ვლადიმირ ვაისი: რაღაცეებზე თვალი დავხუჭე...

საქართველოს ნაკრებმა წლის პირველ მატჩში გულშემატკივარი ძალიან გაახარა. ვლადიმირ ვაისის გაწვრთნილებმა მიხეილ მესხის სახელობის სტადიონზე ლიტვას 4:0 მოუგეს.

ეს იმდენად შთამბეჭდავი თამაში იყო, ქართველ ქომაგს იმედი გაუჩნდა - იქნებ, გაზაფხულის მოსვლასა და ბუნების გამოღვიძებასთან ერთად, ჩვენმა ფეხბურთმაც გამოიღვიძოს?

კაცი იმედს არ მოუკლავს და ჩვენც ამის იმედად ვიყოთ. ფაქტია, ასეთი "ჩაკეტილ" ნაკრებებთან ყოველთვის გვიჭირდა. ახლა კი უცებ - 4:0!
მატჩის შემდეგ საქართველოს ნაკრების ფეხბურთელებმა "ლელოსთან" კომენტარები გააკეთეს, ხოლო ვლადიმირ ვაისმა შაბათის მატჩი პრესკონფერენციაზე შეაფასა:

ოთარ კაკაბაძე: ბოლოს ძალები  შემოვინახეთ
ოთარ კაკაბაძემ საქართველოს ნაკრებში კიდევ ერთი კარგი თამაში ჩაატარა. ესპანეთის ლა ლიგა 2-ის ბინადარ "ჟიმნასტიკის" მცველის პროგრესი აშკარაა და ის ეროვნული ნაკრების შეუცვლელად მარჯვენაფლანგელად ჩამოყალიბდა.

ლიტვასთან კაკაბაძე დაცვაშიც საიმედო იყო და შეტევაშიც ხშირად ერთვებოდა. მეორე გოლი სწორედ მისი მშვენიერი ფლანგური პასის შედეგად გავიდა:
"მიმაჩნია, რომ დღეს კარგი თამაში გამოგვივიდა.

რასაკვირველია, პირველ ტაიმს ვგულისხმობ - ოთხი გოლი გავიტანეთ და ვიტყვი, რომ სანახაობრივი ფეხბურთი ვაჩვენეთ. მეორე ტაიმში კი ძალები შევინახეთ. ესტონეთთან მატჩამდე 3 დღეა დარჩენილი და ამ მატჩსაც კარგ ფიზიკურ მდგომარეობაში უნდა შევხვდეთ".

გიორგი ჩაკვეტაძე: ბედნიერი ვარ!
ლიტვასთან 18 წლის გიორგი ჩაკვეტაძის სანაკრებო დებიუტი ვიხილეთ. ბელგიური "გენტის" შემტევმა ნახევარმცველმა პირველივე მატჩში თავი მშვენიერი თამაშითა და გოლით გამოიჩინა.

"ეს ჩემთვის ეროვნულ ნაკრებში პირველი თამაში იყო და ბედნიერი ვარ, რომ პირველივე შეხვედრაში გავიტანე. ვეცდები, შემდეგ თამაშებშიც ასეთივე მოტივაციით და მონდომებით ვითამაშო.

რაც შეეხება თამაშს, პირველ ტაიმში ყველაფერი ძალიან კარგად გამოგვივიდა, ბევრი მომენტი შევქმენით და, ფაქტობრივად, ყველა მათგანი გამოვიყენეთ. მეორე ნახევარში ანგარიშის შენარჩუნებას ვცდილობდით, რაც ბუნებრივია - როცა პირველ ტაიმს 4:0 მოიგებ, ასეც ხდება.

