ვიტალი დარასელიას სახელობის თასი: დინამომ გაინაღდა

თბილისის "დინამოს" აკადემიაში მიმდინარე ვიტალი დარასელიას სახელობის ტურნირზე ჯგუფური ეტაპის მეორე ტურის მატჩები გაიმართა.

დღის პირველ შეხვედრაში ერთმანეთს სფფ-ის აკადემია და კიევის "დინამო" დაუპირისპირდნენ. პირველ ტურში ორივე გუნდმა მარცხი იწვნია და აქედან გამომდინარე, მატჩი პრინციპულ ხასიათს ატარებდა.

ქართულმა გუნდმა თამაში საკმაოდ აქტიურად დაიწყო და ერთმანეთის მიყოლებით რამდენიმე მწვავე შეტევას ლუკა მაყაშვილის გოლიც მოჰყვა. ტაიმის ბოლომდე კიეველებმა წონასწორობის აღდგენა მოახერხეს.

გოლი რუსლან ბერეზანსკიმ გაიტანა. მეორე ტაიმში უკრაინელებმა უფრო უმატეს ტემპს და მათი მორიგი შეტევა გიორგი გრიგალაშვილის ავტოგოლით დასრულდა. კიევის "დინამომ" ცოტა ხანში მესამე გოლიც (ივან ვიდოსევიჩი) გაიტანა და საბოლოო ანგარიში დააფიქსირა - 3:1.

სფფ-ის აკადემია: კაპანაძე, ტალახაძე, სეხნიაშვილი (43. ბეჭვაია), აბჟანდაძე, გრიგალაშვილი, ჟივიძე, ფოცხვერია, მაყაშვილი, მეხტიევი (47. გოგოხია), პატაშური (51. კოტია), ქუნთელია.

მეორე შეხვედრაში პირველ ტურში გამარჯვებულები - "ესპანიოლი" და მოსკოვის "სპარტაკი" წარდგნენ ერთმანეთის პირისპირ. კატალონიელმა ბიჭებმა 3:1 გაიმარჯვეს.

სანახაობრივი გამოდგა მინსკის "დინამოსა" და არნემის "ვიტესის" მატჩი. ორივე გუნდი მთელი მატჩის განმავლობაში შეტევაზე იყო ორიენტირებული, საბოლოო ანგარიშიც ზუსტად ასახავს თამაშის მსვლელობას - 3:2 ბელარუსთა სასარგებლოდ.

დღის ბოლო შეხვედრაში თბილისის "დინამო" "ჯენოას" შეხვდა. პირველი ტურის შემდეგ ორივე გუნდს 3-3 ქულა ჰქონდა, შესაბამისად, გუშინდელ შეხვედრაში გამარჯვება ქართულ გუნდს პირველ ადგილს გაუნაღდებდა...

მასპინძლებმა მატჩი აქტიურად დაიწყეს და უკვე მე-3 წუთზე ზურაბ ერაძემ ზუსტი თავურით ანგარიში გახსნა. დინამოელებმა შეტევებს უმატეს და მე-10 წუთზე მეორე გოლიც გაიტანეს. ზუსტი დარტყმა გიორგი აბუაშვილმა შეასრულა.

მოიპოვეს რა კომფორტული უპირატესობა, თბილისელები დამშვიდდნენ. იტალიელები ცდილობდნენ შეტევების განხორციელებას, თუმცა რეალურ საგოლე მომენტებამდე საქმე არ მისულა. დინამოელები კი ბოლომდე აკონტროლებდნენ თამაშს და საბოლოოდ 2:0 გაიმარჯვეს. ამით ვახტანგ იაგორაშვილის გუნდმა ნახევარფინალის საგზურიც გაინაღდა.

თამაშის ბოლოს ფეხბურთელებს შორის ფიზიკური შეხლა-შემოხლა მოხდა, თუმცა ვითარება მალევე განიმუხტა.

დინამო: ხარშილაძე, ხვადაგიანი, კვარაცხელია, ერაძე, მირზიკაშვილი, სიხარულაშვილი (28. იობაშვილი), სიჭინავა (70. შურღაია), გაგნიძე (49. შაუთიძე), აბუაშვილი, მორჩილაძე (61. ბაბლუანი), ჩხეტიანი.

ყოველდღიური სპორტული გაზეთი "ლელო"
987
მკითხველის კომენტარები / 0 /
მსგავსი ამბები
რუბრიკის სხვა სიახლეები
;