომდე აუღოს ალღო ესპანურ ფეხბურთს და "სარაგოსას" მეტი სარგებლობა მოუტანოს.

ასეთ შემთხვევაში ეროვნულ გუნდში თავის გამოჩენის მეტი შანსი ექნება. დღეს ჩვენს ფეხბურთში არცთუ იმდენი გამოკვეთილი ინდივიდუალისტია, რომ პაპუნაშვილი დავივიწყოთ.


ყოველდღიური სპორტული გაზეთი "ლელო"
3674
მკითხველის კომენტარები / 0 /
მსგავსი ამბები
რუბრიკის სხვა სიახლეები