ვიტალი დარასელიას თასი ესპანიოლს დარჩა

ვიტალი დარასელიას სახელობის თასის გათამაშება დასრულებულია. გამარჯვებული გახდა "ესპანიოლის" გუნდი, რომელმაც ფინალში მასპინძელი თბილისის "დინამო" დაამარცხა...

ნახევარფინალის პირველ შეხვედრაში ერთმანეთის პირისპირ "ესპანიოლი" და მინსკის "დინამო" წარსდგნენ. მატჩი ესპანელთა კოლოსალური უპირატესობით წარიმართა, თუმცა ანგარიში მხოლოდ მეორე ტაიმში გაიხსნა. ერიკ კუენკამ ტაიმის დებიუტში "მაკრატელა" გაიტანა, ხოლო შემდეგ მატეო რეგატიომ და იმავე კუენკამ მშვიდად მიიყვანეს მატჩი გამარჯვებამდე.

მეორე ნახევარფინალში თბილისის " დინამო" მოსკოვის "სპარტაკს" შეხვდა. ცხადია, მატჩმა გულშემატკივართა დიდი ინტერესი გამოიწვია და აკადემიაში მასპინძელთა საქომაგოდ უამრავი ადამიანი მოვიდა.

თამაში ძლიერი წვიმის ფონზე წარიმართა, თუმცა ამას გუნდებისთვის ხელი არ შეუშლია. მატჩი "დინამოს" უპირატესობით წარიმართა, თუმცა ძირითადი დრო უგოლოდ დასრულდა, სამაგიეროდ, ქართველებმა პენალტების სერიაში იყოჩაღეს და ფინალში გავიდნენ.

დინამო: ხარშილაძე, ხვადაგიანი, კვარაცხელია, ერაძე, მირზიკაშვილი, სიხარულაშვილი (36. ქავთარაძე), სიჭინავა, გაგნიძე, აბუაშვილი, ჩხეტიანი, ზურაბიანი (36. სალუქვაძე).

მესამე ადგილისთვის მატჩში "სპარტაკმა" არ დაინდო მინსკის "დინამო" - 5:0. აღსანიშნავია, რომ ხუთივე გოლი მეორე ტაიმში გავიდა.

ფინალურ მატჩს "დინამო არენამ" უმასპინძლა. ერთმანეთის პირისპირ ტურნირის ორი საუკეთესო გუნდი წარსდგა - "დინამო" და "ესპანიოლი". ორივე გუნდმა ლამაზი ფეხბურთი უჩვენა ქვეყნის მთავარ საფეხბურთო არენაზე მრავლად მისულ ქომაგს.

პირველივე წუთიდან სწრაფი ფეხბურთი გაჩაღდა. უკვე მე-7 წუთზე სტუმრები ჟერარ პერეირას გოლით დაწინაურდნენ. "დინამო" უტევდა, უპირატესობას ფლობდა, მომენტებსაც ქმნიდა, თუმცა... გოლით იქით მიიღო - 0:2.

მეორე ტაიმში "დინამომ" დიდი სათამაშო უპირატესობა მოიპოვა და მეტოქე წნეხში მოაქცია, თუმცა მხოლოდ ერთ საპასუხო გოლს (ჯადული იობაშვილი) გამორჩა. არადა, თამაშის გადარჩენის შანსიც იყო, მაგრამ ირაკლი აზაროვის პენალტი მეკარემ მოიგერია.

"დინამო" ბოლომდე უტევდა, მომენტებიც ჰქონდა... განსაკუთრებით ბოლო წუთზე, როცა ნიკა სიხარულაშვილის დარტყმული მცველმა ცარიელი კარიდან გამოიტანა. საბოლოოდ, გამარჯვება და ტურნირის მთავარი ჯილდო "ესპანიოლს" დარჩა.

დინამო: ხარშილაძე, კვარაცხელია (55. ბაბლუანი), ხვადაგიანი, ერაძე, მირზიკაშვილი, გაგნიძე (41. აზაროვი), მორჩილაძე, სიჭინავა, იობაშვილი, აბუაშვილი, ჩხეტიანი (30. სიხარულაშვილი).

ყოველდღიური სპორტული გაზეთი "ლელო"
750
მკითხველის კომენტარები / 0 /
მსგავსი ამბები
რუბრიკის სხვა სიახლეები
;