ვიტალი დარასელიას თასი. დინამომ  'მგლებიც' შეჭამა, 'ვულვზს' შანსი არ დავუტოვეთ

თბილისის “დინამომ” ნაადრევად გაინაღდა ვიტალი დარასელიას სახელობის თასის პლეი ოფის საგზური მას შემდეგ, რაც ინგლისურ “ვულვზს” მოუგო, საქართველოს ფეხბურთის ფედერაციის აკადემიის გუნდმა კი კიევის “დინამოს” აჯობა...

სფფ აკადემია-დინამო (კ) 1:0
გოლი: 1:0 ღურწკაია (30)

სფფ: ხარატიშვილი, აბჟანდაძე (64. გრიგალაშვილი), ზოსიაშვილი, პირტახია, რურუა, გ. მამაგეიშვილი (56. ლაბაძე), ო. მამაგეიშვილი, ხიმშიაშვილი (56. ფუტკარაძე), წულუკიძე (53. სორდია), ჭეიშვილი, ღურწკაია (64. გოჩიაშვილი).

მეორე დღე კიევის “დინამოსა” და სფფ-ის აკადემიის გუნდების მატჩით გაიხსნა. კიეველებს “ფეიენოორდთან” პირველ ტურში მოპოვებული 3 ქულა უმაგრებდა ზურგს, ხოლო სფფ-ის აკადემია “ბრაგასთან” აღებული ერთი ქულით გავიდა მოედანზე. 

მატჩი წვიმის თანხლებით წარიმართა, თუმცა საკმაოდ სანახაობრივი გამოდგა. აკადემიის ფეხბურთელებმა გოლი პირველი ტაიმის 30-ე წუთზე გაიტანეს - ზუსტი დარტყმით დიმა ღურწკაია გამოირჩა. მეორე ტაიმში კიეველები ბევრს ეცადნენ სხვაობის აღდგენას, თუმცა გოლი აღარ გასულა და მატჩი ქართველი ბიჭების გამარჯვებით დასრულდა.

ფეიენოორდი-ბრაგა 5:0
გოლები: 1:0 სკიუმი (10), 2:0 ვან ლუნტერენი (17), 3:0 სკიუმი (18), 4:0 სკიუმი (20), 5:0 ვან ლუნტერენი (22)

მეორე დღის მეორე მატჩი უხვგოლიანი გამოდგა და მიმდინარე ასპარეზობის ყველაზე დიდი სხვაობაც დაფიქსირდა. ნიდერლანდელებმა მატჩის ბედი პირველივე ტაიმში გადაწყვიტეს. პორტუგალიელთა მეკარეს თავისი კარიდან 5-ჯერ მოუწია ბურთის გამოტანამ. აღსანიშნავია სებასტიან სკიუმის ჰეთ-თრიკი 12-წუთიან მონაკვეთში, დუბლი კი ხორდი ვან ლუნტერენმა მიითვალა. მეორე ტაიმში ჰოლანდიელებმა მშვიდ რიტმში გადაიყვანეს თამაში და ძალები ბოლო ტურისთვის შემოინახეს.

ციურიხი-ემპოლი 2:2
გოლები: 0:1 პანიკუჩი (1), 0:2 პანიკუჩი (20), 1:2 სტევანოვიჩი (67), 2:2 დენოონი (70)

მესამე შეხვედრაში ერთმანეთის პირისპირ წარსდგნენ “ემპოლი” და “ციურიხი”. იტალიელები ინგლისელებთან მოპოვებული 3 ქულით გავიდნენ მოედანზე, ხოლო “ციურიხმა” თბილისის “დინამოსთან” დიდი ანგარიშით დათმო გუშინწინდელი მატჩი. 

“ემპოლიმ” შეხვედრა აქტიურად დაიწყო და პირველივე წუთებზე ანგარიში ფილიპო პანიკუჩიმ გახსნა. მანვე ტაიმის შუაწელში იტალიელთა სხვაობა ორამდე გაზარდა და შეხვედრის პირველი ნახევარი ეგრეც მორჩა. 

მეორე ტაიმში შვეიცარიელები ბევრს უტევდნენ, იტალიელები კი ცდილობდნენ თამაშის რიტმის შენარჩუნებას. ყველაზე საინტერესო ბოლო 4 წუთი აღმოჩნდა. 67-ე წუთზე მიხაილ სტევანოვიჩმა 11-მეტრიანიდან შეამცირა სხვაობა, ხოლო კომპენსირებულ დროში დანიელ დენოონმა მოხდენილი თავურით “ციურიხი” მარცხისგან იხსნა - 2:2.

დინამო (თბ)-ვულვზი 4:0
გოლები: 1:0 გაგნიძე (14), 2:0 გაგნიძე (21), 3:0 ჯანაშია (49), 4:0 იობაშვილი (62)

დინამოელებმა თავიდანვე მოიპოვეს სათამაშო უპირატესობა და სტანდარტული სიტუაციებიც ბრწყინვალედ გამოიყენეს. მე-14 წუთზე კარგად შეასრულა საჯარიმო დარტყმა ლუკა გაგნიძემ და გახსნა ანგარიში, ხოლო 21-ე წუთზე მანვე პენალტით ანგარიში 2:0 გახადა. 

დინამოელებმა არც მეორე ტაიმში მოუკლეს შეტევებს. 49-ე წუთზე ლუკა ჯანაშიამ სამამდე გაზარდა ანგარიში, საბოლოო შედეგი კი 62-ე წუთზე ჯადული იობაშვილმა ლამაზი გოლით დააფიქსირა. 

ამრიგად, “დინამომ” მეორე მატჩიც დიდი ანგარიშით და გოლგაუშვებლად მოიგო, შესაბამისად, პლეი ოფის საგზურიც ვადაზე ადრე გაინაღდა.

ხუთშაბათი, 18 აპრილი
(B) დინამო (კ)-ბრაგა 12:00
(B) სფფ აკადემია-ფეიენოორდი 14:00
(A) ვულვზი-ციურიხი 16:00
(A) დინამო (თბ)-ემპოლი 18:00

598
მკითხველის კომენტარები / 1 /
titro
0
mere sad ikargebian es bavshvebi ? :))))))))))))))
მსგავსი ამბები
რუბრიკის სხვა სიახლეები
;