ვლადიმირ ვაისი: ახლა დროა, გავიმარჯვოთ...

ლოზანაში უეფას ერთა ლიგის წილისყრას საქართველოს ფეხბურთის ფედერაციის პრეზიდენტი ლევან კობიაშვილი, გენერალური მდივანი დავით მუჯირი, ვიცე-პრეზიდენტი ალექსანდრე იაშვილი და ეროვნული ნაკრების მთავარი მწვრთნელი ვლადიმირ ვაისი ესწრებოდნენ. წილისყრის დასრულების შემდეგ ვაისმა შედეგები შეაფასა:

"რასაკვირველია, ჩვენი სურვილია მიზნის მიღწევა. თუმცა, ყველა მეტოქეს პატივი უნდა ვცეთ. ყაზახეთის ფეხბურთს კარგად ვიცნობ, ლატვიასაც ცოტა ხნის წინ ვეთამაშეთ და არც ანდორა იქნება იოლი მეტოქე.

იმედია, ჩვენი ნაკრების ფეხბურთელებისთვის 2018 წლის სეზონის დასაწყისი წარმატებული იქნება და საშემოდგომოდ ერთა ლიგის ჯგუფური ეტაპისთვის ისინი მზად იქნებიან.

ჩვენი ნაკრების ყველა წევრი, ისევე, როგორც ყველა ქართველი, ოცნებობს დიდ ტურნირზე თამაშის უფლების მოპოვებაზე. ეს ახალი ტურნირი ყველა ქვეყნისთვის ევროპის ჩემპიონატზე გასვლის შესანიშნავ შანსს იძლევა.

რა თქმა უნდა, განსაკუთრებით სანახაობრივი მოწინავე ჯგუფებში მოხვედრილი წამყვანი გუნდების თამაშები იქნება. რაც შეეხება ჩვენს ჯგუფს, მიმაჩნია, რომ ყველა გუნდს აქვს გამარჯვების და წარმატების შანსი. შემოდგომისთვის ყველა მეტოქესთან შესახვედრად თანამიმდევრობით მოვემზადებით.

გასულ შესარჩევში ბევრჯერ ვაჩვენეთ კარგი თამაში. თუმცა, სასურველი შედეგის მიღწევა ვერ შევძელით. ახლა დროა, გავიმარჯვოთ. ევროპის ჩემპიონატზე გასვლა თუ გსურს, აუცილებლად უნდა გაიმარჯვო ჯგუფში", - ამბობს ვაისი.

კომენტარი ფეხბურთის ფედერაციის პრეზიდენტმაც გააკეთა: "ერთა ლიგის ფორმატი ძალიან საინტერესოა: რეალურად, ამხანაგურ თამაშებს ეს ფორმატი ჩაანაცვლებს.

რაც შეეხება წილისყრას, მიმაჩნია, რომ საინტერესო ჯგუფია, იოლი თამაშები არ იქნება, ჩემთვის პრინციპულად მნიშვნელოვანი იყო არა ის, თუ ვინ შეგვხვდებოდა, არამედ ის, რომ სექტემბრისთვის გვყავდეს გუნდი, რომელიც ნებისმიერ მოწინააღმდეგესთან მოიგებს.

ეს უნდა იყოს ჩვენი ამოცანა, აქეთკენ უნდა წავიდეთ და ვიმუშაოთ. ჩვენ ვთვლით, რომ ეს არის შანსი. დარწმუნებული ვარ, ერთა ლიგაში ყველა გუნდი ასე ფიქრობს".

ყოველდღიური სპორტული გაზეთი "ლელო"
1207
მკითხველის კომენტარები / 0 /
მსგავსი ამბები
რუბრიკის სხვა სიახლეები
;