ვლადიმირ ვაისი: საქართველოს ნაკრების ბოლო მწვრთნელებს შორის ყველაზე დაბალი გასამრჯელო მაქვს

სასტუმრო "რუმსში" ქართულ მედიას საქართველოს ნაკრების მთავარი მწვრთნელი ვლადიმირ ვაისი და ფეხბურთის ფედერაციის ვიცე-პრეზიდენტი ალექსანდრე იაშვილი შეხვდნენ და არაერთ მნიშვნელოვან საკითხზე ილაპარაკეს.

ვლადიმირ ვაისი, საქართველოს ნაკრების მთავარი მწვრთნელი:

- ბოლო დროს ხშირად იმეორებთ, რომ ნაკრებს არ ჰყავს იმ მეტოქის დონის ფეხბურთელები. იგივეს ამბობდა თემურ ქეცბაია. მაშინ ფეხბურთის ფედერაციასთან კონტრაქტი რატომ გაახანგრძლივეთ?

- მე სხვაგვარად ვთქვი, რომ ჩვენი მოთამაშეები არ იყვნენ სასურველ კონდიციაში ამ კონკრეტულ მომენტში, შვეიცარიასთან და ირლანდიასთან თანაბრად რომ ეთამაშათ. მეტიც, ამ მდგომარეობაში ერთა ლიგაზეც გაგვიჭირდებოდა - ვგულისხმობ ტრავმებსა და სათამაშო კონდიციებს და არა იმას, რომ ცუდი ფეხბურთლები გვყავს.

მე არ მესმის, ქეცბაია რა კონტექსტში ახსენეთ. ვიცი, ჩემს წინამორბედებს რა ხელფასები ჰქონდათ - მე კი საქართველოს ნაკრების ბოლო მწვრთნელებს შორის მე ყველაზე დაბალი გასამრჯელო მაქვს. ხელშეკრულებას კი არ ვებღაუჭებოდი. თავიდან ვერ მოვიგეთ, მაგრამ ლევან კობიაშვილმა მითხრა, რომ ხედავენ პროგრესს და სურთ, რომ მუშაობა ერთად გავაგრძელოთ და მეც დავთანხმდი. პასუხისმგებლობა კი ყველა მარცხზე ავიღე და ვეცდები, რომ თამაშის ხარისხი გავაუმჯობესოთ.

- ვიცით, რომ მოსკოვის ლოკომოტივის თამაშს დაესწარით და ხვიჩა კვარაცხელიაზე როგორი შთაბეჭდილება დაგრჩათ?

- ის ახალგარზდა, პერსპექტიული მოთამაშეა და ღირსეულად და თამამად ითამაშა. ასე თუ გააგრძელებს, ნაკრებში მოვიწვევ. მარტო მას არ ვაკვირდებოდი, საბა კვერკველიას თამაშიც მაინტერესებდა, რომელმაც შესანიშნავი შეხვედრა ჩაატარა.

- ეროვნულ ნაკრებში ხომ არ დააბრუნებთ არაბიძეს, რომელმაც ახალგაზრდულ ნაკრებში კარგი მატჩები ჩაატარა?

- არაბიძე გამორჩეული ფეხბურთელია, მაგრამ ჯერ არც ერთ კლუბში, არც "შახტარსა" და არც "ნაციონალში" სტაბილური პრაქტიკა არ ჰქონია. არადა, 20 წლისაა და უნდა თამაშობდეს და ამის მიზეზებზე უნდა იფიქროს. თანამედროვე ფეხბურთი მარტო შეტევა არაა, დაცვასაც უნდა ეხმარებოდე. სამწუხაროდ, კლუბებში პრობლემა მარტო მას არ აქვს, იგივე სხვა ფეხბურთელზეც ითქმის.

- ეროვნული ლიგის თამაშებს უყურებთ?

- საქართველოში არ ვცხოვრობ და ეროვნული ლიგის ყოველ ტურს არ ვესწრები. მაგრამ არსებობს ინტერნეტი და იქ ვუყურებ. საინტერესო ფეხბურთელებს ვეძებ და მაგალითად აკაკი შულაია მომწონს, რომელიც სწრაფია და დინამიური მოთამაშეა.

- კვირკველიაზე თქვით, რომ თავად იცის, შვიცარიასთან ძირითადში რატომ არ ითამაშა. ანანიძე კი ტრავმის გამო გამოაკლდა ნაკრებს და სამი დღის შემდეგ კი კლუბში სრული დატვირთვით ივარჯიშა. გაურკვევლობა ბევრია და ამიტომ გვაქვს უფლება ვიკითხოთ - რამდენად ჯანსაღია ვითარება ნაკრებში?

ალექსანდრე იაშვილი, ფეხბურთის ფედერაციის ვიცე-პრეზიდენტი:

- გარკვევით ვამბობ, რომ ეროვნულ ნაკრებში ჯანსაღი ვითარებაა და მთავარი მწვრთნელის მიმართ ფეხბურთის ფედერაციაც და ნაკრების ფეხბურთელი დიდი პატივისცემა გაგვაჩნია. პატარა გადაცდომები კი ყველგან ხდება და არაბიძის შემთხვევაში ეს სანქციით დასრულდა. სხვა მხრივ, ყველაფერი რიგზეა. რაც შეეხება ანანიძეს, მას ბოლომდე ვენდობით და მან ბევრჯერ დაამტკიცა, რომ საქართველოსთვის თამაში მისთვის უმთავრესია. ამიტომ უნდობლობის საფუძველი არ გაგვაჩნია.

ვაისი: - ანანიძესთან პირადად ველაპარაკე, მუხლი გასიებული ჰქონდა და საეჭვო არაფერი ყოფილა. გუნდი ერთსულოვანია და ერთად შევძელით, რომ ქართველ გულშემატკივრებს იმედი დავუბრუნეთ და ასე უნდა გავაგრძელოთ. 2020 წლის მარტში კი გადამწყვეტი მომენტი იქნება და ამ დროისთვის საუკეთესო მდგომარეობაში უნდა ვიყოთ.

ჩილე გვესტუმრება?

შეხვედრაზე ფეხბურთის ფედერაციის გენერალურმა მდივანმა დავით მუჯირმა თქვა, რომ შესაძლოა, შემოდგომაზე ჩილეს ნაკრები ამხანაგური შეხვედრის ჩასატარებად გვესტუმროს: "საქართველოს ფეხბურთის ფედერაცია ამხანაგური მატჩის ორგანიზებაზე მუშაობს და არის შანსი, რომ სექტემბერში ჩილეს ეროვნულ ნაკრებს შეხვდეთ, მატჩი კი საქართველოში გაიმართოს. თუმცა, აქვე განვმარტავ, რომ საკითხი ჯერ არ გადაწყვეტილა და გულშემატკივრებს არ უნდა შევუქმნათ ილუზია, რომ საბოლოო შეთანხება არსებობს".

ყოველდღიური სპორტული გაზეთი "ლელო"
3420
მკითხველის კომენტარები / 3 /
ილია
0
რასაც მაძლევთ ამ საქმისათვის იმას ვაკეთებო,ანუ ესეც მეტიაო.
კ ო მ ბ ლ ე
0
ენა რაფრა არ უნდა ამოაგლიჯო იმას, ვინც ენა მიუტანა სხვებს უფრო მეტს უხდიდნენო.....
მსგავსი ამბები
რუბრიკის სხვა სიახლეები
;