ვიტალი დარასელიას სახელობის ტურნირზე 'დინამომ' მოგებით დაიწყო

გუშინ თბილისის "დინამოს" აკადემიაში ვიტალი დარასელიას თასის გათამაშება დაიწყო. ტურნირის გახსნით შეხვედრაში ერთმანეთს სფფ-ის აკადემიის და "ესპანიოლის" გუნდები დაუპირისპირდნენ. საინტერესო მატჩი მაღალ ტემპში წარიმართა.

სათამაშო უპირატესობას ძირითადად სტუმრები ფლობდნენ, ქართული გუნდი კი მეტოქეს სახიფათო კონტრშეტევებით პასუხობდა, განსაკუთრებით - მეორე ტაიმში იგრძნობოდა. ესპანელებმა უპირატესობა თითო ტაიმში გატანილ თითო გოლში ასახეს და საბოლოოდ 2:0 იმარჯვეს. გოლები პოლ მოლინამ და პოლ ფელისესმა გაიტანეს.

სფფ აკადემია: ხაბაზი, ტალახაძე, აბჟანდაძე, გრიგალაშვილი, ლატარია, ფოცხვერია, მაყაშვილი, მეხტიევი (47. გოგოხია), პატაშური (52. სეხნიაშვილი), ბეჭვაია (39. ჟივიძე), ქუნთელია (39. თავზარაშვილი).

მეორე შეხვედრაში ერთმანეთის პირისპირ მოსკოვის "სპარტაკი" და ტურნირის მოქმედი გამარჯვებული კიევის "დინამო" წარსდგნენ. თამაში ორივე გუნდმა აქტიურად დაიწყო, მომენტებიც ორივე კართან შეიქმნა, თუმცა "სპარტაკმა" მეთოდურად ხელთ იგდო უპირატესობა და 28-ე წუთზე მაქსიმ ერმაკოვმა ანგარიშიც გახსნა.

მეორე ნახევრის დებიუტში სპარტაკელმა მიხაილ პილიპენკომ, ხოლო 69-ე წუთზე არგამ საფარიანმა ორი უპასუხო გოლი გაიტანეს და თამაში ასეც მორჩა - 3:0.
"ჯენოასა" და "ვიტესის" მატჩი უფრო უხვგოლიანი გამოდგა.

იტალიელები თავიდანვე აქტიურ, სწრაფ შეტევებზე გადავიდნენ და სამწუთიან ინტერვალში 2 გოლი გაიტანეს. პიეტრო ვასალოსა და ტომაზო ბაშეროტის გოლები მოგვიანებით ვიტესელმა მელვინ ესაიასმა გაქვითა - 2:1. მეორე ნახევარში იმავე ბაშეროტიმ კიდევ ერთხელ დაამწუხრა მეტოქე და საბოლოო ანგარიში დააფიქსირა - 3:1.

პირველი დღის ბოლო შეხვედრაში თბილისის "დინამო" მინსკელ თანაკლუბელებს დაუპირისპირდა. ვახტანგ იაგორაშვილის შეგირდებმა უპირატესობა პირველივე წუთებიდან მოიპოვეს. თბილისელები ბევრს უტევდნენ, ხელსაყრელ მომენტებსაც ფლანგავდნენ. ერთხელ ბელარუსებსაც შეეძლოთ გატანა, მაგრამ მასპინძელი მეკარე ლუკა ხარშილაძემ იხსნა.

მეორე ტაიმში, როგორც იქნა, თბილისელთა შეტევებმა შედეგი გამოიღო და 50-ე წუთზე ზაურ სიჭინავამ 11-მეტრიანით გახსნა ანგარიში. სამიოდე წუთში კი გიორგი ჩხეტიანმა მეორედ აიღო მინსკელთა კარი. საბოლოოდ - 2:0.

დინამო (თბ): ხარშილაძე, ხვადაგიანი, კვარაცხელია, ერაძე, მირზიკაშვილი, სიხარულაშვილი (60. ბაბლუანი), სიჭინავა, გაგნიძე (68. გოგობერიშვილი), აბუაშვილი (60. შაუთიძე), ჩხეტიანი, ზურაბიანი (51. იობაშვილი).

ყოველდღიური სპორტული გაზეთი "ლელო"
653
მკითხველის კომენტარები / 0 /
მსგავსი ამბები
რუბრიკის სხვა სიახლეები
;