ვიტალი დარასელია 60

წელს 35 წელი სრულდება ლეგენდარული ფეხბურთელის, ვიტალი დარასელიას გარდაცვალებიდან. თბილისის "დინამოს: ისტორიაში ყველაზე მნიშვნელოვანი გოლის ავტორი 1982 წლის 13 დეკემბერს, რიკოთზე, სოფელ უბისასთან ავტოავარიას შეეწირა.

ამავე დროს, წლეულს "დინამოს" ყოფილ ვარსკვლავს 60 წელი შეუსრულდებოდა. ამ ფაქტთან დაკავშირებით, საქართველოს სპორტულ ჟურნალისტთა ასოციაციამ გამოსცა წიგნი "ვიტალი დარასელია 60", რომლის პრეზენტაციაც დღეს მიხეილ მესხის სახელობის სტადიონზე გაიმართა.

წიგნი ჟურნალისტმა ლაშა გოდუაძემ შეადგინა, რომელმაც ფეხბურთელის შესახებ სხვადასხვა დროს გამოქვეყნებული წერილებს, ინტერვიუებს, ჩანახატებს, მოგონებებსა და ვიტალი დარასელიას არქივიდან ფოტოებს მოუყარა თავი.

პრეზენტაციას ესწრებოდნენ ვეტერანი ფეხბურთელები, ვიტალი დარასელიას ოჯახის წევრები, გულშემატკივრები, სპორტისა და ახალგაზრდობის საქმეთა მინისტრი ტარიელ ხეჩიკაშვილი და მინისტრის მოადგილე შალვა გოგოლაძე, ფეხბურთის ფედერაციის გენერალური მდივანი დავით მუჯირი და ვიცე-პრეზიდენტი კახა ჭუმბურიძე.

"ეს წიგნი დიდი სიყვარულით იქმნებოდა. ჩვენ ყველანი ბედნიერები ვიქნებოდით 60 წლის იუბილე ბატონ ვიტალისთან ერთად რომ აღგვენიშნა, მაგრამ მომხდარს ვერ შევცვლით. ისღა დაგვრჩენია, ასეთი ადამიანების ხსოვნას წიგნებით მაინც მივაგოთ პატივი. მადლობა ყველას, ვინც მის მომზადებაში დაგვეხმარა" - ამბობს ლაშა გოდუაძე.

ტარიელ ხეჩიკაშვილი, სპორტისა და ახალგაზრდობის საქმეთა მინისტრი: "საქართველოს სპორტულ ჟურნალისტთა ასოციაციამ წელს რამდენიმე კარგი წიგნი გამოსცა და წლის მიწურულს კიდევ ერთი გამოცემით გაგვახარა - ეს წიგნი ეძღვნება ქართველ ფეხბურთელს, რომელსაც ერთი სიტყვით მოვიხსენიებ - ლეგენდა! ის დინამო" რომ ამხსოვს, ქართული ფეხბურთის მომავლის ამიტომაც მჯერა.

დარასელიას საქართველოს ემსახურებოდა და დღემდე მის ერთიანობას ემსახურება - მისი იუბილეს ჩვენი აფხაზი ძმებიც აღნიშნავენ. პატარა ბიჭი ვიყავი, როდესაც ამ ბუმბერაზ ფეხბურთელს ავტოგრაფი ჩამოვართვი და მას დღემდე სახლში რელიქვიასავით ვინახავ. ამიტომ ამ წიგნის გამოცემა ჩემთვის განსაკუთრებულ ემოციებს აღძრავს".

1688
მკითხველის კომენტარები / 0 /
მსგავსი ამბები
რუბრიკის სხვა სიახლეები
;