ვლადიმერ გუცაევი: გულშემატკივარი ითხოვს ამ ჯგუფში პირველ ადგილს!

საქართველოს ეროვნული ნაკრები, ქართული ფეხბურთი, მასში მიმდინარე ტენდენციები – ამ თემაზე ესაუბრა "ლელო" ქართული ფეხბურთის ყველა დროის ერთ-ერთ ყველაზე კაშკაშა ვარსკვლავს, ვლადიმერ გუცაევს.

იყო დრო, ის ფეხბურთის გულშემატკივრებისათვის დაუვიწყარ საფეხბურთო სპექტაკლებს დგამდა. წვრთნიდა საქართველოს ეროვნულ და ახალგაზრდულ ნაკრებებს. ზოგადად, გუცაევი ფეხბურთზე მოფიქრალი, ანალიზის გამკეთებელი კაცია და მასთან საუბარი ყოველთვის ძალიან საინტერესოა. ვფიქრობთ, გამონაკლისი არც ეს ინტერვიუ იქნება. გთავაზობთ ამონარიდებს ინტერვიუდან, რომლის სრულ ვერსიას "ლელოს" 13 მარტის ნომერში იხილავთ.

- დავიწყოთ ერთა ლიგის წილისყრით. როგორ აფასებთ ჯგუფს, სადაც საქართველოს ნაკრებთან ერთად ასპარეზობენ ყაზახეთის, ლატვიისა და ანდორას უპირველესი გუნდები?

- რა თქმა უნდა, ეს არის ისეთი ჯგუფი, სადაც ჩვენ მხოლოდ და მხოლოდ წარმატებაზე უნდა ვიფიქროთ. არ არის ეს ისეთი ბარიერი, რომლის დაძლევაც აღემატებოდეს საქართველოს ეროვნული ნაკრების ძალებს. დარწმუნებული ვარ, რომ ჯგუფში პირველ ადგილზე გასვლა ჩვენს ძალებს არ აღემატება. ამასთან ერთად, ჩვენ ბოლომდე უნდა დავაფასოთ ყველა მეტოქე.

მნიშვნელოვანია ის, რომ საქართველოს ნაკრების მწვრთნელი ვლადიმირ ვაისი გუნდთან ერთად უკვე მეორე შესარჩევ ციკლს იწყებს. მან უკვე იცის მისი ფეხბურთელების პლუს-მინუსები. ამასთან, მჯერა, რომ გასული შესარჩევი ციკლის მსვლელობიდან ის შესაბამის დასკვნებს გამოიტანს და საქართველოს ნაკრებს უფრო შედეგიანად და უკეთესად აათამაშებს.

ამოცანა უნდა იყოს მხოლოდ და მხოლოდ ჯგუფის მოგება?

- რა თქმა უნდა, ასე უნდა იყოს. თუ ეს ასე არ მოხდა, დიდიან-პატარიანად ყველამ უნდა დავკეტოთ კარები და წავიდეთ სახლში. თუ ეს ასე არ მოხდა, მაშინ ფეხბურთი საერთოდ არ ყოფილა საქართველოში. საქართველოს ფეხბურთის ფედერაცია ნაკრებს ყველანაირ პირობას უქმნის. ახლა ჯერი ეროვნულ გუნდზეა. რა თქმა უნდა, გულშემატკივარი ითხოვს ამ ჯგუფში პირველ ადგილს და ვერავინ იტყვის, რომ ეს მოთხოვნა არაა საფუძვლიანი.

ინტერვიუს სრული ვერსია იხილეთ გაზეთ "ლელოს" 13 მარტის ნომერში

3195
მკითხველის კომენტარები / 0 /
მსგავსი ამბები
რუბრიკის სხვა სიახლეები
;