ვლადიმირ ვაისი: კიტეიშვილის თამაშმა გამახარა - ძალიან კარგი ფეხბურთელი და პიროვნებაა

ვსტრიის პატარა ქალაქ შვაცში მალტასთან მინიმალური ანგარიშით გამარჯვების შემდეგ საქართველოს ნაკრების მწვრთნელმა ვლადიმირ ვაისმა თამაში მედიის წარმომადგენლებთან შეაფასა:

"პირველ ტაიმში უპირატესობას ვფლობდით, თუმცა მომენტების რეალიზება არ გამოგვივიდა. მეორე ნახევარში გვილიას გაძევებამ ჩვენი გეგმები შეცვალა. გუნდი 4-2-3-1 სისტემით კარგად მოქმედებდა. შემდეგ ხოჭოლავა საყრდენ ნახევარმცველად გადავიყვანე. გამოჩნდა სირთულე, რადგან რამდენიმე მოთამაშე კლუბში 90 წუთს არ თამაშობს. 10 ფეხბურთელით ნებისმიერ გუნდთან რთულია მოგება. გამარჯვების გოლი ბოლო წუთზე 100%-იანი პენალტით გავიტანეთ", - ამბობს ვლადიმირ ვაისი.

სლოვაკმა სპეციალისტმა ფეხბურთელები გამოარჩია: "კიტეიშვილის თამაშმა გამახარა - ძალიან კარგი ფეხბურთელი და პიროვნებაა. სწორედ ასეთი უნდა იყოს დებიუტანტი, რომელსაც სურს გუნდში ადგილის დამკვიდრება. მარცხენა მცველის პოზიციაზე კარგი იყო ლაშა დვალიც. მან ჩემი დავალებები ზუსტად შეასრულა".

ვაისმა 5 ივნისს ლუქსემბურგთან გასამართ მატჩზეც ილაპარაკა: "მალტა კარგი გუნდია, თუმცა მომდევნო მეტოქესთან თამაში უფრო რთული იქნება. ლუქსემბურგთან ცვლილებებს განვახორციელებ. ეს იმითაც იქნება გამოწვეული, რომ მომდევნო შეხვედრაში რამდენიმე ფეხბურთელი შემოგვიერთდება".
შეგახსენებთ, რომ ლუქსემბურგთან მატჩისთვის ნაკრებს სამი ფეხბურთელი დაემატება - ჯაბა კანკავა, ჯაბა ჯიღაური და ოთარ კაკაბაძე. სამწუხაროდ, ცნობილი გახდა, რომ ტრავმების გამო ნაკრებს ნიკა კვეკვესკირი და ბაჩანა არაბული ვერ დაეხმარებიან. წინასწარი შეთანხმებით, საკლუბო მატჩების გამო, მათ ავსტრიული შეკრება გამოტოვეს, შემდეგ კი დაშავდნენ.

გუშინ საქართველოს ნაკრებმა ავსტრიიდან ლუქსემბურგში გადაინაცვლა და უკვე ივარჯიშა კიდეც. 5 ივნისის მატჩი ჩვენი დროით 22 საათზე დაიწყება.

გურამ კაშია: ამდენი საგოლე მომენტი გუნდურობით იქმნება

მალტასთან მატჩის შემდეგ კომენტარი ფეხბურთელებმაც გააკეთეს. გიორგი ბერიძემ პირველი სანაკრებო შეხვედრა ჩაატარა. ვლადიმირ ვაისმა ის მოედანზე მეორე ტაიმში შეუშვა:

"გახარებული ვარ, რომ ეროვნულ ნაკრებში სადებიუტო თამაში ჩავატარე. პირველ ტაიმში შეგვეძლო, ყველაფერი დაგვესრულებინა, რადგან ბევრი საგოლე მომენტი გვქონდა. მეორე ნახევარში კაცნაკლულები ვიყავით და თამაში გართულდა, მაგრამ მთავარია, სასურველ შედეგს მივაღწიეთ".

საინტერესო შეფასება გააკეთა ერთადერთი გოლის ავტორმა გურამ კაშიამ: "მოედანზე ათი კაცით დავრჩით და მდგომარეობა გავირთულეთ. რაც შეეხება პირველ ტაიმს, თამაშის ამ მონაკვეთს ძალიან დადებითად შევაფასებ. ბევრი მომენტი შევქმენით და ეს, რა თქმა უნდა, კარგია, რადგან ასეთი მომენტები გუნდურობით იქმნება. კარგია ისიც, რომ გამარჯვება სწორედ ათი კაცით შევძელით. ეს დავიმსახურეთ, მაგრამ უფრო მეტი უნდა გაგვეტანა და უფრო დამაჯერებლად მოგვეგო".

