ვიტალი დარასელიას მემორიალური. ახალგაზრდებმა უნდა იცოდნენ, რომ არსებობდა ასეთი ფეხბურთელი...

"ამ სახლში ცხოვრობდა ლეგენდარული ქართველი ფეხბურთელი, საუკუნის გოლის ავტორი ვიტალი დარასელია", - ასეთი წარწერა გაჩნდა გუშინ თბილისში, ანტონოვსკაიას ქუჩის ერთ-ერთ კორპუსზე, რომელშიც ერთ დროს ვიტალი დარასელია ცხოვრობდა...

საქართველოს ფეხბურთის ფედერაციის ინიციატივით, მემორიალური დაფა ლეგენდარული ფეხბურთელის დაბადების დღეს, 9 ოქტომბერს გაიხსნა. იქ იყვნენ სფფ-ის ხელმძღვანელები, ვიტალი დარასელიას ოჯახის წევრები, ვეტერანი ფეხბურთელები და ქართული სპორტის მოღვაწეები.

საქართველოს ფეხბურთის ფედერაციის პრეზიდენტმა ლევან კობიაშვილმა, ლეგენდარულმა სპორტულმა კომენტატორმა ჯამლეტ ხუხაშვილმა და ვიტალი დარასელიას ოჯახის წევრებმა ამ დღის მნიშვნელობაზე ილაპარაკეს და აღნიშნეს, რომ ასეთი ხალხის დაფასება და მომავალი თაობისთვის მაგალითის მიცემა აუცილებელია.

ვიტალი დარასელიას ვაჟმა, ვიტალი დარასელია-უმცროსმა მადლიერება გამოხატა ინიციატივის ავტორების მიმართ:

"ამ ლამაზი დღისთვის და მამაჩემის დაფასებისთვის მადლობა ფეხბურთის ფედერაციას, თბილისის მერიას და ყველას, ვინც ამის ორგანიატორია. მიხარია, რომ საქართველოში ვიტალის სახელი დღესაც ახსოვთ. ძალიან მნიშვნელოვანია, რომ ახალგაზრდა ფეხბურთელებმა იცოდნენ ასეთი ადამიანის არსებობის შესახებ და მისი საფეხბურთო ცხოვრება მაგალითად გაიხადონ".

"ახლა ხალხს ეცოდინება, რომ ამ სახლში ის ფეხბურთელი ცხოვრობდა, რომელიც ქართულ ფეხბურთს წარმოადგენს არა მხოლოდ იმ მთავარი გატანილი გოლისა და გამარჯვების გამო, რომლითაც დღემდე ვამაყობთ, არამედ იმიტომაც, რომ მან უდიდესი წვლილი შეიტანა ქართული ფეხბურთის განვითარებაში", - თქვა კობიაშვილმა.

804
მკითხველის კომენტარები / 0 /
მსგავსი ამბები
რუბრიკის სხვა სიახლეები
;