მიმაჩნია, რომ დღეს გუნდმა კარგი ფეხბურთი აჩვენა", - ამბობს ჩაკვეტაძე, რომელიც ესტონეთთან ვერ ითამაშებს, რადგან შეთანხმების საფუძველზე "გენტში" უნდა დაბრუნდეს:

"თავიდანვე ასეთი შეთანხმება იყო "გენტსა" და საქართველოს ფეხბურთის ფედერაციას შორის, რომ მხოლოდ პირველ თამაშს ჩავატარებდი. ასე რომ, ესტონეთთან ამის გამო ვეღარ ვიქნები. მადლობას ვაისს, რომ მენდო და მათამაშა. ჩემი აზრით, დებიუტანტის კვალობაზე ცუდი მატჩი არ გამომივიდა".

ნამდვილი სახე

- ცხადია, ასე იოლად ყველა მეტოქეს ვერ მოვუგებთ. თუმცა დღეს თამაში ბრწყინვალედ ჩავატარეთ, განსაკუთრებით - პირველი ტაიმი. კმაყოფილი ვარ როგორც ხარისხით, ასევე შედეგით.

რეალურად, სწორედ დღეს პირველად ვნახე საქართველოს ნაკრების რეალური სახე დ პოტენციალი. ეს იმის შედეგი იყო, რომ გუნდმა მოახერხა კონცენტრირება. თუ იმავეს სხვა მატჩებშიც შევძლებთ, ჩვენი გუნდი ბევრს მიაღწევს. ესტონეთთანაც ასევე მობილიზებულებმა უნდა ვითამაშოთ.

- დღეს საქართველოს ნაკრებმა რადიკალურად განსხვავებული ტაიმები ითამაშა. რა იყო ამის მიზეზი?

- ბევრი ცვლილება გავაკეთეთ და შესაბამისად, თამაშის მსვლელობაც შეიცვალა - რადიკალურად განსხვავებული ტაიმები ამას შეიძლება მივაწეროთ.

ფეხბურთელები მეორე ნახევარში ისეთივე მოტივირებული აღარ იყვნენ, როგორიც დასაწყისში. მაგრამ ეს ფეხბურთია და ასეც ხდება - როცა პირველ ტაიმს 4:0-ს იგებ, ძნელია, მეორე ნახევარშიც იგივე ფეხბურთი აჩვენო.

- ამ თამაშიდან გამომდინარე, როგორ ფიქრობთ - რა აქვს ნაკრებს გამოსასწორებელი?

- როცა ანგარიში 4:0 გახდა, ფეხბურთელებმა პუბლიკაზე დაიწყეს თამაში, მე რაღაცებზე დავხუჭე თვალი. თუმცა დავალება მივეცი, რომ გოლი არ გაეშვათ და ფეხბურთელებმა ეს მითითებები კარგად შეასრულეს.

- ესტონეთთან წინა ამხანაგურ შეხვედრაში საქართველომ 0:3 წააგო და ახლა რევანშს ველოდებით. რა იცით მომავალ მეტოქეზე?

- ესტონეთის ნაკრები კარგად გამოიყურებოდა შესარჩევ ჯგუფში. ვიცი, რომ დაცვაში კარგად თამაშობენ, ჩვენ კი ვეცდებით, მათი მინუსები ვიპოვოთ და დავამარცხოთ. არ გვეყოლებიან ანანიძე და ჩაკვეტაძე, რომელიც მხოლოდ ერთი მატჩის სათამაშოდ გამოუშვეს, მაგრამ რამეს მოვიფიქრებთ და ვეცდებით, თუნდაც კონტრშეტევებზე გამოვიჭიროთ მეტოქე.

- ანანიძის ტრავმა სერიოზულია?

- ერთადერთი, რაზეც დღეს გული დამწყდა, სწორედ ანანიძის ტრავმაა. ჯანო შესანიშნავი ადამიანი და უნიჭიერესი ფეხბურთელია. იმედია, მას სერიოზული არაფერი სჭირს და მოედანს მალე დაუბრუნდება.

ყოველდღიური სპორტული გაზეთი "ლელო"
871
მკითხველის კომენტარები / 0 /
მსგავსი ამბები
რუბრიკის სხვა სიახლეები