კაშიამ ბოლო სანაკრებო თამაშებიც შეაფასა: "ბოლო თამაშებს პოზიტიურად შევაფასებ, რადგან ზედიზედ 3 თამაში მოვიგეთ და ერთი გოლიც არ გაგვიშვია. ვფიქრობ, სწორი გზით მივდივართ. მწვრთნელიც კმაყოფილია, ფეხბურთელებიც... შეიძლებოდა, დღევანდელი თამაშის ხარისხი უკეთესიც ყოფილიყო, მაგრამ არ დაგვავიწყდეს, რომ ჩვენ მოვიგეთ და ეს ყველაზე მთავარია. მით უმეტეს, სანაკრებო თამაშები სეზონის ბოლოს იოლი არ არის. ისიც გასათვალისწინებელია, რომ ბევრი წამყვანი ფეხბურთელი გვაკლდა".

ოთარ კიტეიშვილი: ეს შანსი ყველამ უნდა გამოვიყენოთ

საქართველოს ნაკრებმა გაიმარჯვა პენალტით, რომელიც ოთარ კიტეიშვილის აქტიურობას მოჰყვა. 22 წლის ნახევარმცველმა "ლელოსთან" კომენტარი გააკეთა:
"პირველი ტაიმი კარგად ჩავატარეთ, ბევრი საგოლე მომენტი შევქმენით და ცოტა რომ გაგვმართლებოდა, მინიმუმ, ორ გოლს მაინც ვიმსახურებდით. რაც შეეხება მეორე ტაიმს, კაცნაკლულები დავრჩით, რამაც შეხვედრის სცენარზე გავლენა იქონია. მალტამ თამაში შედარებით გაათანაბრა. თუმცა გუნდმა ბოლომდე იბრძოლა და წარმატებას მიაღწია", - ამბობს კიტეიშვილი.

მან საკუთარ თამაშზეც ილაპარაკა: "კარგია, შეხვედრას რომ იგებ და გამარჯვებაში წვლილი შეგაქვს - ეს ყოველთვის სასიამოვნოა. ამ შეკრებაზე, ჩემი ჩათვლით, ბევრი ახალგაზრდა ფეხბურთელი ვიყავით. ეს არის რეალური შანსი, რომელიც უნდა გამოვიყენოთ. ჩვენ უნდა გავაგრძელოთ განვითარება და პროგრესი, ნაკრებში ადგილი რომ დავიმკვიდროთ".

მალტამ მეორე ტაიმის დასაწყისში შემოგვიტია, მაგრამ უცნაურია, რომ ათკაციანმა საქართველოს ნაკრებმა თამაშის სადავეები არ დაკარგა. თბილისის "დინამოს" კაპიტანს ამაზეც ვკითხეთ: "მიუხედავად იმისა, რომ კაცნაკლულები დავრჩით, ამ შეხვედრაში გამარჯვება გვინდოდა და ეს მოვახერხეთ კიდეც. გვილიას გაძევების შემდეგ ვაისმა ცვლილებები განახორციელა და ამანაც იმოქმედა. საერთოდ, ასეთ მეტოქეებთანაც მნიშვნელოვანია მოგება. ასე რომ, გადამწყვეტი იყო მოტივაცია".

საბა ლობჟანიძე: რეალიზაციაპრობლემაა

დანიური "რანდერსის" თავდამსხმელი საბა ლობჟანიძე, მალტასთან მოგების მიუხედავად, საგოლე მომენტების გამოუყენებლობით უკმაყოფილოა.
"მალტასთან კარგი თამაში გამოვიდა, ბევრი მომენტი გვქონდა პირველ ტაიმში და უნდა გაგვეტანა კიდეც. მომენტების გამოუყენებლობა ერთ-ერთი პრობლემაა. რაც შეეხება ლუქსემბურგს, ისევ გამარჯვებისთვის ვემზადებით, რადგან ერთა ლიგამდე მხოლოდ ეს თამაში დაგვრჩა. გამარჯვებულის მენტალიტეტის ჩამოყალიბებისთვის აუცილებელია, 5 ივნისსაც მოვიგოთ", - ამბობს ლობჟანიძე.

ჯაბა ჯიღაური: შეკრება გამარჯვებით უნდა დავასრულოთ

ჯაბა ჯიღაურმა მალტასთან მატჩი ყაზახეთის ჩემპიონატის გამო გამოტოვა, რაც წინასწარ იყო შეთანხმებული. ის უკვე შეუერთდა ნაკრებს და მზადაა, თანაგუნდელებს ლუქსემბურგთან მატჩში დაეხმაროს.

"ჩემს თანაგუნდელებს მალტასთან გამარჯვებას ვულოცავ. რაც შეეხება ლუქსემბურგთან მატჩს, მზადება ნორმალურად მიმდინარეობს და კარგი იქნება, თუ შეკრებას გამარჯვებით დავასრულებთ", - თქვა ჯიღაურმა.

ყოველდღიური სპორტული გაზეთი "ლელო"
541
მკითხველის კომენტარები / 0 /
მსგავსი ამბები
რუბრიკის სხვა სიახლეები